(បន្ទាយមានជ័យ)៖ នៅព្រឹកថ្ងៃទី២១ ខែមិថុនា ឆ្នាំ២០១៨ នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ប្រធានកិត្តិយសសមាគមមូលនិធិ មនុស្សចាស់ខេត្តបន្ទាយមានជ័យ និងជាប្រធានក្រុមការងារថ្នាក់កណ្តាលចុះជួយ ខេត្តបន្ទាយមានជ័យ បានអញ្ជើញជាអធិបតីភាពក្នុងពិធីសំណេះសំណាលជាមួយប្រជាពលរដ្ឋនៅឃុំតាបែន ស្រុកស្វាយចេក ខេត្តបន្ទាយមានជ័យ ដែលមានអ្នកចូលរួមជាង៤០០០នាក់។
ក្នុងឱកាសនោះ នាយឧត្តមសេនីយ៍ កែ គឹមយ៉ាន បានមានមតិសំណេះសំណាល និងពាំនាំការផ្ដាំផ្ញើសួរសុខទុក្ខ ពីសំណាក់ថ្នាក់ដឹកនាំកំពូលរបស់ជាតិមាន៖ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា, សម្ដេចពញាចក្រី ហេង សំរិន ប្រធានរដ្ឋសភា, សម្តេចក្រឡាហោម ស ខេង និងសម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា។
ក្នុងឱកាសនោះ នាយឧត្តមសេនីយ៍ កែ គឹមយ៉ាន បានថ្លែងថា ក្រោមការដឹកនាំរបស់សម្តេចតេជោ ហ៊ុន សែន ប្រទេសជាតិមានសុខសន្តិភាព សន្តិសុខ ប្រជាពលរដ្ឋមានសេរីភាព ក្នុងការធ្វើដំណើរ មកជួបប្រជុំគ្នា និយាយពីសុខទុក្ខ រំលឹកនូវអនុស្សាវរីយ៍ និងធ្វើបុណ្យជាមួយគ្នាយ៉ាងសប្បាយរីករាយដោយគ្មានការព្រួយបារម្ភខ្លាចបញ្ហាពីសុវត្ថិភាពគេចពីគ្រាប់រំសេវ អ្វីឡើយខុសប្លែកពីរបបអតីតកាល ដែលយើងទាំងអស់គ្នាបានដឹង និងជួបប្រទះរួចមកហើយនោះ។
ក្នុងឱកាសនោះដែរ នាយឧត្តមសេនីយ៍ កែ គឹមយ៉ាន បានថ្លែងអំណរគុណដល់មហាគ្រួសារអ្នកបន្ទាយមានជ័យ ដែលចូលរួមថែរក្សាបាននូវសុខសន្តិភាព និងចេះឆក់យកឱកាសទាញផល ពីសុខសន្តិភាពនេះរួមគ្នាកសាងអភិវឌ្ឍន៍សហគមន៍មូលដ្ឋាន ដូចនេះសូមបងប្អូនអញ្ជើញទៅបោះឆ្នោតជូនគណបក្សប្រជាជនកម្ពុជា ដែលមានរូបសញ្ញាទេវតាបាចផ្កា នៅលេខរៀងទី២០ «ងាយចាំ ងាយគិត ងាយគូស» នៅថ្ងៃទី២៩ ខែកក្កដា ឆ្នាំ២០១៨ខាងមុខ ឲ្យបានគ្រប់គ្នាដើម្បីសម្តេចតេជោ ហ៊ុន សែន បន្តដឹកនាំនាវាកម្ពុជាឆ្ពោះទៅការអភិវឌ្ឍរីកចម្រើនបន្ថែមទៀត។
ជាវប្បធម៌ចែករំលែក និងគិតគូរពីសុខទុក្ខ នាយឧត្តមសេនីយ៍ កែ គឹមយ៉ាន បាននាំយកថវិកា សម្ភារ និងអំណោយចែកជូនមាន៖
ទី១៖ ជូនប្រជាពលរដ្ឋចំនួន៤០០០នាក់ ម្នាក់ៗ ទទួលបានសារ៉ុង១
ទី២៖ ជូនមនុស្សចាស់ពីអាយុ៧០ឆ្នាំឡើង នៅឃុំតាបែនចំនួន១៧០នាក់ ម្នាក់ៗ ទទួលបាន៖ ថវិកា២ម៉ឺនរៀល, សារ៉ុង១, បំពង់ទឹកក្ដៅ១, មី, ពិល, ទឹកដោះគោ, ប្រេងកូឡា, ប្រេងខ្យល់, ស្ករស អំបិលអ៊ីយ៉ូត, តែ, ប្រេងឆា និងកៅអៀក ។ល។
ទី៣៖ ជូនសាលាឃុំតាបែន សាលាឃុំស្វាយចេក សាលាឃុំស្លក្រាម សាលាឃុំ រលួស ក្នុង១ឃុំៗ ថវិកា១លានរៀល
ទី៤៖ ជូនសាលាបឋមសិក្សា តាបែន ថវិកា៥០ម៉ឺនរៀល
ទី៥៖ ជូនមណ្ឌលសុខភាពតាបែន ថវិកា៥០ម៉ឺនរៀល
ទី៦៖ ជួយចាក់ដីជួសជុលផ្លូវក្នុងសាលា បឋមសិក្សាតាបែនទាំងអស់
ទី៧៖ ជូនអនុវិទ្យាល័យតាបែន៥០ម៉ឺនរៀល៕
