(ភ្នំពេញ)៖ នៅព្រឹកថ្ងៃទី១១​ ខែឧសភា ឆ្នាំ២០១៨នេះ រដ្ឋបាលរាជធានីភ្នំពេញ បានបើកកិច្ចប្រជុំបន្ទាន់មួយ ជាមួយក្រុមសមត្ថកិច្ចពន្លត់អគ្គិភ័យទាំងអស់ នៅក្នុងរាជធានីភ្នំពេញ ដើម្បីពង្រឹងការជួយសង្គ្រោះប្រជាពលរដ្ឋ នៅពេលមានគ្រោះអគ្គិភ័យកើតឡើង​ឲ្យកាន់តែមានប្រសិទ្ធភាពខ្ពស់។

កិច្ចប្រជុំនេះ ដឹកនាំដោយលោក មាន ចាន់យ៉ាដា អភិបាលរងរាជធានីភ្នំពេញ និងមានការចូលរួមពី​​នាយកដ្ឋានបង្ការ និងពន្លត់អគ្គិភ័យ ក្រសួងមហាផ្ទៃ, ការិយាល័យបង្ការ និងពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញ​, ក្រុមពន្លត់អគ្គិភ័យក្រុងកោះពេជ្រ,​ ក្រុមពន្លត់អគ្គិភ័យ OCIC , ក្រុមហ៊ុនតេឡា, ក្រុមហ៊ុនសូគីមិច, ព្រលានយន្ដហោះអន្ដរជាតិភ្នំពេញ, កងពលលេខ៧០ និងកងរាជអាវុធហត្ថ។

មន្ដ្រីរដ្ឋបាលរាជធានីភ្នំពេញ  បានលួចបង្ហើបថា ធ្វើឡើងបន្ទាប់ពីមានការរិះគន់ពីសំណាក់ប្រជាពលរដ្ឋ ជុំវិញប្រតិបត្តិការពន្លត់អគ្គិភ័យនៅខណ្ឌទួលគោក នៅទាបភ្លឺថ្ងៃទី​១០ ខែឧសភាម្សិលមិញ ដោយសមត្ថកិច្ចនៅអង្គភាពពន្លត់អគ្គិភ័យចំនួន២ បានឈ្លោះប្រកែកគ្នា ​ទើបធ្វើឲ្យមានការយឺតយ៉ាវ នៃការជួយសង្គ្រោះ។​ ហេតុដូច្នេះហើយ ទើបរដ្ឋបាលរាជធានីភ្នំពេញ បានបើកកិច្ចប្រជុំបន្ទាន់នេះឡើង ដោយក្នុងគោលបំណងពង្រឹងការសហការគ្នាជាធ្លុងមួយ ទៅលើការជួយសង្គ្រោះប្រជាជន។

ពាក់ព័ន្ធនឹងកិច្ចប្រជុំនេះ លោកឧត្តមសេនីយ៍ទោ នេត វន្ថា ប្រធាននាយកដ្ឋានបង្ការ និងពន្លត់អគ្គិភ័យ ក្រសួងមហាផ្ទៃ បានអំពាវនាវឲ្យ​សមត្ថកិច្ចពន្លត់អគ្គិភ័យ​ ព្រមទាំងវិស័យឯកជនទាំងអស់ ត្រូវតែរួបរួមគ្នាជាធ្លុងមួយ ដើម្បីអន្ដរាគមន៍ពន្លត់អគ្គិភ័យជូនប្រជាពលរដ្ឋ នៅពេលមានបញ្ហាកើតឡើង។

បើតាមលោកឧត្តមសេនីយ៍ប្រធាននាយកដ្ឋាន នៅពេលមានបញ្ហាកើតឡើង គោលបំណងតែមួយគត់គឺសង្គ្រោះប្រជាពលរដ្ឋមុន កុំគិតតែឈ្លោះប្រកែកគ្នា ឬប្រចាំគ្នាឲ្យសោះ។

យោងតាមច្បាប់ស្ដីពី ការ​បង្ការ និងការពន្លត់អគ្គិភ័យ ឆ្នាំ២០១៣ មាត្រា២៧ បានចែងថា «មន្ដ្រីសមត្ថកិច្ចអគ្គិភ័យដែលខ្វះការទទួលខុសត្រូវ មិនបំពេញភារកិច្ច ឬបំពេញភារកិច្ចដោយមិនត្រឹមត្រូវក្នុងការពន្លត់អគ្គិភ័យ បង្កឲ្យមានការខូចខាតធ្ងន់ធ្ងរដល់ទ្រព្យសម្បត្តិដែលជា​កម្មសិទ្ធិរបស់អ្នកដ៏ទៃ ត្រូវផ្ដន្ទាទោសដាក់ពន្ធនាគារពី៦ខែ ទៅ២ឆ្នាំ និងពិន័យជាប្រាក់ពីមួយលានរៀល ទៅ៤លានរៀល»។

សូមរំលឹកថា នៅវេលាម៉ោងប្រមាណ​ជិត៤ព្រឹកទាបភ្លឺថ្ងៃទី១០ ខែឧសភា ឆ្នាំ២០១៨នេះ អគ្គិភ័យបានឆាបឆេះយ៉ាងសន្ធោសន្ធៅ ទៅលើឃ្លាំងលក់គ្រឿងបន្លាស់រថយន្ត និងឃ្លាំងលក់រថយន្ត សរុបចំនួន៣កន្លែង នៅផ្លូវ២១៩ ភូមិ១៥ សង្កាត់ផ្សារដើមគរ ខណ្ឌទួលគោក រាជធានីភ្នំពេញ។

បើតាមសេចក្ដីរាយការណ៍ផ្ទាល់នៅកន្លែងហេតុ បញ្ជាក់ថា ប្រជាពលរដ្ឋមូលដ្ឋាន រួមទាំងក្រុមម៉ូតូឌុបជាច្រើន បានខឹងសម្បារក្រុមពន្លត់អគ្គិភ័យ ដែលទៅដល់កន្លែងកើតហេតុមុនគេ ដោយមានការស្ទាក់ស្ទើរក្នុងការអន្ដរាគមន៍ជួយសង្គ្រោះ រហូតដល់ប្រជាពលរដ្ឋគំរាមចង់វាយក្រុមសមត្ថកិច្ចពន្លត់អគ្គិភ័យ ទាំងអស់នោះទៀតផង។

នៅក្នុងប្រតិបត្តិការអន្តរាគមន៍ពន្លត់អគ្គិភ័យខាងលើនេះ​ បានប្រើប្រាស់រថយន្តពន្លត់អគ្គិភ័យសរុបទាំងអស់ចំនួន ៤៣គ្រឿង ដោយក្នុងនោះ មានរថយន្តពន្លត់អគ្គិភ័យ របស់ស្នងការនគរបាលរាជធានីភ្នំពេញ,​ រថយន្តពន្លត់អគ្គិភ័យរបស់កងរាជអាវុធហត្ថរាជធានីភ្នំពេញ​ និងរថយន្តពន្លត់របស់អង្គភាព​ (ង៧០)​៕