(កោះកុង)៖ គិតត្រឹមម៉ោងជាង១២ថ្ងៃត្រង់នេះ កម្លាំងនគរបាល​បានរកឃើញសាកសពជនរងគ្រោះចំនួន៥នាក់ ក្នុងរថយន្ដ​ Lexus470 ដែលបានបុកជាមួយរថយន្តដឹកសាំង ក្រុមហ៊ុន PTT នៅស្រុកស្រែអំបិល ខេត្តកោះកុង បន្ទាប់ពីកម្លាំងនគរបាល បានកាត់គ្រោងដែក របស់រថយន្ដដើម្បីយកសពចេញក្រៅ ហើយរកឃើញថា អ្នកបើករថយន្ដ Lexus រស់នៅខេត្តព្រះសីហនុ តែជាមន្ដ្រីរាជការ នៅខេត្តកំពត។

ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ ដែលបានបញ្ជាឲ្យកម្លាំងនគរបាលស្រុកកំពង់សីលា សហការជាមួយកម្លាំងនគរបាលស្រុកស្រែអំបិល បានប្រាប់អង្គភាព Fresh News ឲ្យដឹងថា ​បន្ទាប់ពីការកាត់គ្រោងដែករបស់រថយន្ដ ដើម្បីយកសពជនរងគ្រោះចេញក្រៅ រកឃើញសពជនរងគ្រោះ៥នាក់ ក្នុងនោះអាចមានស្ដ្រីផងដែរ ព្រោះឃើញមានកងដៃនៅលើសាកសព។

បើតាមលោកឧត្តមសេនីយ៍ស្នងការ សពក្នុងរថយន្ដ​ Lexus470 អាចជាគ្រួសារនឹងគ្នា ប៉ុន្ដែពេលនេះមិនទាន់បានស្គាល់អត្ដសញ្ញាណនៅឡើយទេ ដោយជំហ៊ានដំបូងគ្រាន់តែដឹងថា ជនរងគ្រោះជាអ្នកបើករថយន្ដរស់នៅ ខេត្តព្រះសីហនុ និងជាមន្ដ្រីរាជការនៅខេត្តកំពត។

សូមបញ្ជាក់ថា គ្រោះថ្នាក់ចរាចរណ៍ដ៏រន្ធត់នេះ បានកើតឡើងនៅវេលាម៉ោងប្រមាណ ៧៖៣០នាទីព្រឹក​ថ្ងៃទី​២៨ ខែ​មេសា​ ឆ្នាំ​២០១៨​ ចន្លោះ​គីឡូម៉ែត្រ​ ១៤១-១៤២​ លើផ្លូវ​ជាតិ​លេខ​៤​ ស្ថិត​នៅ​ក្នុង​ភូមិ​អូរជ្រៅ​ ឃុំ​បឹងព្រាវ​ ស្រុក​ស្រែ​អំបិល​ ខេត្ត​កោះកុង​ រវាង​រថយន្ត Lexus-470 មានទិសដៅពី​ខេត្ត​ព្រះសីហនុ​ ឆ្ពោះ​ទៅ​ភ្នំពេញ​ លុះ​ដល់ចំណុចខាងលើ​ ក៏បាន​បុក​នឹង​រថយន្ត​ដឹក​ប្រេង​ របស់​ក្រុមហ៊ុន​ PTT បណ្ដាលឲ្យ​ផ្ទុះ​ឆេះ​រថយន្ត​ទាំង​ពីរ​គ្រឿង៕