(បន្ទាយមានជ័យ)៖ ស្នងការដ្ឋាននគរបាលខេត្តបន្ទាយមានជ័យ នៅព្រឹកថ្ងៃទី១៨ ខែមិថុនា ឆ្នាំ២០១៨ បាន​បង្ហាញមុខសញ្ញាជនសង្ស័យជាឃាតកម្នាក់ទៀត​ហើយ ក្នុងអំពើឃាតកម្ម វាយសម្លាប់ជនរងគ្រោះ ជាជាងកាត់សក់ ប្លន់យកម៉ូតូជនរងគ្រោះ កាលពីយប់ថ្ងៃទី២៥ ខែឧសភា ឆ្នាំ២០១៨ ស្ថិតនៅខាងក្រោយវិទ្យាល័យខ្លាកូន ចំណុចជើងភ្នំខ្លាកូន ភូមិខ្លាកូនថ្មី សង្កាត់កំពង់ស្វាយ​ ក្រុងសិរីសោភ័ណ ខេត្តបន្ទាយមានជ័យ។

លោកឧត្តមសេនីយ៍ត្រី សិទ្ធិ ឡោះ ស្នងការរងទទួលផែនព្រហ្មទណ្ឌ នៃស្នងការដ្ឋាននគរបាលខេត្ត បានឱ្យដឹងថា ជនសង្ស័យរូបនោះមានឈ្មោះ ផាត សុគន្ធ អាយុ២៧ឆ្នាំ មុខរបរស៊ីឈ្នួលធ្វើស្រែចំការ ឱ្យគេនៅខេត្តបន្ទាយមានជ័យ។ បច្ចុប្បន្នរស់នៅភូមិឈូកមាស ឃុំកូនក្រៀល ក្រុង​សំរោង ខេត្តឧត្តរមានជ័យ ត្រូវបាននគរបាលក្រុងសិរីសោ​ភ័ណ សហ​ការជាមួយកម្លាំងនគរបាល ការិយាល័យជំនាញព្រហ្មទណ្ឌ នៃស្នងការដ្ឋាននគរបាលខេត្តបន្ទាយមានជ័យ និងនគរបាលខេត្តឧត្តរមានជ័យ បានចេញប្រតិបត្តិការបង្រ្កាប​ ចាប់ខ្លួនកាលពីថ្ងៃទី១៥ ខែមិថុនា ឆ្នាំ២០១៨នៅផ្ទះជនសង្ស័យនៅ ខេត្តឧត្តរមានជ័យ។

លោកបានឱ្យដឹងទៀតថា សមត្ថកិច្ចចាប់ខ្លួនជនសង្ស័យរូបនេះ ដោយប្រើប្រាស់ នៃការស្រាវជ្រាវស៊ើបអង្កេតរយៈពេល១៦ថ្ងៃ ទើបឃាត់ខ្លួនបានសម្រេច។​ បន្ទាប់ពីកម្លាំងនគរបាលបានចាប់ខ្លួន ជនសង្ស័យ ជាបក្ខពួកឃាតក២នាក់រួចមកហើយ កាលពីថ្ងៃទី២ ខែមិថុនា ឆ្នាំ២០១៨ នៅក្រុងសិរីសោភ័ណ ដែលមានឈ្មោះ ទី១៖ ឈ្មោះ លុញ សុគា ហៅខ្មៅ ភេ​ទប្រុស អាយុ២២ឆ្នាំ ទី២៖ ឈ្មោះ ស៊ុន ស៊ុះ ហៅក្តាម​ប្រៃ ភេទប្រុស​ អាយុ៣៧ឆ្នាំ ហើយជនត្រូវចោទ២នាក់ត្រូវ បានតុលាការបញ្ជាដាក់ឃុំ ខ្លួនបណ្តោះអាសន្ននៅពន្ធនាគាររួចហើយផងដែរ។

លោកស្នងការរង បានប្រាប់ឱ្យដឹងបន្តទៀតថា​ សំណុំរឿងអំពើឃាតកម្មគិតទុកជាមុននេះ គឺមុនដំបូងសមត្ថកិច្ចស្រាវជ្រាវថា ជនសង្ស័យតែ៤នាក់ប៉ុណ្ណោះជាអ្នកប្រព្រឹត្ត​ ប៉ុន្តែក្រោយចាប់ខ្លួនជនស​ង្ស័យឈ្មោះ ផាត សុគន្ធ បានឆ្លើយសារភាពថា បក្ខពួកគេមាន៦នាក់ នៅសល់៣នាក់ទៀត មិនទាន់ចាប់ខ្លួន។ ចំពោះការអនុវត្តកិច្ចសំណុំរឿងអំពើឃាត​កម្មគិតទុកជាមុន គឺដោយមានកិច្ចសហប្រតិបត្តិការ ប្រើប្រាស់វិធានការសរុប ក្នុងនោះដោយមានការអនុវត្តតាមបទ បញ្ជាយ៉ាងម៉ឺងម៉ាត់របស់លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ និងមានការសម្របសម្រួលពីតំណាងអយ្យការខេត្តបន្ទាយមានជ័យ ទើបកម្លាំងនគរបាល អនុវត្តកិច្ចការងារនេះយ៉ាងយកចិត្តទុកដាក់បំផុត និងទទទួលបានលទ្ធផលល្អ។

​លោកបានបញ្ជាក់ឱ្យដឹងទៀថា ជ​នសង្ស័យឈ្មោះ ផាត សុគន្ធ ជាអ្នកយកដុំថ្មវាយសម្លាប់ជនរងគ្រោះជាមួយបក្ខពួករបស់ខ្លួន ហើយរូបគេបានយក ម៉ូតូជនរងគ្រោះដែលមាន​ពួកម៉ាកឈ្មោះធី យកទៅបញ្ចាំនៅចំណុចផ្លូវលេខ៣ ក្រុងសិរីសោភ័ណ ហើយពួកម៉ាកឈ្មោះធី ឱ្យប្រាក់មករូបគេ១០០ដុល្លារ រួចហើយបានរត់គេចខ្លួនទៅខេត្តឧត្តរមានជ័យ។

​សូមរំលឹកថា កាលថ្ងៃទី២៨ ខែឧសភា ឆ្នាំ២០១៨​ នៅចំណុចខាងក្រោយវិទ្យាល័យខ្លាកូន ជើងភ្នំខ្លាកូន ភូមិខ្លាកូនថ្មី សង្កាត់កំពង់ស្វាយ ក្រុងសិរីសោភ័ណ សាកសពបុរសម្នាក់ឈ្មោះ ភឿន សុមឿន ភេទ​ប្រុស អាយុ៣៨ឆ្នាំ រស់នៅភូមិគោរដ្ឋាន សង្កាត់អូរអំបិល ក្រុងសិរីសោភ័ណ ត្រូវបានគេប្រទះឃើញស្លាប់ ក្នុងសភាពហើយស្អុយដោយអំពើវាយសម្លាប់ប្លន់យកម៉ូតូ។ ជនរងគ្រោះ និងជនសង្ស័យស្គាល់គ្នាហើយ ទៅជក់ថ្នាំញៀនផឹកស្រា និងរួមភេទប្រុសដូចគ្នានៅទីនោះ។​ អំពើឃាតកម្មនោះសមត្ថកិ​ច្ចស្រាវជ្រាវជាបន្តបន្ទាប់ប​ង្រ្កាបចាប់ខ្លួន ជនសង្ស័យ៣នាក់មកហើយ។​ ចំណែកបក្ខពួកនៅសេសសល់៣នាក់សមត្ថកិច្ច កំពុងបន្តតាមស្វែង រកចាប់ខ្លួនយកមកផ្តន្ទាទោសតាមផ្លូវច្បាប់បន្ថែមទៀត៕