(ភ្នំពេញ)៖ ទីតាំហ្គេមបាញ់ត្រីខ្លះ នៅតាមមូលដ្ឋានក្នុងខណ្ឌដូនពេញ នៅតែលួចបើកលេង បើទោះបីជាអាជ្ញាធរ តែងតែចាត់វិធានការជាបន្តបន្ទាប់ ដោយទីតាំងទាំងនេះ បានពង្វក់ក្រុមក្មេងសិស្សសាលា និងអាចជាប្រមូលផ្តុំទៅដោយបទល្មើស ក្នុងនោះភាគច្រើនជាគ្រឿងញៀន។

ជាក់ស្តែង នៅយប់ថ្ងៃទី២០ ខែមិថុនា ឆ្នាំ២០១៨នេះ លោក ចាប ឌីណា នាយករដ្ឋបាលសាលាខណ្ឌដូនពេញ បានដឹកនាំកម្លាំងអាជ្ញាធរ ចុះទៅបង្ក្រាបទីតាំងហ្គេមបាញ់ត្រីចំនួន១កន្លែង ស្ថិតនៅសង្កាត់ផ្សារថ្មីទី៣ បន្ទាប់ពីទទួលបានព័ត៌មានពីពលរដ្ឋមកនោះ។

លោក ចាប ឌីណា បានប្រាប់ភ្នាក់ងារព័ត៌មាន Fresh News ប្រចាំខណ្ឌថា «បន្ទាប់ពីទទួលសេចក្តីរាយការណ៍ពីពលរដ្ឋថា ទីតាំងខាងលើមានហ្គេមបាញ់ត្រី រហូតមានក្មេងសិស្សសាលាទៀត នោះ លោកអភិបាលខណ្ឌ សុខ ពេញវុធ បានបញ្ជាឲ្យចុះទៅបង្ក្រាបជាក់ស្តែងតែម្តង»។

បើតាមនាយករដ្ឋបាលរូបនេះ សម្រាប់ប្រតិបត្តិការចុះទៅបង្ក្រាប កម្លាំងអាជ្ញាធរបានរឹបអូសបានទូហ្គេមចំនួន១៦ ដែលម្ចាស់ទីតាំងបានយកម៉ូនីទ័រមកកែច្នៃសម្រាប់លេងហ្គេម ហើយនៅពេលលោកចុះបង្ក្រាបនោះ សង្កេតឃើញមានក្មេងសិស្សសាលា បានចូលលេង ដោយមិនបានទៅចូលរៀននោះឡើយ។

ជាមួយគ្នានេះ លោក ចាប ឌីណា បានបន្ថែមថា អាជ្ញាធរនឹងបញ្ចេញកណ្តាប់ដៃដែក ចំពោះការចុះបង្ក្រាបទីតាំងហ្គេមទាំងនេះ ហើយក៏សូមអំពាវនាវដល់ពលរដ្ឋតាមមូលដ្ឋាន​សូមរាយការណ៍មក អាជ្ញាធរ នៅពេលដឹងថា ទីណាមានបទល្មើសទាំងនេះ៕