(ស្វាយរៀង)៖ លោក ចាប ភក្តី សមាជិកគណៈកម្មាធិការកណ្តាល គណបក្សប្រជាជនកម្ពុជា ក្រុមការងារថ្នាក់ជាតិប្រចាំខេត្តស្វាយរៀង អនុប្រធានក្រុមការងារគណបក្សប្រជាជនកម្ពុជា ចុះជួយស្រុកចន្រ្ទា ប្រធានក្រុមការងារចុះជួយឃុំច្រេស និងលោកស្រី ចែម សេរីរដ្ឋ នៅថ្ងៃទី១៧ ខែមិថុនា ឆ្នាំ២០១៨នេះ បានយកទានវស្សាប្រគេនដល់វត្តចំនួន៣ គឺវត្តព្រៃខ្លូត វត្តកោះដូនសាយ និងវត្តត្រពាំងធ្លក។
ក្រោយពីលោក សំ សាភាន់ អនុប្រធាន ក្រុមការងារគណបក្សចុះជួយឃុំច្រេស បានសំណេះសំណាលសំដែងការគួរសមរួចមក លោក ចាប ភក្តី បានមានមតិសំណេះសំណាល និងនាំនូវការផ្តាំផ្ញើសាកសួរសុខទុក្ខ ពីសម្តេចតេជោ ហ៊ុន សែន ប្រធានគណបក្សប្រជាជនកម្ពុជា ថ្នាក់ដឹកនាំថ្នាក់កណ្តាល ខេត្ត ស្រុកជូនអង្គពិធី។
លោក ចាប ភក្ដី បានរំលឹកបញ្ជាក់ និងលើកឡើងវិញអំពីវីរភាព និងការតស៊ូប្តូរផ្តាច់ របស់គណបក្សប្រជាជនកម្ពុជា ដែលបានរំដោះប្រជាជាតិ ចេញពីរបបប្រល័យពូជសាសន៍ ប៉ុល ពត នៅថ្ងៃ៧ ខែមករា ឆ្នាំ១៩៧៩ ការស្តាកសាងប្រទេសឡើងវិញ ការបង្រួបបង្រួមជាតិ ស្វែងរកសន្តិភាព ក្រោមមាគ៌ានយោបាយឈ្នះឈ្នះ របស់សម្តេចតេជោ ហ៊ុន សែន ក្លាយជាប្រទេសមួយរីកចម្រើនសំបូររុងរឿង គួរជាទីមោទនភាពបំផុត។
លោកបានបញ្ជាក់ជូន និងសូមឲ្យប្រជាជនទាំងអស់ អញ្ជើញទៅបោះឆ្នោតគ្រប់ៗគ្នា និងបោះឆ្នោតឲ្យគណបក្សប្រជាជនកម្ពុជា ដែលមានរូបទេវតាបាចផ្កា លេខរៀងទី២០ នៅថ្ងៃទី២៩ ខែកក្កដា ឆ្នាំ២០១៨ខាងមុខនេះ។
នាឱកាសនោះ លោក ចាប ភក្ដី បាននាំមកនូវសម្ភាររបស់លោក ម៉ឹង សំផន, លោក សូ ម៉ន និងសប្បុរសជននានារួមមាន អង្ករចំនួន៦០០គីឡូក្រាម, ទានវស្សា៣គូ, ប្រេង៩០លីត្រ, មីកញ្ចប់១៨កេះ, ត្រីខកំប៉ុង៣០០កំប៉ុង និងស្ករស៣០គីឡូក្រាម ទឹកត្រី និងទឹកស៊ីអ៊ីវ៣០យួរ, បច្ច័យចំនួន១,៥០០,០០០រៀល សម្រាប់៣វត្ត ចំពោះព្រះសង្ឃ៣វត្ត ចំនួន១១អង្គ ១អង្គស្លាដកចំនួន១ បច្ច័យចំនួន៥០,០០០រៀល ហើយសមាជិកក្នុងម្នាក់ៗ ថវិកាចំនួន១០,០០០រៀល៕
