(ព្រះសីហនុ)៖ ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានប្រាប់អង្គភាពព័ត៌មាន Fresh News ថា កម្លាំងនគរបាលចរាចរណ៍របស់លោក បានឃាត់រថយន្ត និងម៉ូតូ ចំនួន៧គ្រឿងបន្តទៀត ដែលបើកដោយជនជាតិចិន ដោយពួកគេគ្មានប័ណ្ណបើកបរ និងគ្មានពាក់មួកសុវត្ថិភាព។

លោកឧត្តមសេនីយ៍ស្នងការ បានប្រកាសចាត់វិធានការចំពោះបញ្ហានេះ កាន់តែខ្លាំងឡើង ជាពិសេស ក៏សូមអំពាវនាវដល់ម្ចាស់រថយន្ត និងម៉ូតូទាំងអស់ដែលបានជួលឲ្យជនបរទេស មិនថា តែជនជាតិ ចិននោះទេ ត្រូវត្រួតពិនិត្យឲ្យបានត្រឹមត្រូវតើ ពួកគេមានប័ណ្ណបើកបរត្រឹមត្រូវតាមច្បាប់ដែរឬទេ? បើបញ្ហានេះនៅតែបន្តកើតឡើងទៀត​នោះ លោកស្នងការ នឹងចាត់វិធានការ តាមនីតិវិធីឲ្យបានតឹង រឹងបំផុត គោលបំណងរក្សាសណ្តាប់ធ្នាប់ និងការគោរពច្បាប់នៅលើទឹកដីខេត្តព្រះសីហនុ។

សូមបញ្ជាក់ថា កាលពីវេលាម៉ោង០០៖១០នាទី ថ្ងៃចន្ទ៨រោច ខែពិសាខ ឆ្នាំច សំរឹទ្ធិស័ក ព-ស២៥៦២ ត្រូវនឹងថ្ងៃ៧ ខែឧសភា ឆ្នាំ២០១៨ លើផ្លូវឯករាជ្យ ត្រង់ចំណុចគោលដៅជិតវេទិកា៧មករា ស្ថិតក្នុងភូមិ០៣ សង្កាត់០៣ ក្រុង/ខេត្តព្រះសីហនុ កម្លាំងជំនាញផែនសណ្ដាប់ធ្នាប់ចំនួន១២នាក់ ដឹកនាំដោយលោក ព្រហ្ម ពៅ នាយការិយាល័យចរាចរណ៍ បានចុះត្រួតពិនិត្យ នឹងរឹតបណ្ដឹងអនុវត្តច្បាប់ចរាចរណ៍ផ្លូវគោក ពិសេសអ្នកបើកបរគ្មានប័ណ្ណបើកបរ នឹងរថយន្តគ្មានផ្លាកលេខ ជាលទ្ធផល បានចំនួន០៧គ្រឿង រថយន្តចំនួន០៥គ្រឿង នឹងម៉ូតូចំនួន០២គ្រឿង មានដូចខាងក្រោម៖

*ទី១៖ រថយន្តម៉ាក LEXUS RX300 ពណ៌ស ពាក់ផ្លាកលេខភ្នំពេញ2J-6036 បើកបរដោយជនជាតិចិន មានប័ណ្ណបើកបរមិនត្រឹមត្រូវ
*ទី២៖ រថយន្តម៉ាក HYUNDAI H1 ពណ៌ស គ្មានលេខ បើកបរដោយជនជាតិខ្មែរ
*ទី៣៖ រថយន្តម៉ាក LEXUS RX300 ពណ៌ស ពាក់ផ្លាកលេខព្រះសីហនុ 2B-9665 បើកបរដោយជនជាតិចិន មានប័ណ្ណបើកបរមិនត្រឹមត្រូវ
*ទី៤៖ រថយន្តម៉ាក HYUNDAI H1 ពណ៌ទឹកប្រាក់ ពាក់ផ្លាកលេខព្រះសីហនុ 2A-8065 បើកបរដោយជនជាតិចិន មានប័ណ្ណបើកបរមិនត្រឹមត្រូវ
*ទី៥៖ រថយន្តម៉ាក KAI ពណ៌ស ពាក់ផ្លាកលេខភ្នំពេញ 2AJ-7699 បើកបរដោយជនជាតិចិន មានប័ណ្ណបើកបរមិនត្រឹមត្រូវ
*ទី៦៖ ម៉ូតូម៉ាក AIR BLADE ពណ៌ខ្មៅ ពាក់ផ្លាកលេខព្រះសីហនុ 1E-4580 បើកបរដោយជនជាតិចិន គ្មានមួកសុវត្ថិភាព
*ទី៧៖ ម៉ូតូម៉ាក HONDA CLICK ពណ៌ស ពាក់ផ្លាកលេខបាត់ដំបង 1AB-2399 បើកបរដោយជនជាតិចិន គ្មានមួយកសុវត្ថិភាព។

សម្រាប់វត្ថុតាងម៉ូតូ និងរថយន្តទាំងអស់ ត្រូវរក្សារទុកនៅការិយាល័យចរាចរណ៍ផ្លូវគោកខេត្ត ដើម្បីអនុវត្តបន្តតាមនីតិវិធី៕