(ភ្នំពេញ)៖ បន្ទាប់ពីទទួលបានជោគជ័យ ក្នុងការដាក់បញ្ចាំងភាពយន្តភាគ ជាបន្តបន្ទាប់ ក្នុងស្ថានីយទូរទស្សន៍របស់ខ្លួនហើយនោះ ស្ថានីយទូរទស្សន៍ កងយោធពលខេមរភូមិន្ទ ប៉ុស្ដិ៍លេខ៥ បានសម្រេចចិត្តធ្វើពិធីក្រុងពាលីរឿងភាគថ្មីមួយទៀត មានចំណងជើងថា «មន្តស្នេហ៍ អនុសេនីយ៍» ដោយបានជ្រើសរើសយក តារាសម្ដែង ស្រីទឹកមុខស្រទន់មានមន្តស្នេហ៍ កញ្ញា យ៉ែម ស្រីពេជ្រ និងប្រុសសង្ហាលោក សេង រតនៈ ឲ្យសម្ដែងជាតួឯករួមគ្នា ជាលើកដំបូង។ ដោយឡែកភាពយន្តនេះ ត្រូវបានផលិតករបង្ហើបថា មានគោលដៅ ចង់បង្ហាញឲ្យមហាជន បានដឹងខ្លះៗពីសកម្មភាពរបស់កងកម្លាំង ប្រដាប់អាវុធ ក្នុងវិស័យយោធា ឲ្យមហាជនបានដឹងផងដែរ។
ពិធីក្រុងពាលីរឿងភាគថ្មី របស់ទូរទស្សន៍កងយោធពលខេមរភូមិន្ទ ប៉ុស្តិ៍លេខ៥ បានប្រារព្ធឡើងនៅព្រឹកថ្ងៃទី០៥ ខែមិថុនា ឆ្នាំ២០១៨នេះ នៅក្នុងបរិវេណសណ្ឋាគារ សូហ្វីតែល ភ្នំពេញ ភោគីត្រា ដោយមានវត្តមានថ្នាក់ដឹកនាំ នៃស្ថានីយទូរទស្សន៍ប៉ុស្ដិ៍លេខ៥, ផលិតករ, តារាសម្ដែងប្រុស-ស្រី និងក្រុមការងារថត ជាច្រើននាក់។
លោក Supachai Varapuchong ម្ចាស់ស្ថានីយទូរទស្សន៍ កងយោធពលខេមរភូមិន្ទ ប៉ុស្ដិ៍លេខ៥ បានថ្លែងឲ្យដឹងថា មូលហេតុដំបូង ដែលលោកជ្រើសរើស យកខ្សែភាពយន្ត រឿង«មន្តស្នេហ៍ អនុសេនីយ៍» ដែលនិយាយពីស្ថាប័នកងទ័ព យកមករៀបចំផលិត នៅស្ថានីយទូរទស្សន៍ប៉ុស្ដិ៍លេខ៥ ដោយសារតែលោកចង់ចូលរួមលើកស្ទួយ វិស័យយោធា ក៏ដូចជាជួយផ្សព្វផ្សាយវិស័យមួយនេះ ឲ្យកាន់តែទូលំទូលាយបន្ថែមទៀត ដើម្បីឲ្យមហាជន បានស្គាល់កាន់តែច្បាស់ ចំពោះសកម្មភាពទាំងឡាយ ដែលកើតមាន នៅក្នុងការងារមួយនេះ។
លោក Supachai Varapuchong បាននិយាយថា «ដោយសារតែមានវត្តមានសិល្បករ-សិល្បការិនី ជាច្រើនដួង បង្ហាញខ្លួន នៅក្នុងរឿងនេះ ដែលសុទ្ធតែមានឈ្មោះបោះសំឡេង មានបទពិសោធន៍ និងធ្លាប់មានស្នាដៃទទួលបានជោគជ័យ ដូច្នេះខ្ញុំសង្ឃឹមថា ខ្សែភាពយន្តខាងលើនេះ នឹងទទួលបានការគាំទ្រខ្លាំង ពីសំណាក់ទស្សនិកជន។ ម្យ៉ាងវិញទៀតទូរទស្សន៍ប៉ុស្ដិ៍លេខ៥ គឺជាទូរទស្សន៍មានឈ្មោះថា កងយោធពលខេមរភូមិន្ទ អ៊ីចឹងហើយបានជាយើងផលិតភាពយន្ត ដែលពាក់ព័ន្ធនឹងកងទ័ព ហើយក៏ចង់ជួយ លើកស្ទួយវិស័យយោធា ផងដែរ។ រឿងនេះ នៅពេលដែលយើងចាក់បញ្ចាំងទៅ ប្រជាពលរដ្ឋនឹងបានយល់អំពី វិធីសាស្រ្ដ ឬការហ្វឹតហាត់រៀនផ្សេងៗ លើវិស័យទ័ព ក៏ដូចជាការផ្ដល់ចំណេះដឹង ដល់ទស្សនិកជន ទៀតផង»។
ជាចុងក្រោយ លោកសង្ឃឹមថា ខ្សែភាពយន្តមួយនេះ នឹងទទួលបានជោគជ័យ ហើយសូមឲ្យក្រុមការងារទាំងអស់ ខិតខំប្រឹងប្រែង និងយកចិត្តទុកដាក់ចំពោះការសម្ដែង ទាំងអស់គ្នា ដើម្បឲ្យខ្សែភាពយន្តមួយនេះ កាន់តែដំណើរការទៅដោយល្អ និងរលូន។
គួរបញ្ជាក់ថា ខ្សែភាពយន្តរឿង «មន្តស្នេហ៍ អនុសេនីយ៍» មានការចូលរួមសម្ដែងដោយ កញ្ញា យ៉ែម ស្រីពេជ្រ, លោក សេង រតនៈ, អ្នកនាង កាតុ, លោក កា បញ្ញាសិទ្ធ, តារាជើងចាស់ លោក ហេង ណារី និង តារាសម្ដែងប្រុស-ស្រី ជាច្រើនរូបទៀត៕
