(សៀមរាប)៖ អាជ្ញាធរខេត្តសៀមរាប នៅព្រឹកថ្ងៃទី២០ ខែឧសភា ឆ្នាំ២០១៨នេះ ទិវាជាតិ នៃការចងចាំ២០ឧសភា ជូនដល់ប្រជាពលរដ្ឋស្លូតត្រង់ កម្មាភិបាល យុទ្ធជន យុទ្ធនារី អ្នកស្នេហាជាតិ ដែលបានបាត់បង់ជីវិត ដោយភាពអយុត្តិធម៌ក្នុងរបបប្រល័យពូជសាសន៍ ប៉ុល ពត។ ពិធីនេះ ត្រូវបានធ្វើឡើងក្រោមវត្តមាន លោក នូ ផល្លា ប្រធានប្រឹក្សាខេត្ត និងលោក ឃឹម ប៊ុនសុង អភិបាលខេត្តសៀមរាប ដោយមានអ្នកចូលរួមប្រមាណ៣,០០០នាក់ផងដែរ។
ក្នុងពិធីនោះ លោក ឃឹម ប៊ុនសុង ក៏បានអាននូវវិយោគកថា ដោយបានគូសបញ្ជាក់ថា ថ្វីត្បិតពេលវេលា នៃអតីតកាលបានកន្លងផុត៣៩ឆ្នាំក៏ពិតមែន តែភាពឈឺចាប់ខ្លោចផ្សា របស់ប្រជាជនកម្ពុជា នៅតែដិតដាមជាប់ នៅក្នុងក្រអៅបេះដូងរបស់ប្រជាជនគ្រប់រូប នូវមហាវិនាសកម្ម របស់ប្រជាជនជាង៣លាននាក់ ដែលបានបាត់ បង់ជីវិតយ៉ាងភាពអយុត្តិធម៌ និងអណោចអធមក្រៃលែង។
លោកបន្តទៀតថា ដោយថ្ងៃទី១៨ ខែមីនា ឆ្នាំ១៩៧០ បានធ្វើឲ្យប្រទេសកម្ពុជាធ្លាក់ចូលក្នុងភ្លើងសង្រ្គាម ធ្វើប្រជាជនកម្ពុជារងគ្រោះមហន្តរាយដ៏អណោចអធ័ម ប្រាស់ព្រាត់ក្រុមគ្រួសារបងប្អូន និងទទួលរងទុក្ខវេទនាមិនអាចបំភ្លេចបាន។ ដោយទ្រាំនូវភាពវេទនាលំបាកនៃនរកអវចីនេះ ក៏មានកម្លាំងអ្នកស្នេហាជាតិបរិសុទ្ធ ដែលប្រសូទ្រចេញពីគណបក្សប្រជាជនកម្ពុជា បានបង្កើតនូវរណសិរ្សសាមគ្គីសង្រ្គោះជាតិកម្ពុជា ធ្វើការប្រយុទ្ធប្រឆាំង និងពួកបនប្រល័យពូជសាសន៍ ប៉ុល ពត រហូតទទួលបាន ជ័យជំនះនាថ្ងៃ៧មករា ១៩៧៩ បាននាំមកនូវសិទ្ធិសេរីភាពជូនប្រជាជន និងបន្តខិតខំស្តារកសាងប្រទេស ពីគំនរផេះផូផង់។
បើតាមលោក ឃឹម ប៊ុនសុង រាល់ការអភិវឌ្ឍន៍ ការកសាងនូវសមិទ្ធិផលជូនជាតិមាតុភូមិរបស់គណបក្សប្រជាជនកម្ពុជា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី បានធ្វើឲ្យមានការអភិវឌ្ឍន៍រីកចម្រើន នៅតាមបណ្តាមូលដ្ឋានទាំងវិស័យពុទ្ធចក្រ និងអាណាចក្រ។
ម៉្យាងទៀតសូមឧទ្ទិសដល់ថ្ងៃទិវាជាតិនៃការចងចាំ២០ឧសភានេះ ឲ្យប្រែក្លាយទៅជាការកិច្ចអភិវឌ្ឍន៍សេដ្ឋកិច្ចជាតិ សំដៅទៅរកការកាត់បន្ថយនូវភាពក្រីក្រ របស់ប្រជាជនកម្ពុជា និងសូមបងប្អូនអញ្ជើញទៅបោះឆ្នោតជ្រើសតាំងតំណាងរាស្ត្រ នីតិកាលទី៦ នាថ្ងៃទី ២៩ កក្កដា ឆ្នាំ២០១៨ខាងមុខនេះ ឲ្យបានគ្រប់ៗគ្នា និងចូលរួមថែរក្សាការពារសន្តិភាពនៅកម្ពុជា៕
