(ភ្នំពេញ)៖ អង្គភាពស៊ីម៉ាក់បានទទួលជំនួយថវិកាចំនួន១.៦លានដុល្លារ ពីរដ្ឋាភិបាលអាមេរិក ដើម្បីធ្វើការបោសសម្អាតគ្រាប់បែកចង្កោម រយៈពេលមួយឆ្នាំលើផ្ទៃដី២,២០០ហិចតា នៅខេត្តភាគខាងកើតប្រទេសកម្ពុជា។

ជំនួយនេះត្រូវបានចុះហត្ថលេខានៅថ្ងៃទី៣១ ខែឧសភា ឆ្នាំ២០១៨នេះ ដោយលោក ហេង រតនា អគ្គនាយកស៊ីម៉ាក់ ជាមួយអង្គការ ​NPA ដែលគាំទ្រថវិកាដោយរដ្ឋាភិបាលសហរដ្ឋអាមេរិក ​តាមរយៈការិយាល័យកាត់បន្ថយអាវុធ នៃក្រសួងការបរទេស​អាមេរិក។​

បើតាមលោក ហេង រតនា គំរោងនេះមានថវិកាចំនួន១.៦លានដុល្លារមានរយៈពេល១២ខែ​ គិតចាប់ពីថ្ងៃទី០១​​ ខែមីនា ឆ្នាំ២០១៨ ដល់ថ្ងៃទី២៨​ ខែ​កុម្ភៈ ឆ្នាំ២០១៩ ដែលនេះជាឆ្នាំទី១ នៃរយៈពេល២ឆ្នាំ​។

អគ្គនាយកស៊ីម៉ាក់រូបនេះ បានគូសបញ្ជាក់ថា ជាមួយគំរោងនេះស៊ីម៉ាក់ នឹងពង្រាយកម្លាំងជិត២០០នាក់​ ដែលផ្តោតជាសំខាន់លើការងារស្រាវជ្រាវព័ត៌មាន ​និងបោសសំអាត សំណល់គ្រាប់បែកចង្កោម នៅបណ្តាខេត្តខាងកើតប្រទេសកម្ពុជា លើផ្ទៃដីគ្រាប់បែកចង្កោម ចំនួន២,២០០ហិកតា​ និងស្រាវជ្រាវព័ត៌មា​ននៅ៦៧៨ភូមិ៕