(ភ្នំពេញ)៖ អតីតនិស្សិតថ្នាក់បណ្ឌិតនិងបច្ចុប្បន្នជាអនុប្រធានតុលាការកំពូល លោកបណ្ឌិត ជីវ កេង កោសសរសើរសាកលវិទ្យាល័យឥន្ទ្រវិជ្ជា (UI) ដឹកនាំដោយលោកបណ្ឌិត ឡាច សំរោង ជាសាកលវិទ្យាធិការ ដែលបានចូលរួមចំណែកឆ្លើយតបយ៉ាងសមស្រប និងទាន់ពេលវេលាទៅនឹងគោលនយោបាយរបស់រាជរដ្ឋាភិបាល ក្នុងការកសាងធនធានមនុស្ស។
ការលើកឡើងនេះ ធ្វើឡើងនៅរសៀលថ្ងៃទី២៨ ខែមេសា ឆ្នាំ២០១៨ ក្នុងសិក្ខាសាលាស្តីពី «សារៈប្រយោជន៍នៃការជ្រើសរើសប្រធានបទស្រាវជ្រាវ សម្រាប់និក្ខេបបទថ្នាក់បណ្ឌិត» នាមជ្ឈមណ្ឌលសហប្រតិបត្តិការកម្ពុជាកូរ៉េ ។
លោកបណ្ឌិត ជីវ កេង ថ្លែងថា នេះជារឿងនឹកស្មានមិនដល់ទាល់តែសោះ សូមកោតសរសើរចំពោះលោកបណ្ឌិតឡាច សំរោង សាកលវិទ្យាធិការនៃសាកលវិទ្យាល័យឥន្ទ្រវិជ្ជា ដែលបានស្រោចស្រង់នូវសាកលវិទ្យាល័យមួយនេះ ឱ្យបានរស់ឡើងវិញ បន្ទាប់ពីបានជួបនូវបញ្ហាមួយចំនួនក្នុងរយៈកាលប៉ុន្មានឆ្នាំមកនេះ ។
អនុប្រធានតុលាការកំពូល ថ្លែងបន្តថា «ខ្ញុំជឿថាលទ្ធផលដ៏ថ្លៃថ្លានេះ គឺពិតជាបានមកពីការខិតខំ ប្រឹងប្រែង និង សហការគ្នាល្អប្រសើរ ក្នុងការបង្រៀន ការសិក្សា ការស្រាវជ្រាវ និង សកម្មភាពជាច្រើនទៀត ដែលពាក់ព័ន្ធនឹងការបណ្តុះបណ្តាល ទោះបីជាការគ្រប់គ្រងនៅមានការលំបាក និង ការខ្វះចន្លោះខ្លះៗ ។ យ៉ាងណាក៏ដោយ ខ្ញុំចាត់ទុកថា ជាជោគជ័យថ្មីមួយទៀតរបស់សាកលវិទ្យាល័យឥន្ទ្រវិជ្ជា ដែលបានរៀបចំស្តារឡើងវិញ ។ សង្ឃឹមថា និស្សិតថ្នាក់បណ្ឌិត និង ថ្នាក់បរិញ្ញាបត្រជាន់ខ្ពស់ទាំងអស់ នឹងខិតខំសិក្សាស្រាវជ្រាវបានចប់តាមពេលវេលា និង សហការ ល្អជាមួយសាកលវិទ្យាល័យ»។
លោកបណ្ឌិត ឡាច សំរោង សាកលវិទ្យាធិការនៃសាកលវិទ្យាល័យឥន្ទ្រវិជ្ជា ប្តេជ្ញាយ៉ាងមោះមុតថា នឹងដឹកនាំសាកលវិទ្យាល័យមួយនេះ ឱ្យកាន់តែមានភាពរីកចម្រើន ដើម្បីឆ្លើយតបនឹងគោលនយោបាយរបស់រាជរដ្ឋាភិបាលកម្ពុជា ក្នុងការកសាងធនធានមនុស្សនៅកម្ពុជា៕
