(ភ្នំពេញ)៖ ក្រុមហ៊ុន ឈីវ ទីម៉ិចគ្រុប ជូនដំណឹងមកឈ្មោះ លក គីម និងប្តីឈ្មោះ មួន មិថុនា ឲ្យចូលខ្លួនមកជម្រះបញ្ជី ក្រោយពេលពីរនាក់ប្តីប្រពន្ធផ្សំគំនិតគ្នា លួចយកលុយក្រុមហ៊ុនអស់៥០០,០០០ដុល្លារ ហើយរត់គេចខ្លួនកាលពីថ្ងៃទី១៤-០៥-២០១៨។
ក្រុមហ៊ុន ឈីវ ទីម៉ិចគ្រុប បានឲ្យដឹងថា លោក មួន មិថុនា និងលោកស្រី លក គីម ជាប្តីប្រពន្ធ និងអតីតជាបុគ្គលិកក្រុមហ៊ុន ឈីវ ទីម៉ិចគ្រុប ដែលមានតួនាទីជាប្រធានរដ្ឋបាល និងអ្នកកាន់លុយកាក់ក្រុមហ៊ុន បានលួចយកប្រាក់ក្រុមហ៊ុនចំនួន៥០០,០០០ដុល្លារ (ប្រាំរយពាន់ដុល្លា) និងបញ្ជីស្នាមមួយចំនួនកាលពីថ្ងៃទី១៤-០៥-២០១៨ ហើយបានរត់គេចខ្លួនរហូតមកដល់សព្វថ្ងៃ។
ក្រុមហ៊ុន ឈីវ ទី ម៉ិចគ្រុប មានការខកចិត្តយ៉ាងខ្លាំងជាមួយលោក ហឿង ពន្លក រស់នៅលើកោះឧកញ៉ាតី ត្រូវជាឪពុករបស់ឈ្មោះ លក គីម ដែលគ្មានការទទួលខុសត្រូវ និងសហការជាមួយក្រុមហ៊ុនក្នុងការស្វែងរកឈ្មោះ លក គីម ដែលត្រូវជាកូន និងកូនប្រសាររស់ខ្លួន។ ព្រោះថាកាលពីជាងដប់ឆ្នាំមុន លោក លឿង ពន្លក បានយកកូនឈ្មោះ លក គីម មកផ្ញើឲ្យធ្វើការនៅក្រុមហ៊ុន ឈីវ ទីម៉ិចគ្រុប ដល់ពេលកូនលួចលុយក្រុមហ៊ុន បែរជាលោក ហឿង ពន្លក បដិសេធមិនសហការជួយស្វែងរក និងបដិសេធទទួលយកលិខិតជូន ដំណឹងរបស់ក្រុមហ៊ុនទុកឲ្យឈ្មោះ លក គីម និង ឈ្មោះ មួន មិថុនា ចូលខ្លួនមកដោះស្រាយ និងជម្រះបញ្ជីជាមួយក្រុមហ៊ុន។
ហេតុដូចនេះក្រុមហ៊ុនឈីវទីម៉ិចគ្រុប សូមជូនដំណឹងជាសាធារណៈដល់ឈ្មោះ លក គីម និងឈ្មោះ មួន មិថុនា ឲ្យចូលខ្លួនមកជម្រះបញ្ជី និងសងប្រាក់មកក្រុមហ៊ុនវិញ ឲ្យបានមុនថ្ងៃទី៣០-០៥-២០១៨ ជាកំហិត បើមិនចូលខ្លួនតាមថ្ងៃកំណត់ទេ ក្រុមហ៊ុននិងចំណាត់ការតាមច្បាប់៕
