(ព្រះសីហនុ​)៖​ ករណីប្រធានគណនេយ្យ នៅកាស៊ីណូ Queenco ក្នុងខេត្តព្រះសីហនុ លោក ថាន ដារិន បានជេរប្រមាថទៅលើបុគ្គលិករបស់ខ្លួនយ៉ាងចាស់ដៃ ដោយរហូតជេរដល់ម្តាយផងនោះ និងនាំឲ្យមានការរិះគន់យ៉ាងចាស់ដៃតាមបណ្តាញសង្គម Facebook ត្រូវបានដោះស្រាយបញ្ចប់ ក្រោមការសម្រួបសម្រួលពីស្នងការនគរបាលខេត្ត លោកឧត្តមសេនីយ៍ទោ ជួន ណារិន្ទ។ ការសម្របសម្រួលបញ្ច​ប់បញ្ហានេះ ក្រោយពេលដែលលោក ថាន ដារិន បានសុំទោសជាសាធារណៈដល់ស្រ្តីជាម្តាយ និងបុគ្គលិកក្រោមបង្គាប់របស់ខ្លួន នៅចំពោះមុខសមត្ថកិច្ច។

ថ្លែងប្រាប់អង្គភាពព័ត៌មាន Fresh News នៅរសៀលថ្ងៃទី២ ខែមិថុនា ឆ្នាំ២០១៨នេះ លោក​ឧត្ដមសេនីយ៍ទោ​ ជួន​ ណារិន​ បានបញ្ជាក់ថា បន្ទាប់ពីលោកបានមើលឃើញវីដេអូ​ ប្រធានគណនេយ្យ​កាស៊ីណូ​ ឃ្វីនកូន (Queenco) បានជេរម្ដាយបុគ្គលិករបស់ខ្លួនដោយប្រើពាក្យអសុរស​នោះ លោកឧត្ដមសេនីយ៍ បានបញ្ជាឲ្យស្នងការរងទទួលបន្ទុក​ព្រហ្មទណ្ឌ កោះហៅ លោក ថាន ដារិន និងបុគ្គលិក​ឈ្មោះ អ៊ឹង កែវសុវណ្ណ មកដោះស្រាយ​ដើម្បីបញ្ចប់រឿង។ ​

លោកឧត្ដមសេនីយ៍ទោ​ ជួន​ ណារិន​ បានបន្តទៀតថា​ ជាការដោះស្រាយបញ្ចប់ លោក​ ថាន​ ដារិន​ បានសុំទោស​ម្ដាយរបស់យុវជន អ៊ឹង កែវសុវណ្ណ ចំណែកយុវជនជាបុគ្គលិករូបនេះ ក៏បានសុំសុំទោសលោក​ ថាន ដារិន​ វិញដែរ​ដែលបានប្រព្រឹត្តកំហុសឆ្គងនៅក្នុងក្រុមហ៊ុន៕