(ភ្នំពេញ)៖ តារាសម្តែងប្រុស និងជាតារាម៉ូដែល ដែលកំពុងមានប្រជាប្រិយភាព ផ្នែកខ្សែភាពយន្តភាគ និងរឿងដុំ លោក សូ ឆានី ដែលទស្សនិកជនភាគច្រើន បានស្គាល់លោក តាមរយៈការលេចមុខ ក្នុងខ្សែភាពយន្តខ្មែរជាច្រើន ជាពិសេសរឿង «ទណ្ឌកម្មស្នេហ៍» សម្តែងជាមួយនឹងកញ្ញា សារាយ ព្រះកាយច័ន្ទ តែម្តង។ ទន្ទឹមនឹងភាពល្បីល្បាញ ក្នុងការប្រឡូកខ្លួន ជាមួយវិស័យភាពយន្តនេះ គឺមានទស្សនិកជនជាច្រើន ចង់ដឹងពីប្រវត្តិជីវិត ការចូលសម្តែង និងការងារបច្ចុប្បន្នរបស់លោក ក្នុងវិស័យមួយនេះ ខណៈមកទល់នឹងពេលនេះ អ្នកគាំទ្ររបស់លោកកាន់តែកើនឡើង ជាលំដាប់។ ដោយឡែក ដោយសារការងារមានភាពមមាញឹក នឹងត្រូវការចាំបាច់ក្នុងការធ្វើដំណើរទៅសម្តែង មួយរយៈមុន លោកបានប្រកាសក្នុងបណ្តាញសង្គមថា លោកចង់ទិញរថយន្តមួយសម្រាប់ធ្វើដំណើរ ប៉ុន្តែអ្វីដែលគួរឲ្យចាប់អារម្មណ៍នោះ គឺបែរជាមានមនុស្សប្រុសប្លែកមុខម្នាក់ ចង់ឧបត្ថមទៅវិញ ប៉ុន្តែលោកបានបដិសេធ មិនទទួលកាដូរ ជារថយន្តពីបុរសនោះឡើយ។
តារាសម្តែងឈានចូលវ័យ ៣០ឆ្នាំ លោក សូ ឆានី បានថ្លែងប្រាប់ទាំងស្នាមញញឹម តាមរយៈកម្មវិធី «អាថ៌កំបាំងក្រៅឆាក របស់តារា» ដោយបានបញ្ជាក់នូវប្រវត្តិជីវិតរបស់លោកថា ដោយដំបូងឡើយ លោកបានធ្វើជាតារម៉ូដែល គឺនៅឆ្នាំ ២០១៣ បន្ទាប់មកដោយទីផ្សារខាងម៉ូដែលប្រុស ហាក់ស្ងប់ស្ងាត់ពេក លោកបានផ្អាកសិល្បៈមួយរយៈធំ ដើម្បីទៅធ្វើការនៅក្រុមហ៊ុន ឯកជនមួយកន្លែង។ ដោយឡែក ដោយសារតែមានផលិតករភាពយន្ត ទាក់ទងមកឲ្យលោក ចូលរួមសម្តែងច្រើនពេក ទើបសម្រេចប្រឡូកក្នុងវិស័យសិល្បៈ រហូតមកទល់នឹងបច្ចុប្បន្ន ពោលគឺឈានចូលសម្តែង ចាប់តាំងពីឆ្នា ២០១៦មកម្ល៉េះ។
លោក សូ ឆានី បានថ្លែងថា «រឿងដែលលោក ចូលសម្តែងដំបូង គឺរឿង ខ្មោចទឹក ដែលថតត្រឹមតែជាតួអង្គ បន្ទាប់បន្សំគេតែប៉ុណ្ណោះ ហើយក្នុងរយៈពីរឆ្នាំ គិតចាប់ពីឆ្នាំ ២០១៦ មក គឺលោកចេះតែវិវឌ្ឍន៍ខ្លួនឯងជានិច្ច រហូតបានចូលរួមសម្តែងជាតួឯក ក្នុងស្ថានីយទូរទស្សន៍នានា ដូចបច្ចុប្បន្ននេះជាដើម។ មិនតែប៉ុណ្ណោះ បើគិតមកទល់នឹងពេលនេះ ទីផ្សារលោក ក៏មានភាពមមាញឹក ដោយទទួលរឿងថតជាច្រើន បន្ទាប់ពីបញ្ចប់រឿង ទណ្ឌកម្មស្នេហ៍»។
ថ្លែងក្នុងសំណួរចាក់ដោតមួយ ពីសំណាក់ពិធីករ ក្នុងកម្មវិធី «អាថ៌កំបាំងក្រៅឆាក របស់តារា» ដែលទាក់ទងនឹងការបង្ហោះសារចង់ទិញរថយន្ត តាមរយៈបណ្តាញសង្គមហ្វេសប៊ុក ថាតើ ការទិញរថយន្តនេះ មាននរណាម្នាក់ ជួយជ្រោមជ្រែងដែរឬទេ? លោក សូ ឆានី បានថ្លែងទាំងអស់សំណើចថា «ក្រោយពីលោកបានបង្ហោះសារនេះហើយ គឺស្រាប់តែមានបុរសប្លែកមុខម្នាក់ ចង់ទិញឲ្យ ប៉ុន្តែទីបញ្ចប់ គឺមិនបានអ្វីបន្តិចនោះទេ ដោយសារតែលោក មិនធ្លាប់ស្គាល់គេ ណាមួយមិនចង់យករបស់ ដែលមិនមែនជាកម្លាំងញើសឈាមខ្លួនឯងផងនោះ ខណៈនេះ លោកទិញបានហើយ គឺលុយខ្លួនឯងទាំងស្រុង ដែលបានមកពីការសន្សំពីការថតរឿង និងខ្ចីមិត្តភក្តិបន្តិចបន្តួច»។
គួរជម្រាបថា លោក សូ ឆានី គឺជាតារាសម្តែងប្រុសមួយរូប ដែលចូលប្រឡូកខ្លួនក្នុងពិភពសិល្បៈដំបូង តាមរយៈធ្វើជាតារាម៉ូដែល ដោយស្នាដៃសម្តែងរបស់លោក មានទេពកោសល្យផងនោះ ទើបធ្វើឲ្យតារារូបនេះ មានទីផ្សារមកដល់បច្ចុប្បន្ន។ ជាមួយគ្នានេះ ក៏កំពុងតែ មានទីផ្សារសិល្បៈ ដោយមានភាពយន្ត ដល់ទៅ៣រឿង ក្នុងពេលតែមួយឯណោះ។ ជាចុងក្រោយ លោកសង្ឃឹមថា ទស្សនិកជននឹងបន្តគាំទ្ររបស់លោកតទៅទៀត ហើយលោកនឹងខិតខំសម្តែង ក្នុងការងារសិល្បៈមួយនេះ ឲ្យល្អបន្ថែមទៀត៕
