(ភ្នំពេញ)៖ លោក ហាស់ វ៉ារី ទីប្រឹក្សាសម្តេចតេជោហ៊ុន សែន នាយករដ្ឋមន្ត្រីនៃកម្ពុជា គ្រោងជួបសំណេះសំណាល បងប្អូនខ្មែរឥស្លាម ជាង៨០០នាក់ មកពីឃុំរលួស និងឃុំបឹងទូក ស្រុកទឹកឈូ ខេត្តកំពត វេលាព្រឹកថ្ងៃចន័្ទ ទី០៧ឧសភា ឆ្នាំ២០១៨។ ពិធីជួបសំណេះសំណាល នាថ្ងៃស្អែកនេះ ក៏មានអញ្ជើញចូលរួមពីថ្នាក់ដឹកនាំខេត្ត និងអាជ្ញាធរ មានសមត្ថកិច្ចជាច្រើនរូបទៀត។
តាមការគ្រោងទុក នៅក្នុងពិធីជួបសំណេះសំណាល នាថ្ងៃស្អែកនេះ លោក ហាស់ វ៉ារី ទីប្រឹក្សាសម្តេចតេជោហ៊ុន សែន នឹងនាំយកពាក្យផ្តាំសួរសុខទុក្ខ ពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនដល់ បងប្អូនខ្មែរឥស្លាម ជាង៨០០នាក់ នៅក្នុងខេត្តកំពតទាំងមូលផងដែរ។
ក្រៅពីការជួបសំណេះសំណាល លោក ហាស់ វ៉ារី ទីប្រឹក្សាសម្តេចតេជោហ៊ុន សែន នឹងចែកជូននូវអំណោយមួយចំនួន ជូនដល់ បងប្អូនខ្មែរឥស្លាម មកពីឃុំរលួស និងឃុំបឹងទូក ស្រុកទឹកឈូ ខេត្តកំពត។
កន្លងមក សម្តេចតេជោ ហ៊ុន សែន បានថ្លែងថា នៅកម្ពុជា មានសាសនា៣សំខាន់ រួមមានសាសនាព្រះពុទ្ធ ឥស្លាម និងគ្រីស្ទសាសនា។ សម្តេចតេជោ ហ៊ុន សែន បានបន្តថា ជំនឿខុសគ្នានៃសាសនា មិនមែនជាឧបសគ្គសម្រាប់ការបង្រួបបង្រួមជាតិ និងការអភិវឌ្ឍន៍ជាតិនោះទេ។ ដូចនេះ គ្មានឡើយការរើសអើងជាតិ សាសន៍ ពណ៌សំបុរ ទោះជាតិសាសន៍ណាក៏ដោយ ក៏អាចរស់នៅជាមួយគ្នា ដោយសុខសន្តិភាព បានដូចគ្នា៕
