(ភ្នំពេញ)៖ អគ្គិសនីកម្ពុជា (EDC) បានឲ្យដឹងថា នៅវេលាម៉ោង១៣៖១៦នាទី រសៀលថ្ងៃទី០៥ ខែមិថុនា ឆ្នាំ២០១៨ មានករណីដាច់ចរន្តអគ្គិសនី ពីអនុស្ថានីយទី៣ (GS3-J03) ដែលបណ្តាលឲ្យដាច់ចរន្តអគ្គិសនី នៅតំបន់មួយចំនួន ស្ថិតនៅក្នុងខណ្ឌ៧មករា និងខណ្ឌទួលគោក រាជធានីភ្នំពេញ។

អគ្គិសនីកម្ពុជា បានបន្ដទៀតថា តំបន់មួយចំនួន ដែលបានដាច់ចរន្តអគ្គិសនី ក្នុងខណ្ឌ៧មករា និងខណ្ឌទួលគោក រួមមាន ទី១៖ ផ្លូវ១៦៨​ ផ្លូ​វ១៥៨ និងផ្លូវ២១១​ សង្កាត់វាលវង់ និងសង្កាត់មិត្តភាព​ ខណ្ឌ៧មករា​ និងទី២៖ ផ្លូវ២០៦ និងផ្លូវ២១៥ សង្កាត់ផ្សារដើមគរ និងសង្កាត់បឹងកក់២ ខណ្ឌទួលគោក រាជធានី​ភ្នំពេញ​។

EDC បានបញ្ជាក់ថា ករណីដាច់ចរន្តអគ្គិសនី ពីអនុស្ថានីយទី៣ (GS3-J03) ខាងលើនេះ មូលហេតុដោយសារតែ ក្រុមហ៊ុន LNSK Construction Co.,Ltd ប្រើប្រាស់អេស្កាវ៉ាទ័រ កាយដីដាក់លូ ប៉ះកាបបណ្ដាញតង់ស្យុងមធ្យម (MV) ក្រោមដី។ ក្រុមការងារបច្ចេកទេស បានភ្ជាប់ចរន្តជូនអតិថិជន ឲ្យមានចរន្តអគ្គិសនីប្រើប្រាស់ឡើងវិញហើយ នៅវេលាម៉ោង ១៥៖២០នាទីរសៀល។

អគ្គិសនីកម្ពុជា សូមអំពាវនាវដល់ប្រជាពលរដ្ឋ ឲ្យមានការប្រុងប្រយ័ត្នខ្ពស់ នៅពេលបំពេញការងារ នៅជិតគន្លងខ្សែបណ្ដាញអគ្គិសនី ពីព្រោះអាចបណ្ដាលឲ្យមានការរអាក់រអួល ក្នុងការផ្គត់ផ្គង់ចរន្តអគ្គិសនី និងគ្រោះថ្នាក់ជាយថាហេតុ៕