(ស្វាយរៀង)៖ លោក សៅ សុវណ្ណី ប្រធានក្រុមការងារចុះជួយឃុំថ្នាធ្នង់ បានអំពាវនាវឲ្យប្រជាពលរដ្ឋទាំងអស់ ត្រូវត្រៀមឯកសារដែលពាក់ព័ន្ធ ដើម្បីទៅបោះឆ្នោតឲ្យបានគ្រប់គ្នា នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ ដោយមិនត្រូវជឿតាមការញុះញង់ របស់បុគ្គលមួយចំនួននោះឡើយ។ ជាមួយគ្នានោះ លោកថែមទាំងបានអំពាវនាវឲ្យប្រជាពលរដ្ឋបោះឆ្នោត ជូនគណបក្សប្រជាជនកម្ពុជា ដើម្បីបន្តរក្សាបាននូវសុខសន្តិភាព និងការអភិវឌ្ឍ។
ការអំពាវនាវយ៉ាងដូច្នេះ ត្រូវបានធ្វើឡើងនៅថ្ងៃទី២១ ខែមិថុនា ឆ្នាំ២០១៨នេះ ក្នុងឱកាសដែលលោក ចុះជួបសំណេះសំណាល ជាមួយសមាជិកបក្ស នៅឃុំថ្នាធ្នង់ ស្រុករំដួល ខេត្តស្វាយរៀង ប្រមាណ៣០០០នាក់។
លោក សៅ សុវណ្ណី បានឲ្យដឹងបន្តទៀតថា គណបក្សប្រជាជនកម្ពុជា គឺជាគណបក្សចាស់ទុំមួយ ដែលប្រកាន់យកនូវការធ្វើអំពើល្អ និងតែងតែនៅរួមសុខរួមទុក្ខ ជាមួយប្រជាពលរដ្ឋ ហើយបានកសាង ប្រទេសតាំងពីបាតដៃទរទេឲ្យមានភាពរីកចម្រើនលើគ្រប់វិស័យ ជាពិសេស នាំមកនូវសុខសន្តិភាពពេញផ្ទៃប្រទេស ដែលគ្មានគណបក្សណាអាចធ្វើបាននោះឡើយ ហើយការបោះឆ្នោតជ្រើសរើស តំណាងរាស្ត្រ ខាងមុខនេះ គណបក្សប្រជាជនកម្ពុជា ចាប់ឆ្នោតបានលេខរៀងទី២០ ដែលជាលេខនាំមកសំណាង ដល់គណបក្សប្រជាជនយើង។
លោកក៏បានអំពាវនាវដល់ប្រជាពលរដ្ឋ កុំឲ្យជឿការញុះញង់របស់បុគ្គលមួយចំនួន ដែលឃោសនាមិនឲ្យប្រជាពលរដ្ឋទៅបោះឆ្នោត ហើយសមត្ថកិច្ច ត្រូវចាត់វិធានការចំពោះបុគ្គលទាំងនោះ មកអប់រំផងដែរ។
ក្នុងឱកាសនោះ សមាជិកបក្ស ក៏បានបង្ហាញការជឿទុកចិត្តផងដែរ ចំពោះការដឹកនាំរបស់គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធាន និងប្តេជ្ញានាំគ្នាទៅចូលរួមបោះឆ្នោត ជូនគណបក្សប្រជាជនកម្ពុជាដែលមានលេខរៀងទី២០គ្រប់ៗគ្នា៕
