(កំពង់ឆ្នាំង)៖ នាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពាជាតិ និង​ជាតំណាង​សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្ត្រីក្រសួង​ការពារជាតិ និងជាប្រធានអាជ្ញាធរជាតិអាវុធគីមី នៅថ្ងៃទី៣១ ខែឧសភា ឆ្នាំ២០១៨នេះ អញ្ជើញសម្ពោធដាក់ឲ្យប្រើប្រាស់ជាផ្លូវការ ​ឃ្លាំងស្តុបសារធាតុគីមី បន្សល់ទុកកាលពី សម័យសង្រ្គាម និង​គិលានដ្ឋានព្យាបាលជំងឺ ដែលស្ថិតក្នុងស្រុកកំពង់ត្រឡាច ខេត្តកំពង់ឆ្នាំង។

ថ្លែងក្នុងឱកាសនោះ នាយឧត្តមសេនីយ៍ ម៉ឹង សំផន បានបញ្ជាក់ថា ​បន្ទាប់ពីមានហេតុការរីកសាយភាយសារធាតុគីមី ដែលបន្សល់ទុកដោយសារសង្គ្រាម នៅស្រុក​រមាសហែក ខេត្តស្វាយរៀង កាលពីពេលថ្មីៗកន្លងទៅនេះ ធ្វើឲ្យប៉ះពាល់ដល់ សុខភាពប្រជាពលរដ្ឋ រាជរដ្ឋាភិបាលកម្ពុជាក្រោមការយកចិត្តទុកដាក់ គិតគូរខ្ពស់ពីសម្តេចតេជោ ហ៊ុន សែន អាជ្ញាធរជាតិអាវុធគីមី ក្រសួងការពារជាតិ បានសាងសង់ឃ្លាំងស្តុបសារធាតុគីមីបណ្តោះអាសន្នមួយកន្លែង ស្ថិត​នៅក្នុងវិទ្យាស្ថានស្រាវជ្រាវពិសោធន៍សារធាតុគីមី ដើម្បីរៀបចំទុកដាក់នូវរាល់សារធាតុគីមី ដែលបានរកឃើញបន្សល់ទុក​ដោយសារសង្គ្រាម កាលពីទស្សវត្សទី៧០​។

តាមរយៈពិធីសម្ពោធនោះ ​នាយឧត្តមសេនីយ៍ ម៉ឹង សំផន ​បានអំពាវនាវដល់ អង្គការហាម ឃាត់អាវុធគីមី OPCW ឲ្យចូលរួមសហការជាមួយ អាជ្ញាធរជាតិអាវុធគីមី ដើម្បីធ្វើការស្រាវជ្រាវ រកសារធាតុគីមីដែលនៅសេសសល់ រកមិនទាន់ឃើញ យកមករក្សាទុកកុំឲ្យឆ្លងរាលដាល ប៉ះពាល់សុខភាពប្រជាពលរដ្ឋតទៅទៀត​។

នាយឧត្តមសេនីយ៍ ម៉ឹង សំផន បានសង្កត់ធ្ងន់ថា​ សង្គ្រាម បានសម្លាប់មនុស្ស បំផ្លាញហេដ្ឋារចនាសម្ព័ន្ធខ្ទេចខ្ទីគ្មានសល់ ដូចនេះគេមិន​អាច​យក​សន្តិភាព ទៅប្តូរ​ជាមួយសង្គ្រាមបានទេ​។ ក្នុងន័យនេះ នាយឧត្តមសេនីយ៍​បញ្ជាក់ថា ក្រោមការខិតខំដឹកនាំរបស់គណបក្សប្រជាជនកម្ពុជា បានធ្វើឲ្យប្រជាជនកម្ពុជា ទទួលបានសុខ​សន្តិភាព និង​គ្មានសង្គ្រាម ព្រមទាំង​បានកសាងហេដ្ឋារចនាសម្ព័ន្ធជាតិ កសាងធនធានមនុស្ស មានការរីកចម្រើន មានការអភិវឌ្ឍន៍លើគ្រប់វិស័យ និងទទួលបានសន្តិភាព សម្រាប់ការរស់នៅរបស់ប្រជាពលរដ្ឋយ៉ាងល្អប្រសើរ​។

ឆ្លៀតក្នុងឱកាសនោះ នាយឧត្តមសេនីយ៍ បាន​អំពាវនាវ​ឲ្យ​នាយទាហាន នាយទាហានរង​ ពលទាហាន និង​​គ្រួសារកងទ័ព ត្រូវ​ត្រៀមខ្លួន​ដើម្បីនាំគ្នាទៅបោះឆ្នោតជូនគណបក្សប្រជាជន ដែលមានលេខរៀងទី​២០ នៅថ្ងៃទី​២៩ ខែ​កក្កដា ឆ្នាំ​២០១៨​ខាងមុខនេះ​ឲ្យបានគ្រប់ៗគ្នា ដើម្បីគាំទ្រ​សម្ដេចតេជោ ហ៊ុន សែន ធ្វើជានាយករដ្ឋមន្ត្រីក្នុងអាណត្តិថ្មី និង​អាណត្តិក្រោយៗ ជាបន្តបន្ទាប់ទៅមុខទៀត៕