(ភ្នំពេញ)៖ មានករណីភ្ញាក់ផ្អើលមួយកើតឡើង បន្ទាប់ពីមានរថយន្តស៊េរីទំនើប មួយគ្រឿង ម៉ាក Bentley បានបើកឡើងទ្រូងផ្លូវទាំងកណ្តាលថ្ងៃត្រង់ ប៉ុន្តែមិនបណ្តាលឲ្យនរណាម្នាក់រងរបួសនោះទេ។
ហេតុការណ៍គ្រោះថ្នាក់ចរាចរណ៍នេះ បានកើឡើងនៅថ្ងៃទី២៤ ខែឧសភា ឆ្នាំ២០១៨នេះ ដែលស្ថិតនៅតាមបណ្តោយផ្លូវ6R សង្កាត់ស្រះចក ខណ្ឌដូនពេញ រាជធានីភ្នំពេញ។
តាមប្រភពព័ត៌មានពីកន្លែងកើតហេតុ បានឲ្យដឹងថា មុនកើតហេតុគេបានឃើញរថយន្តស៊េរីទំនើប មួយគ្រឿង បានបើកបរដោយបុរសម្នាក់ ដោយនោះមានអ្នកជិះក្នុងរថយន្តចំនួន២នាក់ បានធ្វើដំណើរពីកើតមកលិច ខណៈពេលធ្វើដំណើរមកដល់ចំណុចផ្លូវកោងខាងលើ ស្រាប់តែរថយន្តនេះ បានជ្រុលចង្កូតឡើងលើទ្រូងផ្លូវ បណ្តាលឲ្យរថយន្តខាងលើរងការខូចខាតផ្នែកខាងមុខ ចំហៀងខាងឆ្វេង។ ក្រោយពេលកើតហេតុ គេបានឃើញម្ចាស់រថយន្តខាងលើ ឡើងជិះរថយន្តមួយគ្រឿងទៀត ចេញពីកន្លែងកើតហេតុ ដោយទុកតែរថយន្តខាងលើនៅទីនោះ។
ក្រោយមកក៏បានឃើញភាគីខាងរថយន្តស៊េរីទំនើបចុះមកដល់ និងបានចរចារចេញថ្លៃខូចខាតជូនទៅអាជ្ញាធរ ដើម្បីបញ្ចប់រឿងគ្រោះថ្នាក់ចរាចរណ៍នេះ។ ចំណែកឯរថយន្តខាងលើ ត្រូវបានដឹកយកទៅជួសជុលដោយខ្លួនឯង៕
