(ភ្នំពេញ)៖ ក្នុងដំណើរទស្សនកិច្ចឆ្ពោះទៅកាន់ប្រទេសម៉ាឡេស៊ី ដើម្បីចុះជួប​សាកសួរសុខទុក្ខ និង​នាំពីវឌ្ឍនភាព​របស់កម្ពុជាជម្រាបដល់ពលរដ្ឋខ្មែរ ដែលនៅទីនោះ សម្តេច​តេជោ ហ៊ុន សែន នាយករដ្ឋមន្រ្តីនៃ​កម្ពុជា បានឯកភាពជាគោលការណ៍ ជូន​លោកឧកញ៉ា អូស្មាន ហាស្សាន់ រដ្ឋមន្រ្តីប្រតិភូអមនាយករដ្ឋមន្រ្តី ដើម្បីបន្តដឹកនាំគណៈប្រតិភូកម្ពុជា ចេញដំណើរទៅកាន់គោលដៅទី៧ នៅរដ្ឋ Kelantan ដែលនៅចម្ងាយជាង ៤៥០គីឡូម៉ែត្រពីរដ្ឋធានី គូឡាឡាំពួរ​។​

គួរបញ្ជាក់ថា នេះជាលើកទី៤ ដែលគណៈប្រតិភូ​អញ្ជើញជួបសំណេះសំណាលជាមួយបងប្អូនខ្មែរឥស្លាម ដែលរសើនៅម៉ាឡេស៊ី ខណៈដែលលើកទី១ ធ្វើឡើងកាលពីថ្ងៃទី​៥ ខែមេសា ឆ្នាំ​២០១៨ ដែលបានជួបបងប្អូនប្រជាពលរដ្ឋខ្មែរ នៅតំបន់ Kajang រដ្ឋSelangor លើកទី២ ពីថ្ងៃទី​២១-២៤ ខែមេសា ឆ្នាំ២០១៨ ដែលបានអញ្ជើញជួបពលរដ្ឋខ្មែរនៅរដ្ឋ៣ គឺរដ្ឋ Johor Baharu រដ្ឋ Selangor និងរដ្ឋ Malaka និង​លើកទី៣ ពីថ្ងៃទី​០១-​០៤ ខែឧសភា ឆ្នាំ​២០១៨​បានជួបបងប្អូននៅរដ្ឋ២ គឺរដ្ឋ Pahang និងរដ្ឋ Perak​។

បន្ទាប់ពីបញ្ចប់ពិធីសំណេះសំណាល គណៈប្រតិភូនឹងអញ្ជើញ​ចូលរួមទទួលទានអាហារសាមគ្គី នៃពិធីស្រាយបួសរ៉ាម៉ាឌន ជាមួយនាយករដ្ឋមន្រ្តីថ្មី របស់ម៉ាឡេស៊ី សម្តេច Tun Dr Mahathir Mohamed នាល្ងាចថ្ងៃទី​២៥ ខែឧសភា ឆ្នាំ​២០១៨៕