(កំពង់ស្ពឺ)៖ នៅព្រឹកថ្ងៃពុធ​ ៩កើត​ ខែជេស្ឋ​ ឆ្នាំច​ សំរឹទ្ធិស័ក​ ព.ស.២៥៦២​ ត្រូវនឹងថ្ងៃទី​២៣​ ខែឧសភា ឆ្នាំ២០១៨​ នេះ កាកបាទក្រហមកម្ពុជា (កក្រក)​ ដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានសម្ពោធឱ្យប្រើប្រាស់អណ្តូងទឹកស្អាត ចំនួន១៥ ជូនប្រជាជនខ្វះខាត​ទឹកប្រើប្រាស់ចំនួន១៩១គ្រួសារ (ស្មើនឹងមនុស្ស ៨៩៣នាក់​)​ និងផ្តល់អំណោយជូនដល់​ ចាស់ឥតទីពឹង​ ជនពិការ​ ស្ត្រីមានផ្ទៃពោះ​ជួបការលំបាក​ចំនួន​៦៣គ្រួសារ​ រស់នៅឃុំព្រៃវិហារ​ និងឃុំមហាឫស្សី​ ក្នុងស្រុកគងពិសី​ ខេត្តកំពង់ស្ពឺ។​

ក្នុងឱកាសជួបសំណេះសំណាលនោះ លោកស្រី​ ម៉ែន​ នារីសោភ័គ​ អគ្គលេខាធិការរងទី​១ កក្រក​ បានពាំនាំប្រសាសន៍​របស់ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ដែលផ្តាំផ្ញើសួរសុខទុក្ខ​ និងគិតគូរពីសុខុមាលភាពមនុស្សវ័យចាស់​ ជូនលោកយាយលោកតា​ និងប្រជាពលរដ្ឋទាំងអស់​ ព្រមទាំងផ្តាំផ្ញើឱ្យបរិភោគអាហារមានអនាម័យ​ ទឹកដាំពុះ ឬច្រោះស្អាតល្អ​ ជៀងវាងការប្រើប្រាស់គ្រឿងញៀន​ឬគ្រឿងស្រវឹង​ ដែលជាហេតុបង្កឱ្យមានអំពើហិង្សា​ឬបទល្មើសផ្សេងៗ​ និងចូលរួមគោរពច្បាប់ចរាចរណ៍ ដើម្បីសុវត្ថិភាពរបស់ខ្លួន។​ ជាមួយគ្នានេះ​ លោកស្រី​ បានលើកទឹកចិត្ត ដល់ប្រជាពលរដ្ឋ​បន្តខិតខំដាំដំណាំ​ បន្លែ​ ដោយប្រើប្រាស់ជីធម្មជាតិ​ ជៀសវាងថ្នាំគីមីលើសកម្រិត​ និងចូលរួម​លើកកម្ពស់សេចក្តីថ្លៃថ្នូររបស់មនុស្សជាតិ តាមរយៈការប្រើប្រាស់សិទ្ធិស្របច្បាប់​របស់ខ្លួន បំពេញកាតព្វកិច្ចជា​ប្រជាពលរដ្ឋ​ ដើម្បីសុខសន្តិភាព​ ស្ថិរភាព​ និងការអភិវឌ្ឍ។

ប្រជាពលរដ្ឋទាំងអស់​ បានសម្ដែងនូវក្តីរំភើប​រីករាយ ដោយបាន សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ យកចិត្តទុកដាក់​ គិតគូរ​ ជួយដោះស្រាយបញ្ហា​ និងបំពេញសេចក្តីត្រូវការរបស់ប្រជាពលរដ្ឋ ជួបការលំបាក​ ដោយគ្មានការរើសអើងអ្វីឡើយ។

ចំពោះប្រជាពលរដ្ឋចំនួន​៦៣គ្រួសារ​ ក្នុងមួយគ្រួសារៗទទួលបាន​​៖​ អង្ករ​ ៣០គីឡូក្រាម​ មី​ ១កេស​ ត្រីខ​ ១០កំប៉ុង​​ មុង​ ១​ ភួយ​ ១​ សារុង​ ១​ ក្រមា​ ១​ និងថវិកា​ ២០,០០០រៀល។​ ដោយឡែក​ លោកយាយលោកតា​ ប្រមាណ​១១០នាក់​ ដែលចូលរួមក្នុងពិធីសម្ពោធអណ្តូង​ ក៏ទទួលបាន​សារុងម្នាក់ៗ​មួយ​ ជាអនុស្សាវរីយ៍ផងដែរ៕