(កំពង់ឆ្នាំង)៖ លោក សេង សារឿន មេបញ្ជាការផ្នែកសឹករង ស្រុកសាមគ្គីមានជ័យ នៅព្រឹកថ្ងៃទី២ ខែមិថុនា ឆ្នាំ២០១៨នេះបានឲ្យដឹងថា កម្លាំងយោធាផ្នែកសឹករងស្រុកសាមគ្គីមានជ័យ ខេត្តកំពង់ឆ្នាំង បានចុះឃាត់គ្រឿងចក្រមួយចំនួន ខណៈពេលដែល កំពុងលួចចូលធ្វើសកម្មភាពឈូសឆាយដីបម្រុងទុក សម្រាប់អតីតគ្រួសារយុទ្ធជន។

សកម្មភាពចុះឃាត់គ្រឿងចក្រទាំងនេះ បានធ្វើឡើង កាលពីថ្ងៃទី២៧ ខែឧសភា ឆ្នាំ២០១៨កន្លងទៅ។

លោក សេង សារឿន បានប្រាប់ភ្នាក់ងារសារព័ត៌មាន Fresh News នៅខេត្តកំពង់ឆ្នាំងឲ្យដឹងថា គ្រឿងចក្រទាំងនោះ ជារបស់លោក ឱ ឫទ្ធី ដែលជាភ្នាក់ងារសុយោដីស្រុកសាមគ្គីមានជ័យ បានដឹកយកមកឈូសដីសម្បទាន អតីតយុទ្ធជនក្នុងឃុំស្វាយជុក ស្រុកសាមគ្គីមានជ័យ ខេត្តកំពង់ឆ្នាំង តាំងពីថ្ងៃទី២៦ ខែឧសភា ឆ្នាំ២០១៨ មកម្លេះ។

មេបញ្ជាការផ្នែកសឹករងស្រុកសាមគ្គីមានជ័យរូបនេះ បានឲ្យដឹងទៀតថា មកដល់ព្រឹកថ្ងៃទី២ ខែមិថុនា ឆ្នាំ២០១៨នេះ គ្រឿងចក្រទាំងនោះ កំពុងលាក់ទុកក្នុងព្រៃនៅឡើយ មិនព្រមដឹកចេញទៅណាឡើយ ហើយក្រុមគ្រឿងចក្រខាងលើ តែងតែលួចចូលធ្វើសកម្មឈួសឆាយដីបម្រុងទុក សម្រាប់អតីតគ្រួសារយុទ្ធជន រំលោភយកធ្វើកម្មសិទ្ធិផ្ទាល់ខ្លួន។

លោកបានបន្តថា ទង្វើរបស់លោក ឱ ឫទ្ធី ជាការបំពានទៅលើសេចក្ដីប្រកាសរបស់ អាជ្ញាធរខេត្តកំពង់ឆ្នាំង ព្រោះគ្រឿងចក្រទាំងនោះ នៅតែលាក់ទុកនៅក្នុងព្រៃ ក្បែរៗកន្លែងធ្វើសកម្មភាពឈូសឆាយនោះដដែល៕