(ភ្នំពេញ)៖ រដូវវស្សាចូលមកដល់ បណ្តាលឲ្យមានបាតុភូតគ្រោះធម្មជាតិនានា បានកើតឡើងជាបន្តបន្ទាប់ដូចជារន្ទះបាញ់ ខ្យល់កន្ត្រាក់ ទឹកជំនន់ ដែលកំពុងតែគំរាមកំហែង ផ្ទះសម្បែង ក៏ដូចជាអាយុជីវិតប្រជាពលរដ្ឋ និងសត្វពាហនៈនៅទូទាំងប្រទេសកម្ពុជា។

ជាក់ស្តែងភ្លៀងលាយឡំជាមួយខ្យល់កន្ត្រាក់ បានវាយប្រហារមកលើឃុំចំនួន០២ នៃស្រុកបាធាយ ខេត្តកំពង់ចាម នៅយប់ថ្ងៃទី២៦ ខែឧសភា ឆ្នាំ២០១៨ គឺឃុំសណ្តែក និងឃុំត្រប់ បណ្តាលឲ្យផ្ទះប្រជាពលរដ្ឋ ចំនួន៤៥១ខ្នង រងការខូចខាតយ៉ាងដំណំ និងរបួសមនុស្សធ្ងន់ និងស្រាល ចំនួន០២នាក់។

ដោយឡែក ផ្ទះប្រជាពលរដ្ឋ ចំនួន៦៨ខ្នងទៀត​ នៅឃុំដូនកឹង ស្រុកកំចាយមារ ខេត្តព្រៃវែង​ ក៏បានរងការខូចខាតផងដែរ​ ដោយសារឥទ្ធិពលនៃបាតុភូតខ្យល់កន្ត្រាក់ ដែលបានកើតឡើងនៅល្ងាចថ្ងៃទី២៦ ខែឧសភា ឆ្នាំ២០១៨ផងដែរ។

សូមជម្រាបថា ដើមរដូវវស្សាឆ្នាំនេះ គិតត្រឹមថ្ងៃទី២០ ខែឧសភា ឆ្នាំ២០១៨ គ្រោះធម្មជាតិ ភ្លៀងលាយខ្យល់កន្ត្រាក់ ធ្វើឲ្យរលំ និងខូចខាតផ្ទះប្រជាពលរដ្ឋធ្ងន់ធ្ងរចំនួន៨០៦ខ្នង ខណៈពលរដ្ឋ១៧នាក់ បានស្លាប់ និងរបួស ព្រមទាំងមានរន្ទះបាញ់ បណ្តាលឲ្យបាត់បង់ជីវិតមនុស្សចំនួន៣៣នាក់ និងងាប់គោ-ក្របីចំនួន៤០ក្បាល។ នេះបើតាមលោក កែវ វី អ្នកនាំពាក្យគណៈកម្មការជាតិ គ្រប់គ្រងគ្រោះមហន្តរាយ បានបញ្ជាក់អង្គភាព Fresh News នៅរសៀលទី២១ ខែឧសភា ឆ្នាំ២០១៨។

ចំពោះគ្រោះទឹកជំនន់វិញ លោក កែវ វី បានបញ្ជាក់ថា មានផលប៉ះពាល់ខ្លាំងនៅស្រុកមង្គលបូរី ខេត្តបន្ទាយមានជ័យ មានរហូតដល់៧០០ហិកតា ដែលបណ្តាលមកពីទឹកភ្លៀង។

លោកបន្តថា ខាងអាជ្ញាធរមូលដ្ឋាន និងមន្ត្រីជំនាញកំពុងតែស្វែងរកពូជស្រូវ ដើម្បីចែកជូនប្រជាពលរដ្ឋរងគ្រោះ និងបង្វែរទឹកជំនន់ទាំងនោះ ដើម្បីទៅកន្លែងណាដែលអាចស្រកលឿន ឬក៏បង្វែរទៅកន្លែងប្រព័ន្ធធារាសាស្ត្រតូចធំជាដើម៕