(ត្បូងឃ្មុំ)៖ បុរសម្នាក់បានបង្ហោះវីដេអូ តាមបណ្ដាញសង្គម Facebook បង្កឲ្យមានការភ្ញាក់ផ្អើល ដោយរូបគេបានអះអាងថា បានទៅទិញភេសជ្ជៈ Oishi មួយដបមកផឹក ស្រាប់តែត្រូវរង្វាន់ រថយន្ដមួយគ្រឿង ប៉ុន្ដែរង្វាន់នោះមិនបានមកខ្លួនទេ ដោយត្រូវថៅកែខារ៉ាអូខេ «វិមានទ្រព្យ» ស៊ីដាច់គម្របដបដើម្បីយកទៅបើករង្វាន់។

បន្ទាប់ពីមានករណីនេះកើតឡើង នៅព្រឹកថ្ងៃទី១២ ខែមិថុនា ឆ្នាំ២០១៨នេះ ស្នងការនគរបាលខេត្តត្បូងឃ្មុំ លោកឧត្តមសេនីយ៍ទោ បែន រ័ត្ន បានអះអាងថា រឿងនេះគឺជារឿងពិត ហើយលោក​បានកោះហៅអ្នកពាក់ព័ន្ធទាំងអស់ក្នុងករណីនេះ ដើម្បីមកធ្វើការសួររកខុសត្រូវ និងបានស្នើទៅក្រុមហ៊ុន Oishi ឲ្យផ្អាកការផ្ដល់រង្វាន់លើករណីនេះ ជាបណ្ដោះអាសន្នសិន ដោយរង់ចាំការដោះស្រាយចប់សព្វគ្រប់។

​បើតាមលោកឧត្តមសេនីយ៍ស្នងការ ​រឿងនេះ ពាក់ព័ន្ធមនុស្ស៣នាក់ មានកម្មករ២នាក់ (ម្នាក់ពិការ) ផ្តើមចេញពីលុយធិបចំនួន៥ពាន់រៀល ហើយនាំគ្នាទៅទិញទឹក Oishi ១ដបហូប២នាក់ ស្រាប់តែត្រូវរង្វាន់ឡានមួយគ្រឿងតែម្ដង។

បុរសដែលបានបង្ហោះសារ បានរៀបរាប់ថា នៅពេលត្រូវរង្វាន់រូបគេហ៊ានរក្សាទុកខ្លួនឯងនោះទេ ពោលយកទៅផ្ញើនៅ​ថៅកែការ៉ាអូខេ «វិមានទ្រព្យ» ដើម្បីឲ្យជួយរក្សាទុកសម្រាប់បើករង្វាន់ ប៉ុន្ដែត្រូវថៅកែរូបនោះ ស៊ីដាច់យកទៅបើកដោយខ្លួនឯងវិញ។

លោកឧត្តមសេនីយ៍ទោ បែន រ័ត្ន បានឲ្យដឹងថា នៅពេលនេះ ​រង្វាន់​មិនទាន់បើកបាននៅឡើយទេ ហើយអ្នកទាំង៣ កំពុងបំពេញកំណត់ហេតុនៅអធិការដ្ឋាននគរបាលស្រុកមេមត់​។ ដោយឡែក សមត្ថកិច្ចជំនាញ បានធ្វើការទាក់ទ​ងទៅក្រុមហ៊ុន ដើម្បីផ្អាកផ្តល់រង្វាន់សិន រង់ចាំការដោះស្រាយបានចប់សព្វគ្រប់៕