(ភ្នំពេញ)៖ ការទៅផ្សារដោយទិញសាច់ឆៅ ដាក់ឡូកឡំលាយគ្នា ជាមួយបន្លែស្រស់ ក្នុងកន្ត្រកតែមួយ, ការប្រើប្រាស់ជ្រុញ និងកាំបិតតែមួយសម្រាប់ហាន់បន្លែស្រស់ និងសាច់ឆៅ ដែលនឹងត្រូវយកទៅចម្អិន, ការលាងជម្រះសាច់ និងបន្លែ ក្នុងចានដែក ឬបាសាំងតែមួយ ការទុកម្ហូបអាហារចោល រយៈពេលយូរ ដោយមិនបានយកទៅក្លាសេ ឬចម្អិនភ្លាមៗ ទម្លាប់ មិនល្អ ប្រចាំថ្ងៃរបៀបនេះ គួរតែមានការកែប្រែ។

នេះជាការលើកឡើងរបស់លោក ខៀវ បញ្ញាវឌ្ឍន៍ គ្រូបង្គោលសុវត្ថិភាពម្ហូបអាហារ មកពីអគ្គនាយកដ្ឋានកាំកុងត្រូល ដែលដឹកនាំសិក្ខាសាលា ស្តីពី «សុវត្ថិភាពម្ហូបអាហារ» រយៈពេល២ថ្ងៃ នៅសាលារៀន អន្តរទ្វីបអាមេរិកាំងសាខាទួលគោក និងសាខាចាក់អង្រែ ពីថ្ងៃទី០៥ ដល់ថ្ងៃទី០៦ ខែមិថុនា ឆ្នាំ២០១៨។

លោក ខៀវ បញ្ញាវឌ្ឍន៍ បានឲ្យដឹងថា ប្រជាជនកម្ពុជា ពិសេសស្ត្រីមេផ្ទះ យើងសុទ្ធតែបានយល់ច្បាស់អំពីគ្រោះថ្នាក់ ដែលបង្កឡើងដោយបាក់តេរីក្នុងម្ហូបអាហារ ក៏ប៉ុន្តែពួកគាត់តែងតែ មើលស្រាល និងធ្វេសប្រហែស ក្នុងការអនុវត្តន៍ពិសេសការយល់ខុសថា អាហារនឹងមានសុវត្ថិភាព បន្ទាប់ពីលាងសម្អាត។ ប៉ុន្តែពួកគាត់ភ្លេចគិតថា ការលាងជម្រះពិតមែនតែសម្អាត បន្លែស្រស់ បានមួយផ្នែកធំ តែពុំបានស្អាត១០០%ទេ ពិសេសការលាងដោយទឹកមិនស្អាត ឬទឹកមិនហូរ (ក្នុងចានដែកតែមួយ)។

លោកបានបញ្ជាក់ថា ការដែលយើងមិនបានញែកការលាង ការហាន់ឬចិញ្ច្រាំ ការទុកដាក់អាហារ ដែលយើងញ៉ាំស្រស់ និងអាហារដែលយើងចម្អិនឲ្យដាច់ពីគ្នា វាបង្កគ្រោះថ្នាក់ ខ្លាំងណាស់ដល់សុខភាព ព្រោះថា បាក់តេរីនឹងឆ្លងពីសាច់ ដែលយើងនឹងយកទៅចម្អិន ទៅតោងបន្លែដែលយើងញ៉ាំឆៅ តាមរយៈជ្រុញ កាំបិត ចានដែក ដែលយើងប្រើឡូកឡំគ្នា វានឹងបង្កឲ្យយើងមានបញ្ហា ដល់សុខភាពដោយមិនដឹងខ្លួន។

គ្រូបង្គោលសុវត្ថិភាពម្ហូបអាហារ មកពីអគ្គនាយកដ្ឋានកាំកុងត្រូល បានសង្កត់ធ្ងន់ថា «ការយល់ពីសុវត្ថិភាព ម្ហូបអាហារដូចជាការងាយណាស់ អ្នកណាក៏យល់ដឹងពីបញ្ហាងាយៗ ទាំងនេះដែរ... តែទំលាប់មិនល្អ ដែលមិនព្រមកែ គឺជាការលំបាក!»។

លោក ខៀវ បញ្ញាវឌ្ឍន៍ បានបញ្ជាក់បន្ថែមទៀតថា លោកតែងតែជំរុញ និងគាំទ្រឲ្យមានការលាងជម្រះបាក់តេរី ពីម្ហូបអាហារមុននឹងបរិភោគ ទោះក្នុងរបៀបណាក៏ដោយ ប៉ុន្តែលោក សុំឲ្យមានការបញ្ឈប់ការយល់ច្រឡំថា ការលាង ឬត្រាំសូលុយស្យុង (ល្បាយ) ប្រភេទណាមួយនោះ អាចសម្លាប់ និងជម្រះបាត់តេរី និងសារធាតុគីមី បាន១០០%នោះ។

លោកបន្ដអះអាងថា ប្រសិនបើបាក់តេរី និងសារធាតុគីមី អាចត្រូវបានកំចាត់ពីម្ហូបអាហារ នៅត្រឹមចង្ក្រានបាយ បាន១០០%មែននោះ នោះអ្នកវិទ្យាសាស្ត្រម្ហូបអាហារ និងប្រព័ន្ធ សុវត្ថិភាពម្ហូបអាហារ មិនតម្រូវឲ្យអាហារត្រូវតែមានសុវត្ថិភាព គ្រប់ខ្សែចង្វាក់ផលិតកម្ម ចាប់ពីកសិដ្ឋាន ដល់តុបរិភោគនោះទេ។

តាមវិទ្យាសាស្ត្រ បាក់តេរីសម្ងំមិនលូតលាស់ក្នុងសីតុណ្ហភាពក្រោម ០៥ អង្សាសេ និងចាប់ផ្តើមងាប់ (ទៅតាមប្រភេទបាក់តេរី) នៅសីតុណ្ហភាពលើសពី៦០អង្សាសេ។ ជាទូទៅបាក់តេរី (មិនទាំងអស់នោះទេ) រស់ក្នុងលក្ខខណ្ឌ៦យ៉ាងគឺ អុកស៊ីហ្សែន (O2) កម្រិត pH ទាប សកម្មភាពទឹក (aW) ខ្ពស់ ពេលវេលាវែង សីតុណ្ហភាពក្នុងលកខណ្ឌធម្មតា និងសារធាតុធ្វើ ឲ្យធំធាត់ (អាហារូបត្ថម្ភ)។

តួលេខដ៏គួរឲ្យភ្ញាក់ផ្អើលមួយ របស់អង្គការពាណិជ្ជកម្មពិភពលោក WTO (២០១៧) បង្ហាញថា មានអ្នកជម្ងឺជាង៥៥០លាននាក់ ក្នុងពិភពលោក មានជម្ងឺដែលបង្កដោយម្ហូបអាហារគ្មាន សុវត្ថិភាព និងជាង២៣ម៉ឺននាក់ បានស្លាប់ដោយសារករណីដូចគ្នានេះ។ ដោយឡែក នៅសហរដ្ឋអាមេរិក ក្នុងមួយឆ្នាំមានជម្ងឺកើតឡើង ដោយសារម្ហូបអាហារគ្មានសុវត្ថិភាពចំនួន៧៦ លានករណី ក្នុងនោះមានអ្នកជម្ងឺជាង៣ម៉ឺននាក់ ចូលមន្ទីរពេទ្យ និងជាង៥ពាន់នាក់បានស្លាប់។

ក្នុងប្រទេសអាស៊ាន មាន១៥០លានករណី ជាជម្ងឺដែលបង្កដោយម្ហូបអាហារមិនមានសុវត្ថិភាព និងក្នុងនោះ ជាង១៧ម៉ឺននាក់បានស្លាប់។ តួលេខនេះ ក៏បង្ហាញដែរថា កត្តាសំខាន់ ដែលបង្កភាពធ្ងន់ធ្ងរដល់សុខភាពគឺ កត្តាអតិសុខុមជីវសាស្ត្រ ដែលមានតួលេខរហូតដល់ ៧០%។

អគ្គនាយកដ្ឋានកាំកុងត្រូល បាននិងកំពុងយកចិត្តទុកដាក់ខ្លាំង ក្នុងការទប់ស្កាត់ការលបលួចនាំចូលម្ហូបអាហារ ដែលពុំមានសុវត្ថិភាពតាមមាត់ច្រកនានា បង្ក្រាបការចែកចាយអាហារគ្មាន សុវត្ថិភាពតាមទីផ្សារ និងអប់រំណែនាំអ្នកមានធុរកិច្ចម្ហូបអាហារ ទាំងអស់អំពីភាពទទួលខុសត្រូវចំពោះមុខច្បាប់ និងចំណេះដឹង ជាមូលដ្ឋានអំពីសុវត្ថិភាពម្ហូបអាហារ ហើយក៏បានទទូច ផងដែរ ឲ្យមានការចូលរួមពីអ្នកមានធុរកិច្ចម្ហូបអាហារទាំងនោះ កុំយកផលប្រយោជន៍សួនតួខ្លាំងពេក និងគិតពីសុខុមាលភាពសង្គមជាធំ៕