(បាត់ដំបង)៖ ​លោក អង្គ​ វង្ស​ វឌ្ឍានា​​ ប្រធានក្រុមការងារថ្នាក់ជាតិចុះជួយស្រុកមោងឫស្សី​ នៅថ្ងៃទី១៦ ខែមិថុនា ឆ្នាំ២០១៨នេះ ​បានអញ្ជើញជាអធិបតី​ ក្នុងពិធីបើកការដ្ឋានកែលម្អផ្លូវក្រាលកៅស៊ូ​ DBST ប្រវែង២,៦០០​ ម៉ែត្រ​ ឆ្លងកាត់ឃុំគារ​ និងឃុំរបស់មង្គលចំណាយថវិកា អស់ប្រមាណ៦០០លាន​រៀល។​

បើតាមលោក អង្គ វង្ស វឌ្ឍានា ផ្លូវនេះជាផ្លូវសេដ្ឋកិច្ចដ៏សំខាន់មួយរបស់ឃុំទាំងពីរនេះ​ ក៏ដូចជាស្រុកមោងឫស្សី​ទាំងមូល​ សម្រាប់ប្រជាពលរដ្ឋធ្វើដំណើរ​ និងដឹកកសិផលមកកាន់ទីផ្សារ​ និងផ្លូវជាតិ។​

បន្ទាប់មកទៀត នៅថ្ងៃដដែលនេះ លោក អង្គ វង្ស វឌ្ឍានា ក៏បានអញ្ជើញសម្ពោធដាក់ឲ្យប្រើប្រាស់ជាផ្លូវការ​ នូវអគារសាលាបឋមសិក្សា​​១ខ្នង​ មាន៣បន្ទប់​ នៅក្នុងវត្តអម្ពិលថ្កើង​ ក្នុងភូមិថ្មី​ ឃុំព្រៃតូច​ ស្រុកមោងឫស្សី​ ដែលបាន​ចំណាយថវិកាផ្ទាល់របស់លោក ប្រមាណ​​៤ម៉ឺនដុល្លារ។​

សាលាបឋមសិក្សានេះ​ ត្រូវបានកសាងទ្បើង​ឆ្លើយតប​សំណូមពររបស់​អាណាព្យាបាលសិស្ស​ លោកគ្រូ អ្នកគ្រូ​ និងអាជ្ញាធរមូលដ្ឋាន​ ក៏ដូចជាការចូលរូមចំណែក ក្នុងការ​លើកកម្ពស់វិស័យអប់រំ​ សិក្សាធិការ​ ស្របតាមគោលនយោបាយរបស់រាជរដ្ឋាភិបាល។

ជាមួយគ្នានេះ ប្រជាពលរដ្ឋក្នុងមូលដ្ឋានស្រុកមោងឫស្សី ខេត្តបាត់ដំបង បានបង្ហាញ និងសម្ដែងនូវការសប្បាយរីករាយយ៉ាងខ្លាំង ដោយនៅក្នុងថ្ងៃតែមួយ ពួកគាត់ទទួលបាននូវសមិទ្ធផលថ្មីចំនួន២ ពីថ្នាក់ដឹកនាំ៕​