(កំពង់ធំ)៖ អតីតយុទ្ធជនដែលរស់នៅ ក្នុងភូមិសាស្ត្រខេត្តកំពង់ធំ នៅតំបន់ដាច់ស្រយាល ចំកាត់មាត់ញក តែងតែទទួលបាននូវការយកចិត្តទុកដាក់ ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ជាក់ស្តែងនៅរសៀលថ្ងៃទី១២ ខែមិថុនា ឆ្នាំ២០១៨ ឧត្តមសេនីយ៍ទោ សោម ស៊ុន ប្រធានសមាគម អតីតយុទ្ធជនកម្ពុជាខេត្តកំពង់ធំ តាមការណែនាំ និងចង្អុលបង្ហាញពីសំណាក់លោកឧត្តមនាយឧត្តមសេនីយ៍ គន់ គីម អគ្គលេខាធិការសមាគមអតីតយុទ្ធជនកម្ពុជា បានដឹកនាំសហការី ចុះទៅប្រគល់ខ្នងផ្ទះលើកទី៧៤ ដែលជាអំណោយ ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជនកម្ពុជា ផ្តល់ជូនអតីតយុទ្ធដែលមានជីវភាពខ្វះខាត លោក មាស ភារម្យ រស់នៅសំបួរ ឃុំពពក ស្រុកស្ទោង ខេត្តកំពង់ធំ ។
លោក មាស ភារម្យ ជាអតីតយុទ្ធជនអាយុ៥៩ឆ្នាំ មានប្រពន្ធឈ្មោះ ព្រាន ឡំ មានកូនចំនួន២ ធ្លាប់បំរើការងារនៅអង្គភាពយោធា មានឋានៈថ្នាក់ ព្រិន្ទបាលឯក បច្ចុប្បន្នមានជីវភាពខ្វះខាត ទើបបានទទួលការអាណិតអាសូរ ពីសំណាក់សមាគមអតីតយុទ្ធជន បានជួយសាង់សង់ផ្ទះជូន ដែលមានទំហំ ៤ម៉ែត្រ គុណ៦ម៉ែត្រ ប្រក់សង្ក័សី ក្រាលក្តា ខ្ពស់ផុតពីដី ដែលត្រូវបានចំណាយថវិកា ក្នុងការសាងសង់ អស់ទឹកប្រាក់ ៧.២៧៥.០០០រៀល នៅក្នុងពីធីប្រគល់ផ្ទះនេះ សមាគមន៍អតីតយុទ្ធជនខេត្ត បានឧបត្ថម្ភបន្ថែមនូវអង្ករ ៥០គីឡូក្រាម មីយើង២កេស មុង២ ទឹកត្រី ទឹកស៊ីអ៊ីវ២យួរ ថវិកា១៥,០០០០រៀល។
លោកឧត្តមសេនីយ៍ទោ សោម ស៊ុន បានមានប្រសាសន៍ថា ជានិច្ចកាល សមាគមអតីតយុទ្ធជនខេត្ត តែងតែចុះដល់លំនៅដ្ឋាន របស់អតីតយុទ្ធជន ដើម្បីសិក្សាស្វែងយល់ ពីជីវភាពរស់នៅរបស់អតីតយុទ្ធជន និងទទួលនូវសំណូមពរ និងដោះស្រាយជូនតាមលទ្ធភាព ដែលអាចធ្វើបានចំពោះមុខ តែចំពោះអតីតយុទ្ធជន ដែលមានដី អត់ផ្ទះ ឬមាន និងត្រូវសាងសង់ផ្ទះជូន ចំណែកអ្នកគ្មានដី គ្មានផ្ទះ សមាគមនិង រៀបចំដីសម្បទានសង្គមកិច្ច ដោយមានការឯកភាពពីសំណាក់ លោក សុខ លូ អភិបាលខេត្តកំពង់ធំ ប្រធានកិត្តិយសសមាគមអតីតយុទ្ធជនកម្ពុជាខេត្តកំពុងធំ។
លោក មាស ភារម្យ និងភរិយា រួមទាំងអាជ្ញាធរ ប្រជាពលរដ្ឋ បានសម្តែងនូវសេចក្តីត្រេកអរ ដែលបានទទួលផ្ទះថ្មីក្នុងថ្ងៃនេះ ដែលកន្លងមក មិននឹកស្មានថា និងទទួលបានផ្ទះនេះឡើយ ហើយក៏បានថ្លែងអំណរអគុណ សម្តេចតេជោហ៊ុន សែន នាយករដ្ឋមន្ត្រីនៃព្រះរាជាណចក្រកម្ពុជា និងសមាគមអតីតយុទ្ធជន កម្ពុជាខេត្ត ដែលបានជួយដល់គ្រួសាររបស់គាត់ និងសូមគាំទ្រសម្តេចតេជោ ហ៊ុនសែន ជានាយករដ្ឋមន្ត្រីគ្រប់ៗអាណត្តិបន្តទៀត៕
