(ព្រះសីហនុ)៖ ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានបន្តយុទ្ធនាការក្តៅដោយបញ្ជាឲ្យកម្លាំងនគរបាលចរាចរណ៍ ចាប់រថយន្ដដែលកំពុងបើកបរដោយល្មើសច្បាប់លើដងផ្លូវសាធារណៈ ពិសេសបើកបរដោយជនជាតិចិន ក្នុងភូមិសាស្ដ្រខេត្តព្រះសីហនុ ដោយឃាត់បានរថយន្ដ៧គ្រឿងបន្ថែមទៀត។
ប្រតិបត្តិការចុះអនុវត្តច្បាប់ចរាចរណ៍ នៅថ្ងៃទី៤ ខែឧសភា ឆ្នាំ២០១៨នេះ ស្ថិតនៅចំនួន០២គោលដៅរួមមាន៖ ទី១-គោលដៅលើផ្លូវវិថី២ធ្នូ ត្រង់ចំណុចច្រមុះជ្រូកគុជអាស៊ី ស្ថិតនៅសង្កាត់លេខ៤ ក្រុងព្រះសីហនុ និងទី២-គោលដៅលើផ្លូវវិថីឯករាជ្យ ត្រង់ចំណុចP6 រង្វង់មូលតោ ស្ថិតនៅសង្កាត់លេខ៤ ក្រុងព្រះសីហនុ។
លោកឧត្តមសេនីយ៍ទោ ជួន ណារិន្ទ បានប្រាប់អង្គភាព Fresh News ឲ្យដឹងថា ប្រតិបត្តិការនេះកម្លាំងជំនាញឃាត់រថយន្តបានចំនួន៧គ្រឿង ដែលរថយន្តទាំងអស់ បើកបរដោយជនជាតិចិន គ្មានបណ្ណបើកបរ និងមានបណ្ណបើកបរមិនត្រឹមត្រូវតាមច្បាប់កំណត់។
រថយន្តដែលត្រូវឃាត់ទុកនោះរួមមាន៖
១៖ រថយន្តម៉ាក HYUNDAI ពណ៌ ស ពាក់ផ្លាកលេខព្រះសីហនុ2A-7593
២៖ រថយន្តម៉ាក HIGHLANDER ពណ៌ ស ពាក់ផ្លាកលេខភ្នំពេញ2S-0691
៣៖ រថយន្តម៉ាក HIGHLANDER ពណ៌ ស ពាក់ផ្លាកលេខភ្នំពេញ2L-1456
៤៖ រថយន្តម៉ាក HYUNDAI ពណ៌ ស ពាក់ផ្លាកលេខភ្នំពេញ2AQ-2076
៥៖ រថយន្តម៉ាក HYUNDAI ពណ៌ ស ពាក់ផ្លាកលេខព្រះសីហនុ2A-9673
៦៖ រថយន្តម៉ាក HYUNDAI H1 ពណ៌ ប្រផេះ គ្មានផ្លាកលេខ
៧៖ រថយន្តម៉ាក LEXUS RX300 ពណ៌ ស ពាក់ផ្លាកលេខភ្នំពេញ2AF-9312។
បើតាមលោកស្នងការ រថយន្ដទាំង៧គ្រឿងខាងលើនេះ បានយកមករក្សាទុកនៅការិយាល័យនគរបាលចរាចរណ៍ផ្លូវគោក ជាបណ្ដោះអាសន្នដើម្បីចាត់ការបន្ដតាមនីតិវិធី។
កាលពីថ្ងៃទី៣ ខែឧសភា ឆ្នាំ២០១៨ កម្លាំងនគរបាលរបស់លោក ក៏បានឃាត់រថយន្តចំនួន១៤គ្រឿងផងដែរ ដែលបើកបរដោយជនជាតិចិនគ្មានប័ណ្ណបើកបរ និងឯកសារគ្រប់គ្រាន់៕
