(ភ្នំពេញ)៖ ចំពោះមុខជំនួយការសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងជាអភិបាលខណ្ឌដង្កោ លោក នុត ពុធដារ៉ា នៅថ្ងៃទី១៧ ខែឧសភា ឆ្នាំ២០១៨នេះ ប្រជាពលរដ្ឋនៅក្នុងមូលដ្ឋានសង្កាត់រលួស ខណ្ឌដង្កោ ប្រកាសប្ដេជ្ញាបន្ដបោះឆ្នោតគាំទ្រគណបក្សប្រជាជនកម្ពុជា ក្រោមការដឹកនាំរបស់សម្ដេចតេជោ ហ៊ុន សែន នៅអាណត្តិនេះ និងអាណត្តិក្រោយៗទៀត។
ការប្រកាសបែបនេះ ធ្វើឡើងក្នុងឱកាសលោក ចុះសំណេះសំណាលសួរសុខទុក្ខ និងទទួលយកសំណើសំណូមពរ និងតម្រូវការនានារបស់បងប្អូនប្រជាពលរដ្ឋ ព្រមទាំងពិនិត្យមើលគម្រោងស្ថាបនាផ្លូវបេតុង១ខ្សែ ប្រវែង៤៦៥មែត្រ ទទឹង៤ម៉ែត្រ ស្ថិតក្នុងភូមិប្រធាតុ សង្កាត់រលួស។
ក្នុងឱកាសនោះ លោកអភិបាល បានផ្តាំផ្ញើការសាកសួរសុខទុក្ខពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់បងប្អូនប្រជាពលរដ្ឋទាំងអស់ ដែលជានិច្ចកាលសម្តេចទាំងទ្វេរតែងបានគិតគូរពីការលំបាក បញ្ហា និងតម្រូវការនានារបស់បងប្អូននៅមូលដ្ឋាន។
លោកក៏បានលើកឡើងអំពីការអភិវឌ្ឍន៍រីកចម្រើនឥតឈប់ឈររបស់ប្រទេសជាតិពីមួយថ្ងៃទៅមួយថ្ងៃ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានដឹកនាំប្រទេសឆ្លងកាត់បញ្ហាលំបាកនានា ឲ្យក្លាយជាប្រទេសមានការរីកចម្រើន ប្រជាពលរដ្ឋមានជីវភាពធូរធារ ក្រោមដំបូលសន្តិភាព។
សូមជម្រាបថា គម្រោងផ្លូវបេតុងមួយខ្សែនេះ នឹងជួយសម្រួលដល់ការលំបាករបស់បងប្អូនក្នុងមូលដ្ឋាន ជាពិសេសនៅក្នុងរដូវវស្សាខាងមុខនេះផងដែរ ដើម្បីរំដោះទឹក បញ្ជៀសការលិចលង់ផងដែរ៕
