(ភ្នំពេញ)៖ ប្រជាពលរដ្ឋភូមិសំបូរ សង្កាត់ដង្កោ ខណ្ឌដង្កោ នៅតែបន្ដប្ដេជ្ញាចិត្តថា ពួកគាត់នឹងទៅចូលរួមបោះឆ្នោតជ្រើសតាំងតំណាងរាស្ដ្រ នីតិកាលទី៦ ខាងមុខនេះគ្រប់ៗគ្នា ព្រោះពួកគាត់ស្រលាញ់សន្ដិភាព និងការអភិវឌ្ឍន៍ ហើយពួកគាត់ថា ដើម្បីរក្សាសន្ដិភាព និងការអភិវឌ្ឍន៍ មានតែបោះឆ្នោតជូនគណបក្សប្រជាជនកម្ពុជាតែប៉ុណ្ណោះ។

ការប្រកាសជាថ្មីនេះ របស់ប្រជាពលរដ្ឋត្រូវបានធ្វើឡើង នៅព្រឹកថ្ងៃទី​២៩ ខែឧសភា ឆ្នាំ២០១៨នេះ ក្នុងឱកាស​លោក នុត ពុធដារ៉ា អភិបាលខណ្ឌដង្កោ និងមន្ត្រីរាជការខណ្ឌ សង្កាត់ភូមិ បានចូលរួមបើកការដ្ឋានដាក់ប្រព័ន្ធលូ០១ខ្សែ ប្រវែង​២៧៥ម៉ែត្រ មុខកាត់​០,៨ម៉ែត្រ នៅភូមិសំបួរ សង្កាត់ដង្កោ។​

ថ្លែងក្នុងឱកាសនោះ លោកអភិបាល បានផ្តាំផ្ញើការសាកសួរសុខទុក្ខពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់បងប្អូនប្រជាពលរដ្ឋទាំងអស់ ដែលជានិច្ចកាលសម្តេចទាំងទ្វេ​តែងបានគិតគូរពីការលំបាក បញ្ហា និងតម្រូវការនានារបស់បងប្អូននៅមូលដ្ឋាន។​

លោកក៏បានលើកឡើង អំពីការអភិវឌ្ឍន៍រីកចម្រើនឥតឈប់ឈរ របស់ប្រទេសជាតិពីមួយថ្ងៃ ទៅមួយថ្ងៃ ក្រោមការដឹកនាំ​របស់សម្តេច​តេជោ ហ៊ុន សែន នាយករដ្ឋមន្ត្រី​នៃ​កម្ពុជា ដែលបានដឹកនាំប្រទេសឆ្លងកាត់បញ្ហាលំបាកនានា ឲ្យក្លាយជាប្រទេសមានការរីកចម្រើន ប្រជាពលរដ្ឋមានជីវភាពធូរធារ ក្រោមដំបូលសន្តិភាព។​

សូមជម្រាបថា ប្រព័ន្ធលូ០១ខ្សែនេះ នឹងជួយសម្រួលដល់ការលំបាករបស់បងប្អូនក្នុងមូលដ្ឋាន ជាពិសេសនៅក្នុងរដូវវស្សាខាងមុខនេះផងដែរ ដើម្បីរំដោះទឹក បញ្ជៀសការលិចលង់ផងដែរ៕