(បាងកក,ថៃ)៖ ក្នុងពេលអមដំណើរសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ចូលរួមកិច្ចប្រជុំនៅប្រទេសថៃនោះ នៅរសៀលថ្ងៃព្រហស្បតិ៍ ២កើត ខែបឋមាសាធ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៤ ខែមិថុនា ឆ្នាំ២០១៨ លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានទទួលជួបពិភាក្សាការងារជាមួយប្រតិភូធុរជនថៃ ដឹកនាំដោយលោក Chanitr Charnchainarong ប្រធានក្រុមប្រឹក្សាធុរកិច្ចថៃ-កម្ពុជា ដើម្បីពិភាក្សាស្វែងរកលទ្ធភាពជំរុញសក្តានុពលពាណិជ្ជកម្ម និងវិនិយោគនៅកម្ពុជា លើវិស័យសំខាន់ៗ ដូចជា កសិកម្ម កម្មន្តសាល និងកិច្ចសម្រួលពាណិជ្ជកម្មឆ្លងកាត់ព្រំដែន សំដៅពង្រឹង និងពង្រីកទំហំពាណិជ្ជកម្ម បង្កើនឱកាសការងារ និងបង្កើនខ្សែសង្វាក់ផលិតកម្ម ក្នុងបរិបទនៃយុទ្ធសាស្ត្រថៃបូកមួយ (Thailand-Plus-One Strategy)។

លោក Chanitr បានកោតសរសើរចំពោះកិច្ចខិតខំប្រឹងប្រែងក្នុងការសម្រួលនីតិវិធីធ្វើពាណិជ្ជកម្មរបស់ក្រសួងពាណិជ្ជកម្មកន្លងមក ដែលរួមចំណែកយ៉ាងសំខាន់ក្នុងការពង្រីកទំហំពាណិជ្ជកម្មរវាងប្រទេសទាំងពីរ។ លោក Chanitr ក៏បានជម្រាបជូន លោករដ្ឋមន្រ្តី អំពីចំណាប់អារម្មណ៍អំពីការបង្កើនវិនិយោគបន្ថែមទៀតក្នុងតំបន់សេដ្ឋកិច្ចពិសេសនៅខេត្តបន្ទាយមានជ័យ ព្រមទាំងស្នើឲ្យកម្ពុជាជួយជំរុញកិច្ចសហប្រតិបត្តិការឲ្យបានល្អបន្ថែមទៀត ក្នុងការធ្វើពាណិជ្ជកម្មឆ្លងកាត់ព្រំដែន ជាពិសេសតាមច្រកព្រំដែនខេត្តប៉ៃលិន។

ជាកិច្ចឆ្លើយតប លោករដ្ឋមន្រ្តី បានថ្លែងអំណរគុណដល់ធុរជនថៃដែលបានចាប់អារម្មណ៍ក្នុងការវិនិយោគនៅកម្ពុជា។ ជាមួយគ្នានេះ លោករដ្ឋមន្រ្តីក៏បានជម្រាបជូនភាគីថៃអំពីជំហរគាំទ្រ ផ្តល់កិច្ចសម្រួលក្នុងការធ្វើពាណិជ្ជកម្ម និងបង្កលក្ខណៈងាយស្រួលក្នុងការធ្វើពាណិជ្ជកម្ម ហើយជួយដោះស្រាយនូវកង្វល់នានាដែលវិនិយោគិនជួបប្រទះ។

លោករដ្ឋមន្រ្តី ក៏លើកទឹកចិត្តឲ្យវិនិយោគិនថៃពិចារណាយកកម្ពុជាជាមូលដ្ឋានក្នុងការផលិតផលិតផលនាំចេញទៅផ្គត់ផ្គង់ទីផ្សារក្នុងតំបន់ និងពិភពលោក ដោយសារកម្ពុជាមានសក្តានុពលកម្លាំងពលកម្មវ័យក្មេង និងទទួលបានភាពអនុគ្រោះពន្ធពីទីផ្សារធំៗលើពិភពលោក។

លោក Chanitr បានថ្លែងអំណរគុណចំពោះការគាំទ្ររបស់ក្រសួងពាណិជ្ជកម្មដល់ធុរជនថៃ និងសន្យា ខិតខំទាក់ទាញធុរជនថៃមកធ្វើពាណិជ្ជកម្ម និងវិនិយោគបន្ថែមទៀត និងបន្តសហការជាមួយក្រសួងពាណិជ្ជកម្មកម្ពុជាក្នុងកម្រិតខ្ពស់បន្ថែមទៀត៕