(ភ្នំពេញ)៖ មន្ត្រីនគបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ បានឲ្យដឹងថា លោក ប៊ុន ធី ចៅក្រមក្រមស៊ើបសួរសាលាដំបូងរាជធានីភ្នំពេញ បានអនុញ្ញាតឲ្យបុគ្គលិកក្រុមហ៊ុនទូរស័ព្ទ ICall and Vfone ដែលបានឆបោកកិបកេងប្រាក់ក្រុមហ៊ុនជិតមួយម៉ឺនដុល្លារត្រឡប់ទៅផ្ទះវិញ។
ការសម្រេចបែបនេះ កាលពីល្ងាចម្សិលមិញ បានធ្វើឡើងបន្ទាប់ពីម្ចាស់ក្រុមហ៊ុន បានឃាត់ខ្លួនជនសង្ស័យ ប្រគល់ជូននគរបាលការិយាល័យព្រហ្មទណ្ឌកំរិតធ្ងន់រាជធានីភ្នំពេញ ហើយនៅព្រឹកថ្ងៃទី១២ ខែឧសភា ឆ្នាំ២០១៨ ជនសង្ស័យត្រូវបានបញ្ជូនមកអយ្យការអមសាលាដំបូងរាជធានីភ្នំពេញ ដើម្បីចាត់ការតាមច្បាប់ ក្រោមការសន្និដ្ឋានចោទប្រកាន់ពីបទ «រំលោភលើទំនុកចិត្ត»។
មន្រ្តីនគរបាល បានបញ្ជាក់ថា ជនសង្ស័យឈ្មោះ ពេជ្រ ដារ៉ា អាយុ២២ឆ្នាំ មានទីលំនៅផ្ទះជួល ម្តុំផ្សារកណ្ដាល សង្កាត់ផ្សារកណ្ដាលទី១ ខណ្ឌដូនពេញ ត្រូវបានលោក ប៉េង សាម៉ារ៉ា អាយុ២៧ឆ្នាំ ជាអ្នកគ្រប់គ្រងក្រុមហ៊ុនលក់ទូរស័ព្ទ ICall and Vfone នៅថ្ងៃទី១០ ខែឧសភា ឆ្នាំ២០១៨ ឃាត់ខ្លួនប្រគល់ជូនសមត្ថកិច្ច។
ជនសង្ស័យ បានចូលបម្រើការងារនៅក្រុមហ៊ុនលក់ទូរស័ព្ទនេះ ក្នុងឆ្នាំ២០១៦ មានតំណែងជាអ្នកតំណាងការលក់តាមបណ្ដាខេត្ត។ ក្នុងខែមករា ឆ្នាំ២០១៨ ដល់ខែមេសា ឆ្នាំ២០១៨ ឈ្មោះ ពេជ្រ ដារ៉ា បានយកទូរស័ព្ទរបស់ក្រុមហ៊ុនចំនួន១៩លើក ទៅលក់ឱ្យអតិថិជនតាមបណ្ដាខេត្ត គិតជាទឹកប្រាក់ចំនួន៨,៤៤៤ដុល្លារ។ ប៉ុន្តែប្រាក់នេះ ឈ្មោះ ពេជ្រ ដារ៉ា មិនបានប្រគល់ជូនក្រុមហ៊ុនទេ ដោយអះអាងថា អតិថិជនជំពាក់ប្រាក់។ ក្រោយការស្រាវជ្រាវទើបដឹងថា ឈ្មោះនេះបានកិបកេងប្រាក់ក្រុមហ៊ុន ទើបឃាត់ខ្លួនប្រគល់ជូនសមត្ថកិច្ចតែម្ដង។
ជនសង្ស័យ ពេជ្រ ដារ៉ា សារភាពចំពោះមុខសមត្ថកិច្ចថា ខ្លួនពិតជាបានកិបកេងប្រាក់ក្រុមហ៊ុនមែន ដោយបានចាញ់ល្បែងនៅកាស៊ីណូព្រែកចាក ខេត្តកំពត៕
