(ភ្នំពេញ)៖ លោកទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានអញ្ជើញជាអធិបតីក្នុងការដឹកនាំកិច្ច ប្រជុំបូកសរុបការងារ៤ខែ ដើមឆ្នាំ២០១៨ របស់អាជ្ញាធរជាតិប្រយុទ្ធនឹងជំងឺអេដស៍។ ចូលរួមក្នុងពិធីនេះផងដែរមាន អស់លោក លោកស្រី នាងកញ្ញា ជាថ្នាក់ដឹកនាំ ទីប្រឹក្សា និងមន្រ្តីអាជ្ញាធរជាតិប្រយុទ្ធនឹងជំងឺអេដស៍ទាំងអស់ នាព្រឹកថ្ងៃព្រហស្បតិ៍ ១១រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១០ ខែ ឧសភា ឆ្នាំ២០១៨។
លោកទេសរដ្ឋមន្រ្តីបានថ្លែងថា ក្នុងរយៈពេលប៉ុន្មានថ្ងៃចុងក្រោយនេះ បណ្តាញផ្សព្វផ្សាយដែលមាននិន្នាការគាំទ្រ ក្រុមឧទ្ទាមបានបើកគ្រប់វេទិកា ក្នុងចេតនា រារាំងប្រជាពលរដ្ឋកុំឲ្យទៅចូលរួមបោះឆ្នោត ជ្រើសតាំងតំណាងរាស្រ្ត នីតិកាលទី៦នៃរដ្ឋសភា ឆ្នាំ២០១៨។ ក្រុមអ្នកវិភាគ និងបណ្តាញព័ត៌មាន ដែលមានប្រវត្តិគាំទ្រក្រុមឧទ្ទាម បានបកស្រាយនូវប្រសាសន៍របស់លោកទេសរដ្ឋមន្រ្តី ក្នុងន័យឱ្យប្រជាពលរដ្ឋយល់ថា មានការលាបពណ៌ជាមុន ឬគាបសង្កត់សិទ្ធិសេរីភាពរបស់ប្រជាពលរដ្ឋ។
លោកទេសរដ្ឋមន្រ្តីបន្តថា តាមពិតការបកស្រាយ ឬការវិភាគរបស់ក្រុមអ្នកវិភាគទាំងនោះ ដែលតាំងខ្លួនជាអ្នកវិភាគឯករាជ្យ ឬអ្នកច្បាប់ខ្លះផងនោះ ពុំបានពិចារណាឲ្យស៊ីជម្រៅ អំពីសភាពការណ៍បច្ចុប្បន្ន ទាក់ទងនឹងការបោះឆ្នោត នៅខែកក្កដា ឆ្នាំ២០១៨ខាងមុខ ដែលក្រុមឧទ្ទាមកំពុងធ្វើចលនា កុំឲ្យប្រជាពលរដ្ឋទៅបោះឆ្នោត ព្រោះអ្នកដែលមានសិទ្ធិបោះឆ្នោត តែមិនទៅបោះឆ្នោត អាចរងការសង្ស័យថា ជាអ្នកគាំទ្រតាមការឃោសនា របស់ក្រុមឧទ្ទាមក្បត់ជាតិ។
ជាការពិតណាស់ ច្បាប់នៅក្នុងព្រះរាជាណាចក្រកម្ពុជា មិនដាក់ទោសចំពោះអ្នកមានសិទ្ធិក្នុងការ បោះឆ្នោត តែមិនចូលរួមបោះឆ្នោតនោះទេ។ ក៏ប៉ុន្តែដោយសារមានចលនា អូសទាញប្រជាពលរដ្ឋ កុំឲ្យទៅបោះឆ្នោតពីសំណាក់ក្រុមឧទ្ទាម ដែលជាយុទ្ធវិធីមួយក្នុងយុទ្ធសាស្រ្ត បដិវត្ដន៍ពណ៌ផ្តួល រំលំរាជរដ្ឋាភិបាលស្របច្បាប់ ទើបប្រជាពលរដ្ឋត្រូវតែយល់ដឹង ស៊ីជម្រៅអំពីការមិនទៅបោះឆ្នោត ដែលក្រុមអ្នកវិភាគ និងអ្នកច្បាប់ទាំងនោះមិនបានណែនាំ ប្រាប់ប្រជាពលរដ្ឋឲ្យបានយល់ដឹង៕
