(កោះកុង)៖ លោក ហ៊ុន ម៉ាណែត តំណាងសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នៅថ្ងៃទី២២ ខែឧសភា ឆ្នាំ២០១៨នេះ បានអញ្ជើញសំណេះសំណាល និងបំពាក់មេដាយការពារជាតិ ជូនសមាជិកសមាគមអតីតយុទ្ធជនកម្ពុជា ក្នុងខេត្តកោះកុង។
ថ្លែងក្នុងឱកាសនោះ លោក ហ៊ុន ម៉ាណែត បានបញ្ជាក់ថា ពិធីបំពាក់មេដាយការពារជាតិ ដែលព្រះមហាក្សត្រ និងរាជរដ្ឋាភិបាល បានទទួលស្គាល់នេះ គឺជារបស់មានដ៏មានតម្លៃ និងអត្ថន័យបំផុត ដែលលុយមិនអាចទិញបាន ដែលនេះគឺជាមេដាយ ដែលទទួលស្គាល់នូវកិត្តិយស និងការលះបង់របស់អតីតយុទ្ធជន ដែលបានធ្វើពលីកម្មលះបង់សាច់ស្រស់ឈាមស្រស់ ដើម្បីបុព្វហេតុជាតិមាតុភូមិ និងសម្រាប់កូនចៅជំនាន់ក្រោយ។
បើតាមលោក ហ៊ុន ម៉ាណែត ក្នុងនាមកូនចៅជំនាន់ក្រោយ សូមថ្លែងអំណរគុណ និងដឹងគុណជានិច្ចចំពោះអតីតយុទ្ធជន ដែលបានលះបង់ និងធ្វើពលីកម្មគ្រប់បែបយ៉ាង ដើម្បីបុព្វហេតុជាតិមាតុភូមិ រំដោះប្រទេសជាតិចេញពីសង្រ្គាម ដែលធ្វើឲ្យយើងទាំងអស់គ្នា បានសុខនៅថ្ងៃនេះ គឺបានមកពីការចូលរួមដ៏មានតម្លៃរបស់យុទ្ធជននៅទូទាំងប្រទេស។
លោកបន្ថែមថា សម្តេចតេជោ ហ៊ុន សែន បានយល់ណាស់អំពីអតីតយុទ្ធជន អំពីគុណសម្បត្តិ និងការលះបង់របស់អតីតយុទ្ធជន ព្រោះសម្ដេចក៏ជាអតីតយុទ្ធជន ដែលបានចូលរួមច្បាំង ដើម្បីបុព្វហេតុជាតិ។ រាជរដ្ឋាភិបាល មិនបានបោះបង់អតីតយុទ្ធជនចោលនោះទេ គឺរាជរដ្ឋាភិបាលយកចិត្តទុកដាក់ចំពោះ អតីតយុទ្ធជន និងគ្រួសារអតីតយុទ្ធជន ទៅតាមលទ្ធភាពដែលមាន ដើម្បីលើកស្ទួយកម្រិតជីវភាព និងកិត្ដិយស។
លោក ហ៊ុន ម៉ាណែត បានគូសបញ្ជាក់ថា អតីតយុទ្ធជនជឿទុកចិត្តចំពោះ សម្ដេចតេជោ ហ៊ុន សែន និងការដឹកនាំរបស់រាជរដ្ឋាភិបាល ដែលមានគណបក្សប្រជាជនកម្ពុជាដឹកនាំ ទោះបីមិនល្អឥតខ្ចោះ យ៉ាងណាក៏ដោយ កំពុងតែខិតខំណាស់ ដើម្បីដឹកនាំប្រទេសជាតិថែរក្សា សុខសន្តិភាព និងជួយប្រជាជនគ្រប់បែបយ៉ាង។
លោក ហ៊ុន ម៉ាណែត ផ្ដាំផ្ញើអតីតយុទ្ធជន ត្រូវទៅបោះឆ្នោតថ្ងៃទី២៩ ខែកក្កដា ឲ្យបានទាំងអស់គ្នា និងបោះឆ្នោតជូនអ្នកដឹកនាំ ដែលនៅរួមសុខរួមទុក្ខ ជាមួយប្រជាជន និងសូមកុំចូលរួមសកម្មភាពទាំងឡាយណា ដែលបង្កអសន្តិសុខ និងបង្កចលាចល ដល់សង្គមជាតិ៕
