(ភ្នំពេញ)៖ ទេសរដ្ឋមន្រ្តី ហ៊ឹម ឆែម រដ្ឋមន្ត្រីក្រសួងធម្មការ និងសាសនា នៅថ្ងៃទី០៩ ខែឧសភា ឆ្នាំ២០១៨នេះ បានអញ្ជើញចូលរួម បើកបវេសនកាល ក្នុងឆ្នាំសិក្សាថ្មី ២០១៨-២០១៩ ស្របតាមផែនការប្រចាំឆ្នាំ របស់អគ្គាធិការដ្ឋានពុទ្ធិកសិក្សាជាតិ ដែលរៀបចំធ្វើឡើងនៅពុទ្ធិកវិទ្យាល័យព្រះសុរាម្រឹត។
ពិធីនេះ ក៏មានការនិមន្ដចូលរួមពី សម្តេចព្រះមហាសុមេធាធិបតី នន្ទ ង៉ែត ព្រះអគ្គាធិការពុទ្ធិកសិក្សា, សម្តេចព្រះពោធិវ័ង្ស អំ លីមហេង ព្រះអគ្គាធិការរងពុទ្ធិកសិក្សា, សម្តេចព្រះវនរ័ត ណយ ច្រឹក ព្រះអគ្គាធិការរងពុទ្ធិកសិក្សា, សម្តេចព្រះឧត្តមវង្សា មួង រ៉ា ព្រះអគ្គាធិការរងពុទ្ធិកសិក្សា និងសម្ដេចព្រះជាច្រើនអង្គ/នាក់ទៀតផងដែរ។
បើតាមរបាយការណ៍របស់ របស់ព្រះបិដកធម្ម ម៉ៅ នីម នាយកពុទ្ធិកវិទ្យាល័យព្រះសុរាម្រឹត មានសង្ឃដីកាថា «ថ្ងៃនេះ គឺជាទិវាមួយដ៏មហានក្ខត្តប្ញក្សក្រៃលែង ដែលគណៈគ្រប់គ្រង ពុទ្ធិកវិទ្យាល័យព្រះសុរាម្រឹត មានមន្ត្រីសង្ឃ-មន្ត្រីរាជការ-សាស្រ្តាចារ្យ-សមណសិស្ស-សិស្ស បានប្រារព្ធធ្វើពិធីបើកបវេសនកាល ក្នុងឆ្នាំសិក្សាថ្មី២០១៨-២០១៩ ស្របតាមផែនការប្រចាំឆ្នាំ របស់អគ្គាធិការដ្ឋានពុទ្ធិកសិក្សាជាតិ»។
ព្រះបិដកធម្ម ម៉ៅ នីម មានសង្ឃដីកាបន្ដទៀតថា សាស្ត្រាចារ្យបង្រៀននៅពុទ្ធិកវិទ្យាល័យព្រះសុរាម្រឹត ក្នុងឆ្នាំសិក្សា២០១៧-២០១៨ ទាំងពីរកម្រិត សរុបចំនួន ១០៦ អង្គ/នាក់ ក្នុងនោះគ្រូក្របខណ្ឌមានចំនួន២០រូប។ ក្នុងឆ្នាំសិក្សា២០១៨-២០១៩ នេះសាស្ត្រាចារ្យមានចំនួន ៩៦អង្គ/នាក់ ក្នុងនោះក្របខណ្ឌ ២០រូប។
*នាយកពុទ្ធិកវិទ្យាល័យព្រះសុរាម្រឹត មានសង្ឃដីកាថា សមណសិស្ស-សិស្ស ឆ្លងការបណ្តុះបណ្តាលផ្នែកបឋមភូមិ មាន ២៦ ជំនាន់បានប្រឡង ចេញចំនួន ៤,១៥៥ អង្គ/នាក់
*សមណសិស្ស-សិស្សឆ្លងការបណ្តុះបណ្តាល ផ្នែកទុតិយភូមិ មាន ២២ ជំនាន់បានប្រឡង ចេញចំនួន ៤០៦៤ អង្គ/នាក់។
តាមរបាយការណ៍ដដែរ ក្នុងឆ្នាំសិក្សា២០១៧-២០១៨ សមណសិស្ស-សិស្សមានចំនួន ១,០៥៨ អង្គ/នាក់, ក្នុងឆ្នាំសិក្សា២០១៨-២០១៩ សមណសិស្ស-សិស្សមានចំនួន ១,១៤៦ អង្គ/នាក់ កើនឡើង ៨៨ អង្គ/នាក់ ក្នុងនោះរួមមាន៖ កម្រិតបឋមភូមិមានចំនួន ៥៤៧ អង្គ/នាក់ កម្រិតទុតិយភូមិមានចំនួន ៥៩៩ អង្គ/នាក់។
ព្រះបិដកធម្ម ម៉ៅ នីម មានសង្ឃដីកាថា ក្នុងឆ្នាំសិក្សាកន្លងមកនេះ ពុទ្ធិកវិទ្យាល័យព្រះសុរាម្រឹត បានខិតខំប្រឹងប្រែងបំពេញការងារ គ្រប់គ្រងសមណសិស្ស-សិស្ស ក៏ដូចជាសាស្ត្រាចារ្យ ធ្វើយ៉ាងណា ត្រូវគោរពឲ្យបានម៉ត់ចត់ នូវម៉ោងបង្រៀន និងម៉ោងសិក្សារបស់ខ្លួន ដើម្បីសម្រេចឲ្យបានចប់កម្មវិធីសិក្សា ដែលអគ្គាធិការដ្ឋានពុទ្ធិកសិក្សាជាតិ និងក្រសួងធម្មការ និងសាសនា បានដាក់ចេញ៕
