(សៀមរាប)៖ លោក ឃឹម ប៊ុនសុង សមាជិកគណៈកម្មាធិការកណ្តាល និងជាប្រធានគណៈកម្មាធិការ នៃគណបក្សប្រជាជនកម្ពុជា ខេត្តសៀមរាប នៅថ្ងៃទី០៨ ខែមិថុនា ឆ្នាំ២០១៨នេះ បានអញ្ជើញជាអធិបតី ក្នុងពិធីបើកវគ្គបំប៉នគ្រូឧទ្ទេសសម្រាប់ការបោះឆ្នោត ជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ជូនដល់គ្រូឧទ្ទេស យុវជន នារី និងគ្រូឧទ្ទេសក្រុង ស្រុក ដែលមានសិក្ខាកាមចំនួន១២០នាក់។
ថ្លែងក្នុងឱកាសនោះ លោក ឃឹម ប៊ុនសុង បានលើកឡើងថា វគ្គបំប៉ននេះមានសារៈសំខាន់ ក្នុងការបង្កើននូវចំណេះដឹង ជូនដល់គ្រូឧទ្ទេស ដើម្បីយកទៅធ្វើការផ្សព្វផ្សាយបន្ត ដល់ភ្នាក់ងារគណបក្ស អ្នកសង្កេតការណ៍ ក្រុមការងារយុវជន យុវនារីឲ្យមានសមត្ថភាពគ្រប់គ្រាន់ ក្នុងការបំពេញភារកិច្ចរបស់ខ្លួន ក្នុងពេលការបោះឆ្នោត និងរាប់សន្លឹកឆ្នោត នៅតាមការិយាល័យទាំង១,៤៧៣ ការិយាល័យបោះឆ្នោត។
លោកក៏បានធ្វើការណែនាំមួយចំនួន ព្រមទាំងបានលើកនូវបញ្ហាមួយចំនួនកន្លងមក ដែលក្រុមភ្នាក់ងារបានអនុវត្ត និងបានលើកនូវបទពិសោធន៍ល្អៗ ដើម្បីជាទុនសម្រាប់គ្រូឧទេ្ទសទាំងអស់ សំខាន់សម្រាប់យុវជន យុវនារី ដែលជាគន្លឹះសំខាន់ក្នុងកិច្ចការនេះ ដែលអ្នកបន្តវេនពីរៀបច្បង និងត្រូវសិក្សារៀនសូត្រពីរៀបច្បងផងដែរ។
លោក ឃឹម ប៊ុនសុង បានគូសបញ្ជាក់ថា គ្រប់គណបក្សនយោបាយ និងធ្វើការប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៦នេះ ដោយនៅក្នុងខេត្តសៀមរាប មានគណបក្សចំនួន១៨បានឈរឈ្មោះបោះឆ្នោត។ ក្នុងនោះ មានគណបក្សមួយចំនួន បានកំពុងធ្វើសកម្មភាពនៅតាមមូលដ្ឋាន ដោយបានធ្វើការផ្សព្វផ្សាយពីគោលនយោបាយ របស់គណបក្សរបស់ខ្លួនទៀតផង។
ម៉្យាងទៀតក្រុមភ្នាក់ងារទាំងអស់ ត្រូវតាមនូវគ្រប់រូបភាព ដែលសកម្មភាពគណបក្សនយោបាយផ្សេងក្នុងមូលដ្ឋានខ្លួន និងត្រូវពង្រឹងខ្លួនឲ្យបានស័ក្តិសមជាមន្ត្រីល្អ ក្នុងការបង្ហាញឲ្យឃើញពីស្មារតីទទួលខុសត្រូវខ្ពស់ ព្រមទាំងត្រូវខិតខំស្វែងយល់ និងដោះស្រាយឲ្យមានប្រសិទ្ធភាព និងសំណូមពរការលំបាករបស់ប្រជាជន និងត្រូវធ្វើចលនាប្រជាពលរដ្ឋអនុវត្តនូវសិទ្ធិរបស់ខ្លួន ក្នុងការបំពេញតកព្វកិច្ចជាប្រជាពលរដ្ឋទៅបោះឆ្នោតឲ្យបានគ្រប់ៗគ្នា នាថ្ងៃទី២៩ ខែកក្កដា ឆ្នាំ២០១៨។
ក្នុងវគ្គបំប៉ននេះ លោក ឃឹម ប៊ុនសុង ក៏មានសង្ឃឹមជឿជាក់ថា គ្រូឧទ្ទេសនឹងខិតខំប្រមូលផ្តុំនូវខ្លឹមសារដ៏មានសារៈសំខាន់ៗ ដើម្បីធ្វើការបង្ហាត់បង្ហាញ និងសូមឲ្យសិក្ខាកាមទាំងអស់ខិតខំក្រេបយកនូវចំណេះដឹងពីគ្រូឧទ្ទេស ដើម្បីយកទៅធ្វើការផ្សព្វផ្សាយបន្តនៅក្នុងមូលដ្ឋានខ្លួនឲ្យទទួលបានលទ្ធផលជាផ្កែផ្កា ក្នុងការការពារថែរក្សាសន្តិភាព និងកសាងអនាគតរបស់ប្រទេសជាតិ៕
