(ភ្នំពេញ)៖ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៅព្រឹកថ្ងៃទី២៥ ខែឧសភា ឆ្នាំ២០១៨នេះ បានអញ្ជើញទស្សនកិច្ចរោងចក្រម៉ូតូ ហុង ដា ស្ថិតនៅតាមផ្លូវវេងស្រេង ភូមិត្រពាំងថ្នឹង សង្កាត់ចោមចៅ ខណ្ឌពោធិសែនជ័យ។
សម្តេច សាយ ឈុំ បានសម្តែងនូវសេចក្តីរីករាយឥតឧបមា ដែលបានមកទស្សនាក្រុមហ៊ុន អិន ស៊ី អិច ជារោងចក្រតម្លើងម៉ូតូហុង ដា នៅកម្ពុជា និងក្រោយស្តាប់បទបង្ហាញរបស់ក្រុមហ៊ុននេះ សម្ដេចបានវាយតម្លៃខ្ពស់ ចំពោះការវិនិយោគរបស់ក្រុមហ៊ុន ដែលមានកម្រិតកើនឡើងជាលំដាប់ ឆ្លើយតបបានយ៉ាងស័ក្តិសមទៅនឹងកម្មវិធីនយោបាយ ស្របតាមយុទ្ធសាស្ត្រចតុកោណរាជរដ្ឋាភិបាល ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា។
បើតាមសម្ដេចប្រធានព្រឹទ្ធភា សមិទ្ធផលដែលក្រុមហ៊ុនសម្រេចបាន គឺបានរួមចំណែកយ៉ាងសំខាន់ ដល់ការអភិវឌ្ឍកម្ពុជា ផ្តល់ការងារដល់ប្រជាជន ពិសេសយុវជនកម្ពុជា រួមចំណែកលើកកំពស់ជីវភាព កាត់បន្ថយភាពក្រីក្ររបស់ប្រជាជនកម្ពុជា។
ក្រោយឆ្លងតាមការទស្សនានូវសកម្មភាពជាក់ស្តែងនៅរោងចក្រ សម្ដេច មានការរំភើបរីករាយណាស់ ដែលបានឃើញសង្វាក់ផលិតកម្ម បំពាក់ដោយបច្ចេកវិទ្យាទំនើប ដែលមានសមត្ថភាពផលិតម៉ូតូបាន១,២០០គ្រឿងក្នុងមួយថ្ងៃ ហើយសម្ដេចសប្បាយរីករាយ ពេលឃើញកម្មករ កម្មការិនី ដែលទទួលបាននូវចំណេះដឹង ចំណេះធ្វើ ពីបច្ចេកវិទ្យាថ្មី ទំនើប ហើយបំពេញភារកិច្ចដោយសប្បាយរីករាយ ស្វាហាប់ ប្រកបដោយប្រសិទ្ធភាព និងការទទួលខុសត្រូវ។
សម្ដេចបានវាយតម្លៃខ្ពស់ ដែលក្រុមហ៊ុនបានផលិតគ្រឿងបំណែកម៉ូតូ ចំនួន១០ភាគរយ នៃចំនួនដែលបាននាំចូលពីមុន ហើយបានប្រើប្រាស់កម្មករកម្ពុជារហូត ដល់៩៩ភាគរយ ដែលក្រុមហ៊ុនបានផ្តល់តម្លៃពលកម្មដល់កម្មករ កម្មការិនី យ៉ាងសមរម្យទៅតាមគោលនយោបាយរបស់រាជរដ្ឋាភិបាល និងជាក្រុមហ៊ុនគំរូ ក្នុងការបង់ពន្ធជូនរដ្ឋ ខណៈក្រុមហ៊ុនបានពង្រីកសាខារហូតដល់ ១៣៤សាខានៅទូទាំងប្រទស និងមានបុគ្គលិកកម្មករប្រមាណ ជាង១,០០០នាក់។
សូមជម្រាបថា លោកបណ្ឌិត ខាំ ឆៃ កៀត ស្រ៊ីថាណា ប្រធានក្រុមប្រឹក្សាភិបាលក្រុមហ៊ុន អិន ស៊ី អិច បានជំរាបជូនប្រតិភូអំពីប្រវត្តិក្រុមហ៊ុន អ៊ិន ស៊ី អិច ដែលជាក្រុមហ៊ុនតែមួយគត់ ទទួលអាជ្ញាប័ណ្ណនាំចូលផលិត និងចែកចាយផលិតផលម៉ូតូម៉ាកហុងដា តាំងពីឆ្នាំ១៩៩២ ជាលក្ខណៈខ្នាតតូច។ នៅឆ្នាំ១៩៩៩ បន្ទាប់ពីទទួលបានការអនុញ្ញាត ពីរាជរដ្ឋាភិបាល និងផ្អែកតាមតម្រូវការទីផ្សារ ក្រុមហ៊ុន អ៊ិន ស៊ី អិច បានអនុវត្តជំហានដំបូង ដោយបង្កើតរោងចក្រខ្នាតតូចមួយ នៅតាមបណ្តោយមហាវិថីកម្ពុជាក្រោម ដោយបរិមាណផលិតក្នុងមួយថ្ងៃបានប្រមាណ៥០គ្រឿង។
ផ្អែកលើកត្តាសន្តិភាព និងមានការគាំទ្រពីអតិថិជនកាន់តែច្រើន ក្រុមហ៊ុន អ៊ិន ស៊ី អិច បានបង្កើតរោងចក្រខ្នាតធំឡើង ស្ថិតតាមបណ្តោយផ្លូវវេងស្រេង ក្នុងភូមិត្រពាំងថ្នឹង សង្កាត់ចោមចៅ ខណ្ឌពោធិសែនជ័យ រាជធានីភ្នំពេញ។ មកទល់ពេលនេះ ក្រុមហ៊ុនបានដំណើរការអាជីវកម្មរបស់ខ្លួន២៦ឆ្នាំហើយ ដោយបានប្រែក្លាយជាក្រុមហ៊ុន មានរោងចក្រតំឡើង និងផលិតគ្រឿងបំណែកម៉ូតូធំជាងគេនៅកម្ពុជា ក្នុងនោះបរិមាណផលិតប្រចាំថ្ងៃ ចំនួនប្រមាណ១,២០០គ្រឿង៕
