(ភ្នំពេញ)៖ នៅទីស្នាក់ការកណ្តាល នាព្រឹកថ្ងៃអង្គារ ៨កើត ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២២ ខែឧសភា ឆ្នាំ២០១៨ នេះ កាកបាទក្រហមកម្ពុជា (កក្រក) ដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានប្រគល់អំណោយជាថវិកាចំនួន ១២០លានរៀល អង្ករចំនួន១០៨តោន និងមួកសុវត្ថិភាពចំនួន៦០០ (ជាអំណោយទទួលបានក្នុងឱកាសទិវា ៨ ឧសភា ២០១៨) ជូនដល់អនុសាខាកាកបាទក្រហមកម្ពុជា ខណ្ឌទាំង ១២ ក្នុងរាជធានីភ្នំពេញ ដោយអនុសាខានីមួយៗទទួលបានថវិកា ១០លានរៀល អង្ករចំនួន ៣០០ការុង ស្មើនឹង ៩តោន និងមួកសុវត្ថិភាពចំនួន ៥០។
ក្នុងឱកាសនោះ លោកស្រី ពុំ ចន្ទីនី អគ្គលេខាធិការកក្រក បានពាំនាំនូវប្រសាសន៍របស់ សម្តេចកិត្តិព្រឹទ្ធបណ្ឌិតប្រធាន ដែលផ្តាំសួរសុខទុក្ខ និងកោតសរសើរ ដល់អនុសាខាខណ្ឌទាំង១២ ដែលតែងតែចុះជួយប្រជាពលរដ្ឋងាយរងគ្រោះបំផុត និងអ្នកដែលត្រូវការឱ្យជួយដល់លំនៅឋានដោយមិនទុកនរណាម្នាក់ចោល ក្នុងនោះមាន ចាស់ជរាឥតទីពឹង ជនពិការ កុមារកំព្រា ស្ត្រីមេម៉ាយ អ្នកមានជំងឺរ៉ាំរ៉ៃ អ្នករស់នៅជាមួយមេរោគអេដស៍។ល។
តំណាងអនុសាខានីមួយៗ បានថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលដឹកនាំកាកបាទក្រហមកម្ពុជា ប្រកបដោយគតិបណ្ឌិត ក្នុងការគិតគូរ យកចិត្តទុកដាក់ តាមដាន និងដោះស្រាយបញ្ហាភ្លាមៗដល់ទុក្ខលំបាករបស់ប្រជាពលរដ្ឋ។
សម្រាប់អំណោយដែលទីស្នាក់ការកណ្តាលបានផ្តល់ជូនក្នុងថ្ងៃនេះ អនុសាខានីមួយៗ នឹងយកទៅចាត់ចែងផ្តល់ជូនដល់អ្នកងាយរងគ្រោះបំផុតក្នុងសមត្ថកិច្ចដែនដីនៃខណ្ឌនីមួយៗឲ្យមានប្រសិទ្ធភាព ដោយគ្មានការរើសអើង ប្រកាន់វណ្ណៈ ពូជសាសន៍ ព័ណ៌សម្បុរ ឬនិន្នាការនយោបាយអ្វីឡើយ។
សូមបញ្ជាក់ថា កាកបាទក្រហមកម្ពុជា បានផ្តល់អំណោយមនុស្សធម៌ដល់អនុសាខាទាំង ១២ខណ្ឌ បានចំនួន ៧លើករួចមកហើយ ហើយថ្ងៃនេះ គឺជាការផ្តល់ជូនលើកទី ៨ ចាប់ពីឆ្នាំ ២០១៥ មក ៕
