(ភ្នំពេញ)៖ លោក​ អ៊ឹម ឈុនលឹម ប្រធានក្រុមប្រឹក្សាធម្មនុញ្ញនៃព្រះរាជាណាចក្រកម្ពុជា បានថ្លែងថា គណៈមេធាវីនៃ​កម្ពុជា គឺជាដៃគូដ៏ល្អរបស់រាជរដ្ឋាភិបាល ស្ថាប័ននីតិប្បញ្ញត្តិ ស្ថាប័នតុលាការ និងប្រជាពលរដ្ឋទូទៅ ក្នុងការពង្រឹងវិស័យយុត្តិធម៌ ដែលជាមូលដ្ឋានគ្រឹះនៃការកសាងនីតិរដ្ឋនៅកម្ពុជា។

លោកបានថ្លែងដូច្នេះ នៅក្នុងឱកាសដែលគណៈមេធាវី ដឹកនាំដោយលោកមេធាវី សួន វិសាល ប្រធានគណៈមេធាវី ចូលជួបសម្តែងការគួរសម នៅថ្ងៃទី០៧​ ខែឧសភា ឆ្នាំ២០១៨ នៅអគារស​ នៃវិមានរដ្ឋចំការមន។

ជាមួយគ្នានេះ លោក ​អ៊ឹម ឈុនលឹម​ ក៏បានថ្លែងកោតសរសើរចំពោះការដឹកនាំ ការកែ​ទម្រង់ស្ថាប័នគណៈមេធាវី​កន្លងមក ពីមួយអាណត្តិទៅមួយអាណត្តិ ឲ្យកាន់តែល្អប្រសើរ ដែលជាការរួមចំណែកយ៉ាងធំធេង ក្នុងការលើកកម្ពស់តម្លៃនៃវិជ្ជាជីវៈមេធាវី ការពង្រឹងការអនុវត្តច្បាប់ ជាពិសេសការលើកកម្ពស់យុត្តិធម៌សង្គម៕