(កំពង់ចាម)៖ កម្លាំងនគរបាល នៃស្នងការដ្ឋាននគរបាលខេត្តកំពង់ចាម នៅថ្ងៃទី១៨ ខែឧសភា ឆ្នាំ២០១៨នេះ បានបើកប្រតិបត្តិការ បង្ក្រាបទីតាំងបើកល្បែងស៊ីសង់មួយកន្លែង នៅភូមិទី១៤ ឃុំកោះសូទិន ស្រុកកោះសូទិន។
ស្នងការនគរបាលខេត្តកំពង់ចាម លោកឧត្តមសេនីយ៍ទោ ឯម កុសល បានឲ្យដឹងថា ប្រតិបត្តិការនេះធ្វើឡើងដោយកម្លាំងជំនាញរបស់ផែននគរបាលព្រហ្មទណ្ឌ សហការជាមួយអាជ្ញាធរមូលដ្ឋាន ដោយក្នុងនោះឃាត់ខ្លួនបានជនសង្ស័យចំនួន៤នាក់ និងវត្ថុតាងមួយចំនួនផងដែរ។
បើតាមលោកឧត្តមសេនីយ៍ស្នងការ ជនសង្ស័យទាំង៤នាក់ដែលឃាត់ខ្លួនបានទី១៖ឈ្មោះ អ៊ុន សាមឿន អាយុ៥៧ឆ្នាំ មានទីលំនៅភូមិទី១០ ឃុំកោះសូទិន ស្រុកកោះសូទិន, ទី២៖ឈ្មោះ ម៉ៅ ស៊ីម៉ុង អាយុ៦០ឆ្នាំ មានទីលំនៅភូមិទី៤ ឃុំកោះសូទិន ស្រុកកោះសូទិន, ទី៣៖ឈ្មោះ ប៉ា ពីន អាយុ៥១ឆ្នាំ មានទីលំនៅភូមិទី២ ឃុំកោះសូទិន ស្រុកកោះសូទិន និងទី៤៖ឈ្មោះ ចាន់ រុន អាយុ៦៥ឆ្នាំ មានទីលំនៅភូមិទី១៤ ឃុំកោះសូទិន ស្រុកកោះសូទិន។
ក្រោយប្រតិបត្តិការកម្លាំងជំនាញដកហូតវត្ថុតាង ហាន់តោអាប៉ោងចំនួន០១, ចានទ្រអាប៉ោងចំនួន០១, មេអាប៉ោងចំនួន០២គ្រាប់, បៀរចំនួន០១ហ៊ូ, ប្រាក់រៀលចំនួន១,៨៨០,០០០រៀល
និងម៉ូតូចំនួន១០គ្រឿង។ ក្រោយឃាត់ខ្លួនជនសង្ស័យ បាននាំយកមកកាន់ស្នងការដ្ឋាននគរបាលខេត្ត ដើម្បីកសាងសំណុំរឿងតាមនីតិវិធី ដោយមានការសម្របសម្រួលពី លោក ហួត វុទ្ធី ព្រះរាជអាជ្ញា អមសាលាដំបូងខេត្តកំពង់ចាម៕
