(កូ​ឡា​ឡាំ​ពួ)​៖ ទិដ្ឋភាពនៃព្រឹត្តិការណ៍ប្រណាំងរថយន្ត Mercedes-Benz ដ៏ធំនៅប្រទេសម៉ាឡេស៊ី ដែលក្រុមហ៊ុន Star Auto Cambodia សហការជាមួយភ្នាក់ងារសារព័ត៌មាន Fresh News និងព័ត៌មានអេឡិចត្រូនិកថ្មីៗ បានផ្ដិតយកក្នុងពេលដំណើរការប្រណាំងរថយន្តនោះ ពិតជាបង្ហាញភាពអស្ចារ្យគួរឲ្យចាប់អារម្មណ៍ ជាមួយនឹងការរៀបរាប់ពីបច្ចេកទេសប្រើប្រាស់រថយន្ត Mercedes-Benz ពីអ្នកជំនាញផងដែរ។

ផ្ទៃមេឃខៀវស្រឡះ ទីលានដ៏ធំល្វឹងល្វើយ ទេសភាពដ៏ស្រស់បំព្រង រថយន្តដ៏ទំនើបប្រដេញគ្នាជាបន្តបន្ទាប់តាមផ្លូវបត់បែនដ៏វែងឆ្ងាយ លើទីលានប្រណាំងរថយន្តនៅប្រទេសម៉ាឡេស៊ីនោះ ពិតជាបង្ហាញភាពស៊ីវិល័យ ដែលមនុស្សវៃឆ្លាតសម័យទំនើបនេះ មិនអាចមើលរំលងបាន។

ខណៈកំពុងឈរនៅលើទីលានប្រណាំងរថយន្ត Mercedes-Benz នៅប្រទេសម៉ាឡេស៊ី នាថ្ងៃទី២៨ ខែមេសា ឆ្នាំ២០១៨នេះ លោក ឃុន ចាន់ថា នាយក​គ្រប់គ្រង​ផ្នែក​លក់ និង​ទីផ្សារ​របស់​ក្រុមហ៊ុន Star Auto Cambodia បានបញ្ជាក់ថា ក្រុមហ៊ុន Star Auto Cambodia ដែល​ទទួល​សិទ្ធិផ្តាច់មុខ​ពី​ក្រុមហ៊ុន ឌែម​លើ អេ​ជី ក្នុងការនាំចូល ចែកចាយ និង​ដាក់លក់​រថយន្ត Mercedes គ្រប់​ប្រភេទ​នៅ​កម្ពុជា បានអញ្ជើញ​អ្នកសារព័ត៌មាន​ Fresh News និងព័ត៌មានអេឡិចត្រូនិកថ្មីៗ ទៅ​ចូលរួមក្នុង​ព្រឹត្តិការណ៍​បើក​សាកល្បង​​រថយន្ត Mercedes-Benz ស៊េរីទំនើបៗ នៅ​ទីក្រុង​កូ​ឡា​ឡាំ​ពួ ប្រទេស​ម៉ាឡេស៊ី ដែល​ចាប់ផ្តើម​នៅ​ថ្ងៃទី​២៨-២៩ ខែមេសា ឆ្នាំ​២០១៨​។

លោកបានបញ្ជាក់ថា រថយន្ត Mercedes-Benz ដែលយកទៅប្រណាំងនោះ មានតម្លៃចាប់ពីជាង១០ម៉ឺនដុល្លារ ដល់ជាង៣០ម៉ឺនដុល្លារអាមេរិក អាស្រ័យទៅតាមស៊េរីរបស់រថយន្ត។

លោកបន្តថា ក្នុង​ព្រឹត្តិការណ៍ប្រណាំងរថយន្តដ៏ធំ​នេះ មានអ្នកចូលរួម​ចំនួន ​៤២​នាក់ ក្នុងនោះមានអ្នកសារព័ត៌មាន Fresh News ​សារព័ត៌មានថ្មីៗរបស់កម្ពុជា ​និងអ្នកសារព័ត៌មានអាស៊ាន​ផ្សេង​ទៀត រួមទាំង​តំណាង​ក្រុមហ៊ុននាំចូលរថយន្ត Mercedes-Benz តាមប្រទេសនានាផងដែរ​។

​សូម​បញ្ជាក់ថា ក្រុមហ៊ុន ស្តារ អូ​តូ (ខេ​ម​បូ​ឌា​) ខូ អិ​ល​ធី​ឌី ទទួល​សិទ្ធិផ្តាច់មុខ​ពី​ក្រុមហ៊ុន ឌែម​លើ អេ​ជី ក្នុងការ​នាំចូល ចែកចាយ និង​ដាក់លក់​នូវ​គ្រប់​ប្រភេទ​រថយន្ត Mercedes-Benz ប្រចាំ​នៅ​កម្ពុជា​។ ទីតាំង​ស្នាក់ការរថយន្ត Mercedes-Benz ស្ថិតនៅមហាវិថីសម្តេច ហ៊ុន សែន កែងមហាវិថីឧកញ៉ា ហ៊ុន នាង ភូមិ​ទួល​រកា សង្កាត់ចាក់អង្រែ​ក្រោម ខណ្ឌមានជ័យ រាជធានី​ភ្នំពេញ​៕

ខាងក្រោមនេះ ជាវីដេអូដែលបង្ហាញពីព្រឹត្តិការណ៍ប្រណាំងរថយន្ត Mercedes-Benz នៅប្រទេសម៉ាឡេស៊ី៖