(បន្ទាយមានជ័យ)៖ ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ប្រធានក្រុមការងារថ្នាក់ជាតិចុះមូលដ្ឋានខេត្តបន្ទាយមានជ័យ និងជាប្រធានក្រុមការងារថ្នាក់កណ្តាល ចុះជួយខេត្ត អមដំណើរដោយក្រុមការងារទាំងថ្នាក់ជាតិ ថ្នាក់ក្រោមជាតិ និងមូលដ្ឋាន នៅថ្ងៃទី១១ ខែមិថុនា ឆ្នាំ២០១៨ បានអញ្ជើញជាអធិបតីភាពក្នុងពិធីសំណេះសំណាលជាមួយ ប្រជាពលរដ្ឋ និងសម្ភោធដាក់ឲ្យប្រើប្រាស់ជាផ្លូវការ នូវអគារសិក្សា១ខ្នង មាន៥បន្ទប់ នៅសាលាបឋមសិក្សាកងវ៉ា ស្ថិតនៅក្នុងភូមិកងវ៉ា សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ដែលមានអ្នកចូលរួមចំនួនជាង៤០០០នាក់។
ក្នុងឱកាសនោះ នាយឧត្តមសេនីយ៍ កែ គឹមយ៉ាន បានមានមតិសំណេះសំណាល និងពាំនាំការផ្ដាំផ្ញើសួរសុខទុក្ខ ពីសំណាក់ថ្នាក់ដឹកនាំកំពូលរបស់ជាតិមាន សម្ដេចតេជោ ហ៊ុន សែន នាយករដ្ឋមន្រ្តី សម្ដេចពញាចក្រីហេង សំរិន ប្រធានរដ្ឋសភា, សម្តេចក្រឡាហោម ស ខេង, សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា។
ក្នុងឱកាសនោះ នាយឧត្តមសេនីយ៍ កែ គឹមយ៉ាន បានថ្លែងថា ពីមួយអាណត្តិទៅមួយអាណត្តិ រាជរដ្ឋាភិបាលដឹកនាំដោយសម្តេចតេជោ ហ៊ុន សែន បានដឹកនាំប្រទេសជាតិកាន់តែមានការអភិវឌ្ឍមិនឈប់ឈរ កង្វះខាតរបស់ប្រជាពលរដ្ឋត្រូវបានបំពេញបន្ថែមធ្វើយ៉ាងណា ឲ្យប្រជាពលរដ្ឋរស់នៅក្នុងវិបុលភាព វិបុលសុខ ក្នុងនោះការបណ្តុះបណ្តាលបណ្តាលកូនចៅជំនាន់ក្រោយដើម្បីបន្តវេនជាការងារអាទិភាពសម្តេចតេជោ ហ៊ុន សែន បានខិតខំកសាងនូវសាលារៀនគ្រប់កម្រិតដោយបង្ខិតមកជិតផ្ទះប្រជាលរដ្ឋនិងពង្រឹងគុណភាពអប់រំ ដូចនេះសូមបងប្អូនចាប់យកឱកាសមាសនេះ បញ្ជូនកូនចៅទៅសិក្សារៀនសូត្រដើម្បីអភិវឌ្ឍន៍គ្រួសារ និងសង្គមជាតិឲ្យបានរុងរឿងបន្តទៀត។
ក្នុងឱកាសនោះដែរ ជាថ្មីម្តងទៀត នាយឧត្តមសេនីយ៍ កែ គឹមយ៉ាន បានថ្លែងអំណរគុណដល់ប្រជាពលរដ្ឋមហាគ្រួសារអ្នកបន្ទាយមានជ័យ ទាំងអស់ដែលបានរួមគ្នាថែរក្សា សន្តិភាព និងសូមបន្តថែរក្សានូវសន្តិភាពនេះឲ្យបានគង់វង្សព្រោះថា គ្មានអ្វីរីកចម្រើនក្នុងភ្លើងសង្រ្គាមឡើយ និងសូមត្រៀមឯកសារទៅបោះឆ្នោតជូនគណបក្សប្រជាជន មានលេខលំដាប់រៀងទី២០ ក្នុងសន្លឹកឆ្នោតឲ្យបានគ្រប់គ្នានៅថ្ងៃទី២៩ ខែកក្កដា ឆ្នាំ២០១៨ ដើម្បីសម្តេចតេជោ ហ៊ុន សែន បន្តដឹកនាំអភិវឌ្ឍន៍នាវាកម្ពុជាឲ្យកាន់តែរីកចម្រើនឆាប់រហ័សបន្ថែមទៀត។
ជាវប្បធម៌ចែករំលែក និងគិតគូរពីសុខទុក្ខ នាយឧត្តមសេនីយ៍ កែ គឹមយ៉ាន បាននាំយកថវិកា និងអំណោយចែកជូនមាន៖
ទី១៖ ជូនប្រជាពលរដ្ឋចំនួន៤០០០នាក់ ម្នាក់ៗ ទទួលបានសារ៉ុង១
ទី២៖ ជូនមនុស្សចាស់ពីអាយុ៧០ឆ្នាំឡើង នៅសង្កាត់កំពង់ស្វាយចំនួន៤០០នាក់ ក្នុងម្នាក់ៗទទួលបាន៖ ថវិកា២ម៉ឺនរៀល, ក្រម៉ា១, សារ៉ុង១, បំពង់ទឹកក្ដៅ, មី, ពិល, ទឹកដោះគោ, ប្រេងកូឡា , ប្រេងខ្យល់, អំបិលអ៊ីយ៉ូត, តែ, កៅអៀក។ល។
ទី៣៖ ជូនសាលាសង្កាត់កំពង់ស្វាយ ថវិកា១លានរៀល
ទី៤៖ ជូនសិស្សានុសិស្សចំនួន១៤៤នាក់ ម្នាក់ៗទទួលបាន សៀវភៅ២ក្បាល ប៊ិច១ដើម និងថវិកា៣០០០រៀល
ទី៥៖ ជូនលោកគ្រូ អ្នកគ្រូ ម្នាក់ៗទទួលបានសារ៉ុង១ ថវិកា២ម៉ឺនរៀល
ទី៦៖ ជូនសាលាបឋមសិក្សាកងវ៉ា ថវិកា១លានរៀល
ទី៧៖ មណ្ឌលសុខភាពកំពង់ស្វាយ ថវិកា១លានរៀល
ទី៨៖ ជូនផ្លូវបេតុងប្រវ៉ែង២០០ម៉ែត្រ ចូលសាលាបឋមសិក្សាពង្រ
ទី៩៖ ជូនថវិកាចំនួន២៤០០ដុល្លារ ចូលរួមកសាងស្ពានបីប្រលោះ ឆ្លងកាត់ស្ទឹងសិរីសោភ័ណ ក្នុងសង្កាត់ភ្នៀត ក្រុងសិរីសោភ័ណ
ទី១០៖ ជូនអណ្តូងទឹក១ សម្រាប់ប្រើប្រាស់ក្នុងសាលាបឋមសិក្សាកងវ៉ា
ទី១១៖ ជូនឧបករណ៍បំពង់សម្លេង១ឈុត ទៅភូមិតារាងបាល់សង្កាត់កំពង់ស្វាយ ក្រុងសិរីសោភ័ណ៕
