(កំពង់ចាម)៖ នាព្រឹកថ្ងៃទី០៣ ខែមិថុនា ឆ្នាំ២០១៨នេះ គណចលនាសាសនា, ការិយាល័យធម្មការ និងសាសនា ស្រុកបាធាយ ខេត្តកំពង់ចាម បានសហការ រៀបចំវេទិកា «ប្រយុទ្ធប្រឆាំង និងការប្រើប្រាស់គ្រឿងញៀនខុសច្បាប់» និងជួបសំណេះសំណាល ជាមួយមេដឹកនាំសាសនាទូទាំង ស្រុកបាធាយ ខេត្តកំពង់ចាម និងសិស្សានុសិស្ស សរុប២០០អង្គ/នាក់។

ពិធីនេះធ្វើឡើងក្រោមវត្តមានលោក សេង សុមុនី អនុរដ្ឋលេខាធិការក្រសួងធម្មការ និងសាសនា តំណាងលោកទេសរដ្ឋមន្ត្រី ហ៊ឹម ឆែម រដ្ឋមន្ត្រីក្រសួងធម្មការ និងសាសនា និងលោកស្រី មិន ចណ្ឌីណែត អនុរដ្ឋលេខាធិការ ក្រសួងធម្មការ និងសាសនា តំណាងអាជ្ញាធរដែនដី រួមទាំងកងកម្លាំងទាំងបីផ្នែកស្រុក រួមទាំងលោកគ្រូ-អ្នកគ្រូ សិស្សានុសិស្ស វិទ្យាល័យបាធាយផងដែរ។

ក្នុងឱកាសនោះ លោក សេង សុមុនី ក៏បានលើកពីសកម្មភាព រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តចតេជោ ហ៊ុន សែន នាយករដ្ឋមន្រ្តីនៃកម្ពុជា បានជំរុញឲ្យលុបបំបាត់ គ្រឿងញៀន ខុសច្បាប់នៅទូទាំងប្រទេស រួមទាំងសាសនាផងដែរ ដោយ​គោរព​លើ​គោលការណ៍​សំខាន់ៗ រួមមាន៖

១៖ សាសនាប្តេជ្ញារួមគ្នា អប់រំ ផ្សព្វផ្សាយ លុបបំបាត់គ្រឿងញៀន តាមរយៈ ការទេសនា
២៖ បន្តការអប់រំ និងចុះជួបដោយផ្ទាល់ ក្នុងសហគមន៍ ឪពុក ម្តាយ អាណាព្យាបាល ដែលនៅជិតបំផុត ដោយប្រើប្រាស់យន្តការ បំបាត់អំពើហិង្សា គោរពច្បាប់ចរាចរណ៍ បញ្ជៀសជំងឺអេដស៍ និងមេរោគអេដស៍
៣៖ លើក​កម្ពស់​​សិទ្ធិកុមារ
៤៖ ផ្តល់ក្តីស្រឡាញ់ដល់កុមារ
៥៖ គោលការគ្រឹស្ត កុមារជាទំពាំងស្នងឬស្សី
៦៖ រួមគ្នារក្សាសន្តិភាព នៅក្នុងសង្គម ជាមួយរាជរដ្ឋាភិបាល
៧៖ ប្តេជ្ញាទៅបោះឆ្នោតឲ្យបានគ្រប់ៗគ្នា និងបោះឆ្នោតជូនគណបក្ស ដែលបានអភិវឌ្ឍប្រទេស៕

សូមជម្រាបថា វេទិកា «ប្រយុទ្ធប្រឆាំង និងការប្រើប្រាស់ គ្រឿងញៀន ខុសច្បាប់» ដែលរៀបចំដោយ ការិយាល័យ ធម្មការ និងសាសនា ស្រុកស្ទឹងត្រង់ ខេត្តកំពង់ចាម ខាងលើនេះ បានប្រើពាក្យស្លោកថា «យើងទាំងអស់គ្នា រួមគ្នាបំបាត់គ្រឿងញៀន»៕