(ត្បូងឃ្មុំ)៖ មន្ទីរបរិស្ថានខេត្តត្បូងឃ្មុំ នៅព្រឹកថ្ងៃទី០៥ ខែមិថុនា ឆ្នាំ២០១៨នេះ បានរៀបចំ ទិវាបរិស្ថានជាតិ និងបរិស្ថានពិភពលោក ០៥ មិថុនា ឆ្នាំ២០១៨ ក្រោមប្រធានបទ «រួមគ្នាដើម្បីលុបបំបាត់ការបំពុលប្លាស្ទិក» ដោយនាំគ្នាដាំកូនឈើ ផ្តល់ធុងសម្រាម និងសម្អាតបរិស្ថានក្នុងបរិវេណវិទ្យាល័យហ៊ុនសែនតំបែរ។
កម្មវិធីនេះមានការចូលរួមពី លោក គន់ សុភា អភិបាលរងខេត្តត្បូងឃ្មុំ និងលោក ហួរ ពិសិដ្ឋ ប្រធានមន្ទីរបរិស្ថានខេត្តត្បូងឃ្មុំ រួមជាមួយអាជ្ញាធរស្រុកតំបែរ មន្ទីរបរិស្ថានខេត្ត មន្ត្រីរាជការជុំវិញខេត្ត អាជីវករ លោកគ្រូអ្នកគ្រូ និងសិស្សានុសិស្សជាច្រើនកុះករ។
លោក ហួរ ពិសិដ្ឋ បានឲ្យដឹងថា ទិវាបរិស្ថានជាតិ និងបរិស្ថាបពិភពលោកនេះ បានឆ្លុះបញ្ចាំងពីឆន្ទៈរួម ដើម្បីកិច្ចគាំពារបរិស្ថាន និងភពផែនដីយើងទាំងអស់គ្នា ជាពិសេសការប្រារព្ធទិវារនេះឡើង ជារៀងរាល់ឆ្នាំ ក្នុងគោលបំណងផ្សព្វផ្សាយ និងបញ្ជ្រាបចំណេះដឹងអំពីភាពចាំបាច់ និងសារៈប្រយោជន៍នៃកិច្ចគាំពារបរិស្ថាន ការអភិរក្សជីវៈចម្រុះ និងការប្រើប្រាស់ធនធានធម្មជាតិ ឲ្យបានសមស្របសំដៅកែប្រែផ្នត់គំនិត និងឥរិយាបទមហាជន គ្រប់មជ្ឈដ្ឋាន ឲ្យទៅជាកម្លាំងចលករ ដើម្បីរួមចំណែកដល់ការលើកកម្ពស់ប្រសិទ្ធភាពការងារគ្រប់គ្រង ធនធានធម្មជាតិ និងបរិស្ថាន នៅលើភពផែនដី ស្រប់ទៅតាមទស្សនទាន «ការអភិវឌ្ឍដោយចីរភាព»។
លោកអភិបាលរងខេត្ត សំណូមពរដល់បងប្រជាពលរដ្ឋទាំងអស់ កុំបោះសំណល់ ឬថង់ប្លាស្ទិកចោលទៅក្នុងបរិស្ថាន ព្រោះសារធាតុគីមីក្នុងប្លាស្ទិកអាចបង្កឲ្យមានការបំពុលដល់គុណភាពដី គុណភាពទឹក និងមានគ្រោះថ្នាក់ដល់ប្រព័ន្ធអេកូឡូស៊ី និងជីវៈចម្រុះក្នុងទឹក ជាពិសេស កុំដុតថង់ប្លាស្ទីក ដែលធ្វើឲ្យប៉ះពាល់ស្រទាប់អូស្សូន និងបំពុលបរិយាកាស។
ជាមួយគ្នានេះ លោក គន់ សុភា បានលើកឡើងថា ទិវាបរិស្ថានជាតិ និងបរិស្ថានពិភពលោកនេះ ក៏ធ្វើឡើងក្នុងន័យ ដើម្បីជាការផ្លាស់ប្តូរឥរិយាបថ និងអាកប្បកិរិយារបស់មនុស្ស ក្នុងការប្រើប្រាស់ផលិតផលធ្វើពីប្លាស្ទីក គឺជារឿងចាំបាច់។ លោកបន្តថា ការបំពុល ដោយប្លាស្ទីកនឹងធ្វើឲ្យប៉ះពាល់ដល់អាយុជីវិតមនុស្ស សត្វ ជាពិសេសសំណល់ប្លាស្ទិកទាំងនេះ កំពុងតែគំរាមកំហែងយ៉ាងធ្ងន់ធ្ងរដល់ភពផែនដីរបស់យើង។
លោក គន់ សុភា ក៍បានជំរុញអាជ្ញាធរដែនដី រួមជាមួយអ្នកពាក់ព័ន្ធទាំងអស់ បំផុសចលនាមហាជន ឲ្យរៀបចំព្រឹត្តិការដ៍សំខាន់នេះ គ្រប់ទីតាំងនានា ដើម្បីបញ្ជ្រាបដល់ប្រជាពលរដ្ឋ ឲ្យចេះស្រលាញ់បរិស្ថាន និងស្នើរគ្រប់មជ្ឍដ្ឋានទាំងអស់ រួមគ្នាគិត រួមគ្នាធ្វើ រួមគ្នាបំបាត់ការបំពុលដោយប្លាស្ទិក ដើម្បីសុខភាពយើងទាំងអស់គ្នា៕
