(ភ្នំពេញ)៖ នៅរសៀលថ្ងៃសៅរ៍ ១៣រោច ខែពិសាខ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី ១២ ខែឧសភា ឆ្នាំ២០១៨ នេះ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យលោកស្រី ពុំ ចន្ទីនី អគ្គលេខាធិការ កាកបាទក្រហមកម្ពុជា ដឹកនាំគណៈប្រតិភូ ចូលរួមចំលែកទុក្ខយ៉ាងក្រៀមក្រំជាមួយ ឯកឧត្តម អៀវ បណ្ណាសិទ្ធ ទីប្រឹក្សាអមព្រះរាជខុទ្ទកាល័យព្រះមហាក្សត្រ និងលោកជំទាវ ចំពោះមរណភាពរបស់ឯកឧត្តម អៀវ បណ្ណាការ សមាជិកព្រឹទ្ធសភានៃព្រះរាជាណាចក្រកម្ពុជា ដែលបានទទួលមរណភាព កាលពីវេលាម៉ោង ២០៖៤០ ថ្ងៃទី១០ ខែឧសភា ឆ្នាំ២០១៨ ក្នុងជន្មាយុ ៨៩ឆ្នាំ ដោយជរាពាធ ។
ក្នុងសមានទុក្ខដ៏ក្រៀមក្រំនេះ លោកស្រីអគ្គលេខាធិការ បានពាំនាំនូវការចូលរួមរំលែកទុក្ខយ៉ាងក្រៀមក្រំរបស់ សម្ដេចកិត្តិព្រឹទ្ធបណ្ឌិតប្រធាន ជូន ចំពោះ ឯកឧត្តម អៀវ បណ្ណាសិទ្ធ និងលោកជំទាវ ព្រមទាំងក្រុមគ្រួសារ ដែលបានបាត់បង់បិតា ជីតា ជីតាទួត ជាទីស្រឡាញ់ស្មើជីវិត ប្រកបដោយព្រហ្មវិហារធម៌ ទឹកចិត្តសន្តោសប្រណីដ៏ថ្លៃថ្លា និងជាឥស្សរជនខ្មែរមួយរូប បានរូមចំណែកបម្រើជាតិមាតុភូមិ និងប្រជាជនកម្ពុជា និងបានបន្សល់ទុកនូវស្នាដៃជាច្រើនសម្រាប់កូនចៅជំនាន់ក្រោយ និងសូមបួងសួងដល់ដួងវិញ្ញាណក្ខន្ធ ឯកឧត្តម អៀវ បណ្ណាការ បានចាប់កំណើតក្នុងសុគតិភព កុំបីឃ្លៀងឃ្លាតឡើយ៕
