(ព្រះវិហារ)៖ មន្ទីរសុខាភិបាលខេត្តព្រះវិហារ បានរៀបចំកម្មវិធីអបអរសារទរដល់ ទិវាផ្តល់ថ្នាំបង្ការពិភពលោក ក្រោមប្រធានបទ «ការពារសហគមន៍យើង ដោយចាក់វ៉ាក់សាំង» ដែលពិធីនេះត្រូវបានរៀបចំឡើង នៅព្រឹកថ្ងៃទី២៧ ខែមេសា ឆ្នាំ២០១៨នេះ នៅមណ្ឌលសុខភាពស្អាង ស្ថិតក្នុងស្រុកជ័យសែន ខេត្តព្រះវិហារ។
លោក គួង ឡូ ប្រធានមន្ទីរសុខាភិបាលខេត្តព្រះវិហារ បានឱ្យដឹងថា ការរៀបចំទិវាផ្តល់ថ្នាំបង្ការពិភពលោកក្រោមប្រធានបទនេះ ចង់បញ្ជាក់ថា ការចាក់វ៉ាក់សាំង គឺជាភារកិច្ចរបស់យើងគ្រប់គ្នា ដោយធានាបានថា យើងគ្រប់គ្នាត្រូវបានការពារពីជំងឺ ដែលអាចការពារបានដោយចាក់វ៉ាក់សាំង ហើយក៏មានគោលបំណង ចង់បង្កើនការយល់ដឹង ដល់ប្រជាពលរដ្ឋផងដែរ។
លោកបានបន្តទៀតថា រហូតមកដល់ពេលនេះវ៉ាក់សាំង របស់កម្មវិធីជាតិផ្តល់ថ្នាំបង្ការនៃក្រសួងសុខាភិបាល មានចំនួនរហូតដល់១១មុខហើយ រួមមានវ៉ាក់សាំងការពារជំងឺរបេង ជំងឺរលៀកថ្លើមប្រភេទបេ(B) ជំងឺគ្រុនស្វិតដៃជើង ជំងឺតេតាណូស ជំងឺក្អកមាន់ ជំងឺខាន់ស្លាក់ ជំងឺរលាកសួត និងស្រោមខួរក្បាលដោយបាក់តេរីហ៊ីប ជំងឺរលាកសួតនិងស្រោមខួរក្បាល ដោយបាក់តេរីភ្នើម៉ូកូក ជំងឺកញ្ជ្រឹល ជំងឺស្អូច និងជំងឺរលាកខួរក្បាលជេអ៊ី ផងដែរ។
លោកជំរុញឱ្យអាណាព្យាបាលទាំងអស់ ត្រូវតែនាំកូនចៅទៅទទួលការចាក់ថ្នាំវ៉ាក់សាំង ឱ្យបានគ្រប់ៗគ្នា និងទៀងទាត់ពេលវេលាផងដែរ។
លោកវេជ្ជបណ្ឌិតរូបនេះ ក៏បានធ្វើការអំពាវនាវ ឲ្យប្រជាពលរដ្ឋ ត្រូវធ្វើការប្រុងប្រយត្ន័ចំពោះកូនចៅ ដើម្បីការពារកុំឱ្យកើតជំងឺគ្រុនចាញ់ និងជំងឺគ្រុនឈាម ដោយរដូវវស្សាឈានចូលមកដល់មានភ្លៀងធ្លាក់ មានទឹកដក់បង្ករជាមូសខ្លា និងមូសដែកគោលញីខាំ ដែលអាចបង្កឲ្យកើតមានជំងឺទាំងនេះ ដូច្នេះដើម្បីការពារពីជំងឺទាំងនេះ ពលរដ្ឋត្រូវតែសម្អាតបរិវេណផ្ទះកុំឱ្យមានដក់ទឹកនាំឱ្យមូសងាយនឹងកើត ជាពិសេសត្រូវគេងដាក់មុងជានិច្ច៕
