(ភ្នំពេញ)៖ អាចចាត់ទុកជារឿងដ៏កម្រមួយទៀតសម្រាប់កុមារី ប៊ី បាន់លក្ស្មី បើទោះបីជារូបគេ កើតនៅលើដែនដីជនបទ តែការធំធាត់ផ្នែកបញ្ញាស្មារតី លើសពីកុមារដទៃ ពោលអាយុទើបជាង ៥ឆ្នាំប៉ុណ្ណោះ តែអាចរៀនថ្នាក់ទី៤ទៅហើយ។
កុមារី ប៊ី បាន់លក្ស្មី ត្រូវបានឪពុកម្តាយយកទៅផ្ញើនៅថ្នាក់ទី៤ នៃសាលាបឋមសិក្សាតានួន ស្រុកបសេដ្ឋ ខេត្តកំពង់ស្ពឺ។ បន្ទាប់ពីការផ្ញើនេះ បានធ្វើឲ្យមន្ដ្រីមន្ទីរអប់រំខេត្តកំពង់ស្ពឺ ចុះទៅពិនិត្យនិងវាយតម្លៃ ហើយបានស្នើសុំទៅក្រសួងអប់រំ ដើម្បីពិនិត្យ និងសម្រេច តើឲ្យកុមារីរូបនេះ អាចរៀន ឬយ៉ាងណា?
បន្ទាប់ពីបានពិនិត្យរបាយការណ៍ពាក់ព័ន្ធ លោក ហង់ ជួនណារ៉ុន រដ្ឋមន្ដ្រីក្រសួងអប់រំ យុវជន និងកីឡា ក៏បានសម្រេចឲ្យកុមារីរូបនេះ បន្ដការសិក្សានៅថ្នាក់ទី៤។
តាមរយៈលិខិតផ្ញើជូនមន្ទីរអប់រំខេត្តកំពង់ស្ពឺ កាលពីថ្ងៃទី២៦ ខែមេសា ឆ្នាំ២០១៨ កន្លងទៅនេះ លោក ហង់ ជួនណារ៉ុន បានបញ្ជាក់យ៉ាងដូច្នេះ «ខ្ញុំសូមជម្រាបលោកប្រធានថា ក្រសួងអប់រំ យុវជន និងកីឡា បានឯកភាពគ្នាជាគោលការណ៍ និងសម្រេចអនុញ្ញាតឲ្យសិស្សឈ្មោះ ប៊ី បាន់លក្ស្មី អាយុ៥ឆ្នាំ បានរៀននៅថ្នាក់ទី៤ ក្នុងឆ្នាំសិក្សា ២០១៧-២០១៨ នៅសាលាបឋមសិក្សាតានួន ស្រុកបរសេដ្ឋ ខេត្តកំពង់ស្ពឺ ស្របតាមតាមសមត្ថភាពមានលក្ខណៈពិសេស និងគោលបំណងសិស្សឈ្មោះ ប៊ី បាន់លក្ស្មី»។
លោក ថន ថារិន ប្រធានមន្ទីរអប់រំខេត្ត កំពង់ស្ពឺ បានឲ្យដឹងថា កុមារីរូបនោះមានសមត្ថភាព អាចសរសេរ អានសៀវភៅភាសាខ្មែរ និងដោះស្រាយលំហាត់កម្រិតខ្ពស់ជាងថ្នាក់ទី៤ យ៉ាងល្អ ប៉ុន្តែខាងអាណាព្យាបាលក្មេងបានស្នើសុំឲ្យរៀនត្រឹមថ្នាក់ទី៤។ កុមារីវ័យឆ្លាតរូបនេះ មានឪពុកជាគ្រូបង្រៀន និងម្ដាយជាគ្រូពេទ្យ។
ឪពុកម្ដាយ និងនាយកសាលា បានស្នើដល់ប្រធានមន្ទីរអប់រំខេត្ត ដើម្បីឲ្យក្មេងស្រីនេះបានចូលរៀនថ្នាក់ខ្ពស់លើសកម្រិតអាយុ។ អ្វីដែលគួរឲ្យភ្ញាក់ផ្អើលសាមីខ្លួនផ្ទាល់បានតវ៉ា ដោយមិនព្រមរៀនត្រឹមថ្នាក់ទី១ឡើយ ទើបឈានដល់ការពិសោធន៍ និងសម្រេចបែបនេះតែម្ដង។
បើតាមលោក ថន ថារិន បានអះអាងថា ចំណេះដឹងរបស់កុមារី រូបនេះ ដោយសារមានការបង្ហាត់បង្រៀនពីឪពុកម្ដាយតាំងពីតូចមកម្លេ៉ះ។
សូមបញ្ជាក់ថា ក្រៅពីកុមារី ប៊ី បាន់លក្ស្មី កម្ពុជា ក៏មានកុមារាឆ្លាតវៃម្នាក់ទៀត ឈ្មោះ គីម ហុង អាយុ៧ឆ្នាំ មកពីខេត្តតាកែវ ក៏មានបញ្ញាស្មារតីខ្លាំងពូកែផងដែរ។ កុមារារូបនេះ មានសមត្ថភាពគិតលេខ បានរហ័សនិងអាចដោះស្រាយគណិតវិទ្យា កម្រិតអនុវិទ្យាល័យបានថែមទៀតផង។ បច្ចុប្បន្ន គីម ហុង កំពុងសិក្សានៅថ្នាក់ទី៨ នៅសាលាប៊ែលធី អន្ដរជាតិ៕
