(ភ្នំពេញ)៖ Visa ដែលជាក្រុមហ៊ុនបច្ចេកវិទ្យាទូទាត់សាច់ប្រាក់ តាមប្រព័ន្ធអេឡិត្រូនិចអន្តរជាតិធំបំផុតមួយ លើពិភពលោក បានប្រកាសថា កាប្រើប្រាស់សេវាកម្មទូទាត់សាច់ប្រាក់ តាមប្រព័ន្ធអេឡិចត្រូនិក (Visa) នៅក្នុងប្រទេសកម្ពុជា កំពុងកើនឡើងយ៉ាងរហ័ស។
អ្នកស្រី ជុំ ម៉ូនីកា នាយិការ គ្រប់គ្រងក្រុមហ៊ុន Visa ប្រចាំប្រទេសកម្ពុជា បានអះអាងថា ការប្រើប្រាស់ Visa នៅក្នុងប្រទេសនេះ បានកើនឡើង៦៥ភាគរយ ធៀបនឹងឆ្នាំមុន។ Visa ក៏បានមើលឃើញដែរថា បរិមាណទូទាត់សរុប និងតម្លៃសរុប នៃប្រតិបត្តិការនៅលើបណ្តាញ របស់ខ្លួនកើនឡើង៣០ភាគរយ រៀងៗខ្លួន ខណៈដែលក្រុមហ៊ុន បានបង្កើតចំនួនទីតាំង ដែលទទួលការទូទាត់ចំណាយដោយកាតរបស់ខ្លួន បាន២០ភាគរយ។
អ្នកស្រី ជុំ ម៉ូនីកា បានថ្លែងបែបនេះ នៅថ្ងៃទី២១ ខែមិថុនា ឆ្នាំ២០១៨ នៅក្នុងឱកាសក្រុមហ៊ុន VISA បានរៀបចំសិក្ខាសាលាស្តីពី «មូលដ្ឋានគ្រឹះ នៃការទូទាត់សាច់ប្រាក់តាមរយៈឌីជីថល» នៅសណ្ឋាគារ សូហ្វីតែល ភូគាត្រា រាជធានីភ្នំពេញ។
អ្នកស្រីបានថ្លែងយ៉ាងដូច្នេះថា៖ «វាជាហេតុផលច្រើនណាស់សម្រាប់សុទិដ្ឋិនិយម លើសេដ្ឋកិច្ចកម្ពុជា។ ជាចម្បងយើងឃើញថា GDP ជាតិបានកើនឡើង៧ភាគរយ កាលពីឆ្នាំមុន ខណៈដែលតួលេខពីបណ្តាញរបស់យើងចង្អុលបង្ហាញយ៉ាងច្បាស់ពីកំណើន នៃសកម្មភាពសេដ្ឋកិច្ច។ ខណៈសេដ្ឋកិច្ច នៃកម្ពុជាបន្តវិវត្តន៍ និងធ្វើសមាហរណ៍កម្ម ជាមួយសេដ្ឋកិច្ចពិភពលោកយើងរំពឹងថា និងមានការកើនឡើងនៅការទូទាត់សាច់ប្រាក់ តាមរយៈអេឡិចត្រូនិច ខណៈពេលដែលអតិថិជន និងអាជីវកម្មកាន់តែច្រើនកំពុងស្វែងរកអត្តប្រយោជន៍ពីភាពឆាប់រហ័ស ភាពងាយស្រួស និងសុវត្ថិភាពជាងសាច់ប្រាក់»។
ក្នុងរយៈពេល១២ខែចុងក្រោយនេះ វីសា បានអនុវត្តនូវគំនិតផ្តូចផ្តើម ជាច្រើនដើម្បីជួយពង្រីកការប្រើប្រាស់ការទូទាត់សាច់ប្រាក់តាមរយៈ អេឡិចត្រូនិច ក្នុងប្រទេសកម្ពុជា ដែលរួមមានការសហការជាមួយគ្រឹះស្ថានអង្គរ ដើម្បីអនុញ្ញាត ឱ្យប្រើប្រាស់វីសាកាត ក្នុងការទិញប័ណ្ណសម្រាប់ចូលទស្សនានៅ រមណីដ្ឋានប្រាសាទអង្គរវត្ត ផងដែរ។
អ្នកស្រី ជុំ ម៉ូនីកា បានលើកឡើងទៀតថា «នៅឆ្នាំ២០១៦ ប្រទេសកម្ពុជាបាទទួលភ្ញៀវទេសចរជាង៥លាននាក់ ដែលកើនឡើងជិត២ដង នៃចំនួនភ្ញៀវទេសចរ កាលពី៥ឆ្នាំមុន។ ដូច្នេះយើងយល់ថា វាមានសារៈសំខាន់ណាស់ដែលយើង ដើរតួយ៉ាងសំខាន់ក្នុងការជួយពង្រឹង ហេដ្ឋារចនាសម្ព័ន្ធការទូទាត់ប្រាក់របស់ប្រទេសកម្ពុជា ដើម្បីឱ្យប្រជាជនមកពីជុំវិញពិភពលោក អាចទូទាត់ប្រាក់ប្រកបដោយប្រសិទ្ធភាព និងមានសុវត្ថិភាព នៅរមណីដ្ឋានប្រសាទអង្គរ ក៏ដូចជានៅតំបន់ទេសចរណ៍សំខាន់ៗ ជាច្រើនទៀតនៅកម្ពុជា»។
ជាផ្នែកមួយ នៃផែនការរបស់ខ្លួន ក្នុងការបង្កើនល្បឿនផែនទីបង្ហាញផ្លូវ នៃការទូទាត់តាមរយៈឌីជីថល សម្រាប់ប្រទេសកម្ពុជា វីសា កំពុងកំណត់តាមគោលដៅ ដើម្បីធ្វើឱ្យផលិតផលរបស់ខ្លួនកាន់តែ មានភាពច្នៃប្រឌិតបន្ថែមទៀត ដូចជាការទូទាត់សាច់ប្រាក់តាមរយៈ ការស្កេនកូដ QR និងការបង់ប្រាក់តាមប្រព័ន្ធ Contactles ក្នុងឆ្នាំនេះ ដើម្បីបម្រើរអតិថិជនឱ្យកាន់តែប្រសើរឡើង។ ការទូទាត់សាច់ប្រាក់តាម QR កូដ អតិថិជន អាចប្រើប្រាស់ស្មាតហ្វូនរបស់ខ្លួន ដើម្បីស្កេនកូដ QR ហើយប្រាក់ត្រូវបានផ្ញើពីគណនីធនាគារ របស់អតិថិជនទៅអ្នកលក់ ខណៈដែលការទូទាត់តាមប្រព័ន្ធ Contactless Payment អតិថិជនគ្រាន់តែដាក់កាតប៉ះម៉ាស៊ីនទូទាត់ប្រាក់កន្លែងលក់ទំនិញប៉ុណ្ណោះ ដើម្បីធ្វើប្រតិបត្តិការទូទាត់ប្រាក់។
អ្នកស្រីបានបន្ថែមថា «ដោយសម្លឹងឆ្ពោះទៅមុខ យើងនឹងផ្តោតការយកចិត្តទុកដាក់យ៉ាងខ្លាំងលើ ការព្យាយាមពង្រីកបណ្តាពាណិជ្ជករ និងពង្រីកបណ្តាការប្រើប្រាស់ ការទូទាត់តាមរយៈអេឡិចត្រូនិច ទោះបីវាត្រូវប្រើប្រាស់សម្រាប់ទិញ ទំនិញធំៗ ដូចជាគ្រឿងសង្ហារឹមថ្មី យានជំនិះ ឬសម្រាប់ការចំណាយប្រចាំថ្ងៃ ដូចជាការចាក់ប្រេងឥន្ធនៈ ឬទិញគ្រឿងទេស។ គោលដៅរបស់យើង ពិតជាការធ្វើឱ្យការទូទាត់មានភាពសាមញ្ញ សុវត្ថិភាព និងងាយស្រួលជាងមុន សម្រាប់អតិថិជននៅទីនេះ ដូច្នេះពួកគាត់អាចទទួលបានអត្ថប្រយោជន៍ ពីការរីកចម្រើនលូតលាស់ នៃសេដ្ឋកិច្ចមួយនេះ»៕
