(ស្វាយរៀង)៖ ឧបនាយករដ្ឋមន្ត្រី ម៉ែន សំអន សមាជិកគណៈអចិន្ត្រៃយ៍ គណៈកម្មារធិការកណ្តាល គណបក្សប្រជាជនកម្ពុជា និងជាប្រធានក្រុមការងារ ចុះជួយខេត្តស្វាយរៀង បានផ្តាំដល់ប្រជាពលរដ្ឋ និងក្រុមការងារថា ត្រូវរួមគ្នាថែរក្សាសុខសន្តិភាព និងការអភិវឌ្ឍ ការពារនូវសមិទ្ធផល ដែលបាន មកពីការខិតខំ របស់រាជរដ្ឋភិបាល ខិតខំដោះស្រាយនូវការលំបាក បម្រើសេវាសាធារណៈ ឲ្យបានល្អប្រសើរ ជូនប្រជាពលរដ្ឋនៅមូលដ្ឋាន។
លោកស្រីថ្លែងបែបនេះ ខណៈដឹកនាំក្រុមការងារ អញ្ជើញចូលរួមបុណ្យផ្កាសាមគ្គី ប្រមូលបច្ច័យសម្រាប់កសាងស្ពានឆ្លងកាត់ប្រឡាយកូនភ្លោះ ស្ថិតក្នុងភូមិចំបក់ថ្លឹង ឃុំគោកព្រីង ស្រុកស្វាយជ្រុំ ខេត្តស្វាយរៀង នៅព្រឹកថ្ងៃទី១៦ ខែមិថុនា ឆ្នាំ២០១៨នេះ ដែលមានប្រជាពលរដ្ឋចូលរួមជាង ៤០០នាក់ផងដែរ។
ក្នុងឱកាសនោះ លោកស្រី ក៏បាននាំនូវការផ្តាំផ្ញើសាកសួរសុខទុក្ខពី សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់ប្រជាពលរដ្ឋទាំងអស់។
លោកស្រីឧបនាយករដ្ឋមន្ត្រី បានបន្តទៀតថា ក្នុងរយៈពេល៣៩ឆ្នាំ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានដឹកនាំប្រទេស ការពារប្រទេស កសាងប្រទេសជាតិឡើងវិញពីលេខសូន្យ មកជាប្រទេសដែលមានការអភិវឌ្ឍលើគ្រប់វិស័យ ក្រោមនយោបាយ ឈ្នះ-ឈ្នះ បានធ្វើឲ្យអង្គការចាត់តាំងរបស់ ខ្មែក្រហមត្រូវរលំរលាយទាំងស្រុង។
ជាមួយគ្នានេះ ប្រធានក្រុមការងាររូបនេះ បានជំរុញក្រុមការងារខ្លួនថា ត្រូវបង្កើនចលនាទទូចដល់ប្រជាពលរដ្ឋ នៅក្នុងមូលដ្ឋាន ឲ្យទៅចូលរួមបោះឆ្នោត ជ្រើសតាំងតំណាងរាស្ត្រ អាណត្តិទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ នាពេលខាងមុខឲ្យបានគ្រប់គ្នាៗ និងបោះឆ្នោតជូនគណបក្សប្រជានកម្ពុជា ដែលមានលេខរៀងទី២០ គាំទ្របេក្ខភាពសម្តេចតេជោ ហ៊ុន សែន ជានាយករដ្ឋមន្រ្តី នៅអាណត្តិទី៦ និងអាណត្តិបន្តបន្ទាប់ទៀត ដើម្បីសុខសន្តិភាព កំណើនសេដ្ឋកិច្ច និងការអភិវឌ្ឍរបស់ប្រទេសជាតិ៕
