(ក្រចេះ)៖ លោក ម៉ម ប៊ុន​ហេង រដ្ឋមន្ត្រីក្រសួងសុខាភិបាល បានបញ្ជាក់ប្រាប់បណ្តាញព័ត៌មាន Fresh News នាមុននេះបន្តិចថា ខណៈនេះក្រុមមន្ត្រីជំនាញនៃក្រសួងសុខាភិបាល បានចុះទៅដល់ភូមិស្រែនន ឃុំកន្តួត ស្រុកចិត្របុរី ខេត្តក្រចេះហើយ ទីដែលមានប្រជាពលរដ្ឋរងគ្រោះដោយសារពុលទឹក ​បណ្ដាលឲ្យស្លាប់ចំនួន១០នាក់ និងបញ្ជូនទៅជួយសង្រោះនៅមន្ទីរពេទ្យជាបន្តបន្ទាប់ ពោលករណីនេះកំពុងចោទជាបញ្ហាគួរឲ្យភ្ញាក់ផ្អើល។

លោករដ្ឋមន្ត្រីក៏បានបន្តថា ដើម្បីពិនិត្យស្ថានភាព និងរកមូលហេតុនៃហេតុការណ៍ផ្ទាល់ឲ្យបានច្បាស់លាស់ តែ​ គុយស៊ាង រដ្ឋលេខាធិការក្រសួងសុខាភិបាល ក៏នឹងចុះទៅត្រួតពិនិត្យផ្ទាល់នាពេលបន្ទាប់គ្នា ក្នុងថ្ងៃអាទិត្យនេះផងដែរ។

លោក វ៉ា ថន អភិបាលខេត្តក្រចេះ បានបញ្ជាក់ថា គិតត្រឹមព្រឹកថ្ងៃទី៦​ ខែឧសភានេះ ជនរងគ្រោះដែលស្លាប់ដោយសារពុលទឹក នៅខេត្តក្រចេះបានកើនដល់៨នាក់ហើយ ខណៈជនរងគ្រោះជិត១០០នាក់ទៀត​ កំពុងសម្រាកព្យាបាលនៅមន្ទីរពេទ្យ។

មុនពេលកើតហេតុ ប្រជាពលរដ្ឋក្នុងភូមិស្រែនន ឃុំកន្ទួត ស្រុកចិត្របុរី ភាគច្រើនបានផឹកទឹកអូរមួយ លុះពេលមានភ្លៀង ថ្នាំពុលបាញ់ស្មៅបានហូរចូលក្នុងទឹកប្រជាពលរដ្ឋប្រើប្រាស់នោះ ទើបបណ្តាលឲ្យពុលតែម្តង៕